ئه‌گه‌ر ئه‌م به‌رێ خوه‌ بده‌ینه‌ وه‌لاتێن جیهانێ هه‌ر حكومه‌ته‌كێ سیاسه‌تا خوه‌ یا تایبه‌ت هه‌یه‌ بۆ پرێڤه‌برنا وه‌لاتێ خوه‌ و د چه‌ندین بیاڤان دا ب شه‌ڤ و رۆژ كار دكه‌ن بۆ هندێ بمینه‌ سه‌ر ده‌پێ شانۆیێ و هه‌ڤركیێ دگه‌ل جیهانا بله‌ز یا ئه‌ڤرۆ بكه‌ن.
هنده‌ك وه‌لات مرۆڤان دكه‌نه‌ وزه‌ و دسۆژن بۆ هندێ بگه‌هنه‌ ئارمانجێن خوه‌ و ئاڤاهیێن مه‌زن دروست بكه‌ن پاره‌كێ باش ب ده‌ست خوه‌ڤه‌ بێخن و هنده‌ك وه‌لاتژى مرۆڤان ئاڤا دكه‌ن بۆ هندێ وزێ دروست بكه‌ت و پێ بگه‌هنه‌ ئارمانجێن خوه‌، لڤێره‌ ئارمانج چیه‌ و دڤێت چ بیت؟
حكومه‌تا هه‌رێما كوردستانێ چه‌ندین بزاڤكرینه‌ بۆ ئاڤه‌دانكرنا كوردستانێ و هشیاركرنا وه‌لاتیان ل سه‌ر چه‌ندین بابه‌تان، به‌لێ مخابن مرۆڤێ كورد ژ لایێ گه‌شه‌كرنێ و ئاڤاكرنێ هێشتا ل رێزێن دوماهیێ دهێت ل سه‌ر ئاستێ جیهانێ و ئه‌گه‌ر ئه‌م به‌راوردییه‌كێ بكه‌ین یان هنده‌ك نموونێن واقعى بینه‌ به‌رچاڤێن خوه‌ بۆ نموونه‌ ل ئاكرێ و پیرۆزكرنا جه‌ژنا نه‌ورۆزێ ژماره‌كا زێده‌ یا وه‌لاتیان ئاماده‌ ببوون كو ژمارا وان دگه‌هشته‌ 60 هزار كه‌سان خوه‌ ئه‌ڤ كه‌سه‌ هه‌موو كوردنه‌بوون چه‌ندین وه‌لاتیێن بیانى هه‌بوون، ل وێ ئاهه‌نگێ كه‌سه‌كێ كورى و بریتانى سه‌رێن خوه‌ د هه‌ژاندن و گوت: پشتى چه‌ندین سالان هوین باش پێشكه‌فتن به‌رى نوكه‌ ل سه‌ر بانان گوله‌ د هاڤێتن و نها د جامێن ترۆمبێلان د هاڤێژن و وه‌لاتیێن خوه‌ دكه‌نه‌ قوربانى! ئه‌م به‌رده‌وام بووین هه‌تا رۆژێن جه‌ژنێ ب راستى گه‌له‌كا سه‌یره‌ ئه‌ڤه‌ 30 ساله‌ حكومه‌تا هه‌رێما كوردستانێ دكه‌ته‌ هه‌وار و كه‌نالێن راگه‌هاندن ب شه‌ڤ و رۆژ دكه‌نه‌ هه‌وار ژینگه‌هێ پیس نه‌كه‌ن، به‌لێ چ ئه‌نجام نه‌بوون خه‌لكى ئه‌و هشیاریه‌ بۆ چێنه‌بوویه‌ و ژینگه‌ها خوه‌ پیس نه‌كه‌ن و پاقژ راگرن، بۆ ڤێ چه‌ندێژى من چه‌ندین ئه‌گه‌ر هه‌نه‌ كو نها دیار دكه‌م كو خالا ژ هه‌موویان گرنگتر ئه‌وه‌ مه‌ ژ سیسته‌مێ په‌روه‌ردێ ده‌ست پێنه‌كر كو هه‌موو ئاڤاكرن و ده‌ستپێكێن جوان دناڤبه‌را چوار دیواران دروست دبن ئه‌وژى پولا قوتابخانێ یه‌ كو مامۆستا سه‌ركردایه‌تیا وان گوهۆرینان دكه‌ن و ئه‌ڤ چه‌نده‌ژى ب نه‌بوونا مامۆستایێن هشیار و په‌روه‌رده‌كا هه‌رى باش تا نها ئه‌م یێ باجه‌كا گران دده‌ین.
ئه‌ركێ حكومه‌تا هه‌رێما كوردستانێ گه‌له‌كه‌ و یا گرنگه‌ باش هزرێ د وێ چه‌ندێ دا بكه‌ت كو به‌ریا هه‌ر تشته‌كى مرۆڤان ئاڤا بكه‌ت پاش ئاڤاهى بخوه‌ دێ ئاڤابن و پاش شاره‌ستانیه‌ت وێ بخوه‌ ئاڤا ببن، سه‌رۆكێ حكومه‌تێ دڤێت پلانه‌كا درێژخایه‌ن ب سه‌رپه‌رشتیا په‌روه‌رده‌كارێن خودان ئه‌زموون ژ ده‌رڤه‌یى وه‌لاتى چ وه‌لاتێ سۆید بیت یان هه‌ر وه‌لاته‌كێ دیتر یێ پێشكه‌فتى بیت د بیاڤێ په‌روه‌رده‌كرنێ دا، بۆ هندێ مرۆڤێ كورد ب باشى بهێته‌ په‌روه‌رده‌كرن و به‌رهه‌مێ وێ په‌روه‌رده‌كرنێ ئه‌و بیت كو مرۆڤه‌ك ئاڤا بیت وه‌لاته‌كێ مه‌زن و پێشكه‌فتى د هه‌موو بیاڤان دا ژ خه‌ونێ ببیته‌ راستى و ئه‌ڤ راستیه‌ژى ببیته‌ بناغه‌كێ بهێز بۆ ئاڤاكرنا ده‌وله‌تا كوردى.
ل دوماهیكێ یا گرنگه‌ بزانین كو حكومه‌تا هه‌رێما كوردستانێ بزانیت دێ چاوا مرۆڤان ئاڤا بكه‌ت، نه‌ك ئاڤاهیان و گه‌له‌گ جارا حكومه‌ت دناڤبه‌را ئاڤاكرنا مرۆڤان و ئاڤاهیان دا به‌رزه‌بوویه‌ و نه‌زانیه‌ دێ چ كه‌ت.