هەرێما كوردستانێ‌ دگەڵەك هەڤراز و نشیڤاندا دەربازبوو، گەڵەك جاران دهاتە بەر كەفتنێ‌ و كەسێن خوەدی هێز نەدهێلا، نێچیرڤان بارزانی كەسایەتییێ‌ سیاسییێ‌ دیارێ‌ نێڤدەوڵەتی یێك ژ وان كەسان بوو كە نەهێلا هەرێما كوردستان بكەڤیت و ب هێزا پەیوەندیی و سیاسەتا خوە كاری دۆستێن بهێز بۆ كوردان پەیدا بكەت. بەری نێزیك 30 ساڵانە نێچیرڤان بارزانی هەوڵا دروستكرنا ئابوورییەكا سەربخوە ددا و كاری هەرێما كوردستانێ‌ بكەتە هەرێمەكا سەركەفتی ب پشتبەستن ب ئابوورییا خوەڤە، یێك ژ رێكا چێبوونا ئابوورییا سەربخوە، پەیوەندیێن كەسی بوون دگەڵ كەسایەتی و خوەدی بڕیار و هێزا كاریگەر ل جیهانێ‌ ب گشتی و رۆژهەڵاتا ناڤین ب تایبەتی. لەوما ئیرۆ ئەم د بینین وەڵات و گەلێن جوداجودا ب گەرمیڤە پیرۆزباهییا نێچیرڤان بارزانی دكەن ب هەلكەفتا بوون ب سەرۆكێ‌ هەرێما كوردستانێ‌ و، تەڤی وەڵات ژی پشتگیرییا وی دكەن و دڵخۆشن كوو كەسایەتییەكێ‌ سەركەفتی د ئیدارەدانێدا و سیاسییەكێ‌ سەبوور دێ‌ بیتە سەرۆكێ‌ هەرێمێ‌، ئەو هەرێما دەردۆرا وێ‌ تژی نەحەز و دوژمنێن كوردا. نێچیرڤان بارزانی د كارێن خوەیێن سیاسی و ئابووریدا، كەسەكێ‌ سەركەفتی بوویە و سیاسییەكێ‌ دووربین و نەرم و نیان و جددییە و، ئەو وڵات و سیاسیێن دانوستاندن دگەڵ كری، وەسفا وی دكەن، لەوما هەر وەڵات و كەسایەتییەكێ‌ سیاسی د پیرۆزباهیێن خوەدا بەحسێ‌ رۆلا وی كرییە و پشتەڤانیا خوە دەربڕییە بۆ سەرۆكاتییا وی د پۆستێ‌ سەرۆكێ‌ هەرێمێدا و، تەڤی ئالی پشتگیرییا وی دكەن. ئۆ تەڤی وەڵاتان داخازا بهێز كرنا پەیوەندیێن دیپلۆماسیی و ئابووری كرییە. تەڤی ئەو كەسێن پەیوەندی دگەڵا نێچیرڤان بارزانی هەی، ب خۆشحالیڤە بەحسێ‌ دواڕۆژا هەرێمێ‌ و پەیوەندیێن وێ‌ ب دونیایا دەرڤە دكەن و گەشبینن ب ئایندەیا هەرێما كوردستانێ‌.
رێزدار نێچیرڤان بارزانی كەسایەتییەكێ‌ مەحبووب و خۆشتڤییە و د هۆنەرێ‌ سیاسەتێ‌ و دانوستاندنادا شیایە باوەڕییەكا موكم چێ‌ كەت و تەڤی ئالیێن سیاسیی یێن هەرێما كوردستانێ‌ و وەڵاتێن دەرڤەژی باوەڕی ب وێ‌ هەرێمێ‌ هەیە كوو نێچیرڤان بارزانی سەرۆكاتییا وێ‌ بكەت و، تەڤی وەڵات ژی چاڤەڕێ‌ دكەن كوو پەیوەندیێن بهێز دگەڵ هەرێمێ‌ چێكەن. نەخاسمە وەڵاتێن خوەدی ئابوورییەكا بهێز.
سەرۆكاتییا نێچیرڤان بارزانی هەڤەدەمە دگەڵا هندەك گۆڕانكاری و ئالۆزیێن رۆژهەڵاتا ناڤەڕاست، بۆ هەرێمێ‌ گرنگە كا چاوا دێ‌ شیێت خوە دگەڵا ڤان گۆڕانكارییا گونجینیت و خوە دوور بگریت ل هەر ئالۆزییەكا كوو بڤێت هەرێمێ‌ دگەڵ خوە راپێچیت، توركیا و ئیران دوو وەڵاتێن گرنگن بۆ هەرێما كوردستانێ‌، پەیوەندیێن ئابووری و سیاسیی نها بەرەف پێشڤەچۆنن، د پەیاما خوەیا پیرۆزباهیێدا، هەردووك وەڵاتان ب گەشبینیڤە بەحسا سەرۆكاتییا رێزدار نێچیرڤان بارزانی كریە و داخازا بەرەف پێشڤەچۆن و موكم كرنا پەیوەندییان كرییە، ئۆ هەردوو وەڵاتان ژی دیرۆكەكا دوور و درێژا دگەڵ باشوورێ‌ كوردستانێ‌ هەی، لەوما پێدڤییە ئەف دوو وەڵاتە دەستێ‌ هەرێما كوردستانێ‌ بگرن و ل هەمبەری وێ‌ رانەوەستن. پەیوەیدییا وەزیرێ‌ دەرڤە یێ‌ ئەمریكا ب رێكا مۆبایڵی و پیرۆزباهی كرنا سەرۆكوەزیرێ‌ عێراقێ‌ گرنگیا خوە هەیە و، رێزدار نێچیرڤان بارزانی دیرۆكەك باش هەیە د چارەسەركرنا كێشەیێن هەرێمێ‌ دگەڵ بەغدا و ئیرانێ‌ و توركیا، ئەڤەژی دێ‌ بیتە هێڤێنەك باش بۆ دوارۆژا هەرێمێ‌ و ب ساناهی چارەسەركرنا كێشەیان لسەر مێزا ئاخفتنێ‌.