ئه‌نفالكرنا خه‌لكێ كوردستانێ ل سه‌ر ده‌ستێ رژێما به‌عس دهێته‌ هژمارتن ئێك ژ درنده‌ترین تاوانێن ل سه‌ر روویێ ئه‌ردى و نابیت ئه‌ڤ تاوانا هنده‌یا مه‌زن بهێته‌ ژبیركرن كو ئارمانج ژ كرنا ڤێ تاوانێ نه‌هێلانا نه‌ژادێ كوردان بوویه‌، به‌لێ ده‌رئه‌نجام كورد هه‌رمان و بكه‌رێن وێ تاوانا مه‌زن ژناڤ چوون.
دیمه‌نێن ئه‌نفالان هه‌موو دبنه‌ تابلۆ و مرۆڤ دشێت ب هه‌ر تابلۆیه‌كێ وژدانا مرۆڤ و مرۆڤایه‌تیێ ب هه‌ژینیت و ئه‌گه‌ر به‌رێ خوه‌ بده‌ینه‌ ناڤه‌رۆكا ئه‌نفالان كو ژ چه‌ندین روودانێن جودا جودا پێك دهێت ژ وانژى خرابكرنا پتر ژ 4000 هزار گوندێن كوردستانێ و كوشتنا ب هزاران گیانه‌وه‌رێن كیڤى و كه‌هى ب ڤێ چه‌ندێ ژى چه‌ندین زیان گه‌هشتنه‌ وه‌لاتیان وه‌كو نه‌مانا په‌ز و بالنده‌ و مێشێن هنگڤینى و هه‌تا دوماهیكێ و گیانه‌وه‌رێن كیڤى به‌ره‌ڤ كێمبوونێ چوون وه‌كو هرچان و گۆرگان و چه‌ندین جورێن دیتر ب ڤێ چه‌ندێ ژى سرۆشت و جوانیا كوردستانێ ل كێمێ دا، ژ بلى ژناڤ چوونا چه‌ندین جورێن داران و سۆتنا چه‌ندین دارستانان كو زیانه‌كا ئێكجار مه‌زنه‌ بۆ ژینگه‌ها كوردستانێ.
روودانه‌كا دیتر یا ئه‌نفالێ شه‌هیدكرنا پتر ژ 182 هزار كوردان بوو كو پێكدهاتن ژ كچ و كور و زه‌لام و كه‌سێن دانعه‌مر و به‌رزه‌كرنا هه‌شت هزار بارزانیان و چه‌ندین تاوانێن دیتر كو چ پێنۆس و هه‌ست نه‌شێن ده‌ربرینێ ژێ بكه‌ن.
ئه‌گه‌ر ئه‌م به‌رێ خوه‌ بده‌ینه‌ حكومه‌تا هه‌رێما كوردستانێ چه‌ندین بزاڤكرینه‌ بۆ قه‌ره‌بووكرنا كه‌س و كارێن ئه‌نفالكرییان كو ئه‌ركێ قه‌ره‌بووكرنا وان د كه‌ڤیته‌ ستۆیێ حكومه‌تا عیراقا فیدرال و ل سه‌ر وێ پێدڤییه‌ قه‌ره‌بوویا مادى و یا مه‌عنه‌وى یا پاشماوێن ئه‌نفالان بكه‌ت، به‌لێ مخابن پشتى چه‌ندین سه‌ره‌دانێن فه‌رمى یێن حكومه‌تا هه‌رێما كوردستانێ بۆ به‌غدا و داخازكرنا قه‌ره‌بووكرنا كه‌س و كارێن ئه‌نفالكرییان هێشتا به‌غدا ب شێوه‌یه‌كێ فه‌رمى كه‌س و كارێن ئه‌نفالكرییان قه‌ره‌بوونه‌كرینه‌ و ب ڤێ چه‌ندێ ژى زه‌رمه‌ندێن ئێكێ ئه‌ون یێن كو ئه‌ڤه‌ نێزیكى 30 سالانه‌ چاڤه‌رێى قه‌ره‌بووكرنا خوه‌ نه‌ و گه‌له‌ك ژ وان مرن د چاڤه‌رێبوونا وه‌رگرتنا مافێن خوه‌دا.
كه‌یسا ئه‌نفالكرییان دڤێت ل هه‌موو جیهانێ بهێته‌ نیاسین و وه‌كو تاوانه‌كا جینۆسایدێ بهێته‌ نیاسین و هه‌تا ئه‌ڤ چه‌نده‌ بهێته‌كرن دڤێت كاره‌كێ مه‌زن بهێته‌كرن ل سه‌ر ئاستێ جیهانێ بۆ هندێ قه‌ناعه‌تێ بۆ دادگه‌هێن مه‌زن یێن جیهانێ چێكه‌ن كو مه‌رم ژ كرنا ئه‌نفالان بۆ هندێ بوویه‌ ملله‌تێ كورد ب ئێكجارى نه‌هێلن و كاره‌كێ باش بهێته‌كرن بۆ كومكرنا به‌لگه‌ و دیكومێنتان ل سه‌ر وێ تاوانا مه‌زن یا دژى خه‌لكێ كوردستانێ هاتیه‌كرن.
حكومه‌تا هه‌رێما كوردستانێ دشێت ب چه‌ندین رێكان خزمه‌تا ئه‌نفالكریان بكه‌ن بۆ نموونه‌ ب رێكا نوونه‌راتیێن خوه‌ ل ده‌رڤه‌یى وه‌لاتى پتر ڤێ تاوانێ نیشا جیهانێ بده‌ت بۆ هندێ وه‌كو جینۆساید بهێته‌ نیاسین و دیسان پتر كار بكه‌ت بۆ قه‌ره‌بووكرنا پاشماوێن ئه‌نفالان بۆ هندێ پتر كه‌س و كارێن وان چاڤه‌رێى قه‌ره‌بووكرنا خوه‌ نه‌كه‌ن و بگه‌هنه‌ مافێن خوه‌ هێشتا ئه‌و دساخ.