نزیكه‌ دێ هه‌رێما كوردستانێ به‌ره‌ڤ قۆناغه‌كا دى پێنگاڤان هاڤێت، ئه‌و ژى دێ ل ده‌مێ هه‌لبژارتنا سه‌رۆكێ هه‌رێما كوردستانێ و پێكئنانا كابینا نوویا حكومه‌تێ دێ ده‌ست پێ كه‌ت، بێگومان پارتى ب هه‌مو ره‌نگان وێ بزاڤێ دكه‌ت ل دووڤ وێ درووشما ل هه‌بژارتنان بلندكر، وه‌ها ده‌ركه‌ڤیت و كوردستانه‌كا ب هێزتر ژ یا نها نیشا جیهان و ده‌وروبه‌رێ خوه‌ بده‌ت، ئاماژه‌ و پێنگاڤێن نها ئه‌م دبینن هه‌موو وێ راستیێ نیشا مه‌ دده‌ن، نێچیرڤان بارزانى كو نها سه‌رۆكێ حكومه‌تا هه‌رێما كوردستانێ یه‌ و بریاره‌ د رۆژێن بهێت دا ل په‌رله‌مانێ كوردستانێ وه‌كو بهێزترین كاندیدێ پۆستێ سه‌رۆكاتیا هه‌رێمێ ب رێكه‌فتنا ئالیێن سیاسى زۆرترین ده‌نگان ب ده‌ستڤه‌ بنیت و وه‌كو سه‌رۆكێ هه‌رێما ك‌وردستانێ بۆ چار سالێن ئاینده‌ ده‌ست بكاربیت، ژ نها پێنگاڤێن وى بۆ دروستكرنا وێ كوردستانێ دیاردبن، چێكرنا وێ ئێكرێزیا ناڤبه‌را پارتێن سه‌ره‌كى و خوه‌دان كورسی یێن په‌رله‌مانێ كوردستانێ وێ راستیبێ ناڤه‌شێرن. ل گه‌ل وێ ڤێ یه‌كێ ژى ئه‌وا نێچیرڤان بارزانى دكه‌ت نه‌ ب تنێ تایبه‌ته‌ ب هه‌رێما كوردستانێ ڤه‌، به‌لكو ره‌نگه‌ د چارسالێن بهێت ئه‌ركێ وى یێ مه‌زن ئێكلاكرنا پرسا ده‌ڤه‌رێن ده‌رڤه‌ى ئیدارا هه‌رێما كوردستانێ بیت، ئه‌و نامه‌یا وى ژى بۆ سكرتێرێ گشتیێ نه‌ته‌وێن ئێكگرتى وێ چه‌ندێ دبێژیته‌ مه‌ كوردستانه‌كا بهێز و پۆسته‌كى وه‌كى سه‌رۆكاتیا هه‌رێما كوردستانێ پێدڤى ب دبلۆماسیه‌ته‌كێ یه‌ كو پێشتر سه‌ربۆر و ئه‌زموون د وى بیاڤى دا هه‌بن و ل سه‌ر ئاستێ په‌یوه‌ندیێن دبلۆماسی ژى ب هێز و كاریگه‌ر بیت، هه‌ر ئه‌ڤ كاریزمایى ژى وه‌كر كو نه‌ته‌وێن ئێكگرتى به‌رسڤا وێ نامێ بده‌تن، ئێك ژ وان پێشنیارێن نێچیرڤان بارزانى سه‌رۆكێ حكومه‌تا هه‌رێمێ بۆ سكرتێرێ گشتى یێ نه‌ته‌وێن ئێكگرتى ئاراسته‌كرى ئه‌ڤه‌بوو كو ژ سكرتێرێ گشتیێ نه‌ته‌وێن ئێكگرتى خواستبوو ببیته‌ ناڤبژیكار بۆ بجهئینانا ماده‌یا سه‌د و چل یا ده‌ستورێ ئیراقێ، خالا ئارامى و چاره‌كرنا ئاریشه‌یێن ناڤبه‌را هه‌ردوو حكومه‌تا دا ماده‌سا سه‌د و چل و ب وێ رێكێ هه‌ردوو پترین ناكوكیێن وان چاره‌بن، د ده‌ستورێ ئێراقێ ژى ده‌مه‌كێ ده‌ستنیشانكرى بۆ وى ماده‌ى هاتیه‌ دانان كو نابیت ل سالا 2007 ده‌رباز ببیت و پێدڤیه‌ ئه‌ڤ ماده‌یه‌ بهێته‌ بحهئینان، لێ حكومه‌تا ئیراقێ ب هه‌موو شیانێن رێك لێگرت، له‌ورا بۆ قوناغا بهێت و پۆستێ نوویێ نێچیرڤان بارزانى دێ ئه‌ڤ پرسه‌ ئێك ژ ئه‌ولیاتێن وى بیتن، هه‌ر ژ به‌رهندێ ژى دێ بینین، سه‌رۆكێ حكومه‌تا هه‌رێما كوردستانێ ب پێشنیارا ئێكێ و ب گرنگترین خال د ناما خوه‌ دا دانایه‌.