ئه‌رێ هه‌ولێر بۆ ئه‌مریكا هه‌ر هێلا سۆره؟
به‌ده‌ل گابێركى
لڤێره و ب تایبه‌تى ل سالێن بۆرى حكومه‌تا هه‌رێما كوردستانێ په‌یوه‌ندیێن خوه دگه‌ل ئه‌مریكا به‌ره‌ڤ پێشڤه برینه و به‌لگه بۆ ڤێ چه‌ندێژى ئه‌وه كو ل چه‌ندین ده‌مێن بۆرى ئه‌مریكا ل هه‌وارا هه‌رێما كوردستانێ هاتیه، ئه‌وژى ل ده‌مێ مه‌ترسی كه‌فتیه سه‌ر هه‌رێما كوردستانێ ژ لایێ داعش ڤه ئه‌مریكا هه‌ر زوو ب فرۆكێن شه‌ركه‌ر داعش پاشڤه‌بر و دیسان چه‌ندین هاریكاریێن چه‌كى پیشكێشى پێشمه‌رگه‌یى كرن و سالانه ژ بودجه‌یا خوه هنده‌ك پاره بۆ پشته‌ڤانیكرنا پێشمه‌رگه‌ى ته‌رخان دكر.
دیسان ب ئاماده‌بوونا سه‌رۆكێ حكومه‌تا هه‌رێما كوردستانێ نێچیرڤان بارزانى به‌رێ بنیاتى بۆ مه‌زنترین قونسۆلخانه ل هه‌ولێرێ هاته‌دانان و ئه‌ڤ پینگاڤا مه‌زن یا ئه‌مریكا وێ چه‌ندێ دگه‌هینیت كو هه‌ولێر دێ هه‌ر ب هێلاسۆر بۆ وێ مینیت.
كورد چاوا سه‌ره‌ده‌ریێ دگه‌ل ئه‌مریكا بكه‌ن، ژ به‌ركو ئه‌مریكا ئه‌و هێز نینه پێدڤى ب چ هێزان ببیت و هه‌موو وه‌لاتێن جیهانێ چاڤێ وان ل هندێ یه ئه‌مریكا مه‌رحه‌بایه‌كێ لێ بكه‌ت، هه‌ر ژ به‌رهندێ گه‌له‌ك یا گرنگه حكومه‌تا هه‌رێما كوردستانێ ب پلان و ستراتیجیه‌ته‌كا هه‌ڤپشك و ئێكگرتى په‌یوه‌ندیێن خوه دگه‌ل ئه‌مریكا دروست بكه‌ت بۆ هندێ ئه‌ڤ دوستێ مه‌زن نه‌بیته كابۆسه‌ك بۆ هه‌رێما كوردستانێ.
گه‌له‌ك پارتێن سیاسى بزاڤێ دكه‌ن خوه نێزیكى ئیرانێ بكه‌ن كو دوژمنا سه‌ره‌كى یا ئه‌مریكایه و ل هه‌ر جهێ ئه‌مریكا لێ ئه‌و دژى به‌رژوه‌ندیێن وان كار دكه‌ت و نێزیكبوونا هنده‌ك پارتێن سیاسى بۆ ئیرانێ دبیت ل پاشه‌رۆژێ مه‌ترسیه‌كا جدى ل سه‌ر هه‌رێما كوردستانێ دروست بكه‌ت و نابیت ئه‌م ڤێ مه‌ترسێ ب چاڤه‌كێ كێم به‌رێ خوه بده‌ینێ و هاتنا ترامپى بۆ سه‌ر ده‌ستهه‌لاتێ بۆ هندێ یه رژێما ئیرانێ ژناڤ ببه‌ت و ژناڤبرنا وێژى ب چه‌ندین قوناغان ده‌ست پێ دكه‌ت، ژ وانژى ژناڤبرنا ئابۆرێ ئیرانێ و دوستێن ئیرانێ و راكرنا خه‌لكى ل وێ رژێمێ و بهێزكرنا نه‌یارێن ئیرانێ چ ل ناڤخوه‌یى یا ئیرانێ یان ژ ده‌رڤه‌یا ئیرانێ، كه‌واته ئه‌وێن دوست و پشته‌ڤانێن ئیرانێ ژ ئه‌ڤرۆكه وێڤه پێدڤیه باش ژ خوه بترسن.
ل دوماهیكێ هه‌تا نها حكومه‌تا هه‌رێما كوردستانێ شیایه گه‌شه‌یێ ب په‌یوه‌ندیێن خوه دگه‌ل ئه‌مریكا بده‌ت و بێ گونان ئه‌ڤ گه‌شه‌یه دبیته ئه‌گه‌رێ هندێ كو كوردستانێ پاشه‌رۆژه‌كا باش هه‌بیت ل داهاتى.
