ل وه‌لاتێن جودا جودا ژیانا وه‌لاتیان ب شێوازێ جودایه‌ هنده‌ك وه‌لات ب ته‌مامى پشت به‌ستنێ ل كه‌رتێ تایبه‌ت دكه‌ن و گرنگیێ ناده‌نه‌ دامه‌زراندنێ د ناڤ حكومه‌تێ دا، ئه‌ڤه‌ژى ئه‌ڤه‌ دگه‌ریت بۆ پلان و ئارمانجێن هه‌ر وه‌لاته‌كى، به‌لێ ل دیڤ ستانده‌ردێن جیهانى ئه‌گه‌ر ل وه‌لاته‌كى كه‌رتێ تایبه‌ت یێ چالاك بیت و د گه‌شه‌كرنێ دا بیت ئه‌ڤه‌ ل وى ده‌مى ئه‌و وه‌لات تا راده‌یه‌كێ زۆر دێ یێ دوور ئاریشه‌ بیت، ئه‌ڤه‌ژى بۆ چه‌ندین ئه‌گه‌ران د ڤه‌گه‌ریت ژ وانژى ئه‌و كه‌سێن ل كه‌رتێ تایبه‌ت كار دكه‌ن پتر خوه‌ ماندی دكه‌ن و بزاڤێ دكه‌ن به‌رده‌وام تشتێن نوو پێشكێش بكه‌ن بۆ هندێ به‌رده‌وامیێ بده‌نه‌ كارێن خوه‌ و نه‌هێنه‌ دوور ئێخستن ژ كارێن وان و ئه‌و كار دكه‌ن و تشته‌كى به‌رهه‌م دئینن و دئێخنه‌ ناڤ بازارى و پاشى به‌رامبه‌رى كارى داهاته‌كى وه‌ردگرن و هه‌ر جاره‌كا دیتر ئه‌وى داهاتى دئێخنه‌ ناڤا بازارى، به‌لێ مخابن ئه‌و وه‌لاتێن كه‌رتێ تایبه‌ت لێ یێ باش نه‌بیت و گرنگى پێنه‌هێته‌دان حكومه‌ت بزاڤێ دكه‌ت ب رێكا دامه‌زراندنێ بێكاریێ نه‌هێلیت و ئه‌ڤ چه‌نده‌ژى دێ كاره‌كێ ب زه‌حمه‌ت بیت و باجه‌كا گران دیفرا هه‌بیت، ژبه‌ركو ئه‌و كه‌سێن دناڤا حكومه‌تێ دا دهێنه‌ دامه‌زراندن چ پشكداریه‌كا كارا د ئاڤاكرن و پێشڤه‌برنا وه‌لاتێ خوه‌ دا نینه‌ ب تنێ به‌رێ وان یێ ل سه‌رێ هه‌یڤێ مووچه‌كى وه‌ربگرن، به‌رامبه‌رى وى مووچه‌ى چ به‌رهه‌مه‌كى زێده‌ ناكه‌ن و دبنه‌ بارگرانى ل سه‌ر ملێن حكومه‌تێ و رۆژ بۆ رۆژێ ئه‌و بارگرانى دیار دبیت.
ئه‌گه‌ر ئه‌م به‌رێ خوه‌ بده‌ینه‌ حكومه‌تا هه‌رێما كوردستانێ ژماره‌كا زێده‌ یا مووچه‌ خوران هه‌یه‌ و پشتى راكرنا پاشكه‌فتێ مووچه‌ى و نه‌مانا قه‌یرانا دارایى یا گرنگه‌ وه‌لاتى هاریكاریا حكومه‌تێ بكه‌ن، ژ به‌ركو حكومه‌ت پتر ژ 60% داهاتێ حكومه‌تێ بۆ مووچه‌ خوارن دچیت و بڤێ چه‌ندێ حكومه‌ت نه‌شێت چ پرۆژێن مه‌زن دروست بكه‌ت، به‌لێ وه‌لاتى دشێن پشكه‌كا وى پاره‌یى بۆ حكومه‌تێ بزڤرینن ئه‌وژى باجێن خوه‌ زوو بده‌ن و پرۆژێن مه‌زن ئاڤا بكه‌ن، بۆ نموونه‌ ل گه‌له‌ك وه‌لاتان مه‌ گوهل ناڤێن هنده‌ك كومپانیێن مه‌زن دبیت وه‌كو ئه‌دیداس ئه‌ڤه‌ نه‌ ملكێ كه‌سه‌ك ب تنێ یه‌ به‌لكو ب هزاران كه‌س پارێن خوه‌ دكه‌نه‌ سه‌هم و پشكداریێ تێدا دكه‌ن و ل دیڤ سه‌همێ خوه‌ قازانجێ وه‌ردگرن، ئه‌ڤ چه‌نده‌ نه‌كاره‌كێ ب زه‌حمه‌ته‌ به‌لكو پێدڤییه‌ حكومه‌تژى یاسایه‌كێ ده‌ربكه‌ت كو رێك ل وه‌لاتیان بهێته‌ ڤه‌كرن پشكداریێ د دروستكرنا پرۆژێن مه‌زن و كاریگه‌ر بكه‌ن بۆ هندێ ئه‌ڤ وه‌لاته‌ ژ بێكاریه‌كا رازیكه‌ر به‌ره‌ڤ جیهانا كاركرنێ و به‌رهه‌مئینانێ بچیت و ئه‌گه‌ر سیسته‌مه‌كێ پێشكه‌فتى هه‌بیت و وه‌لاتى دلنیا بن كو پارێن وان ناچن ب پشت راستیڤه‌ دێ به‌شدارى كارێن مه‌زن بن هه‌م مفا بگه‌هیته‌ وان و حكومه‌تێ ژى.
ل دوماهیكێ گه‌له‌ك یا گرنگه‌ وه‌لاتى بزانن دێ پارێن خوه‌ چاوا ل بازارى مه‌زێخن و كا چ تشتێ پێدڤیه‌ بكرن، نه‌ك هه‌ر تشتێ وان ڤیا بكرن و نابیت بازرگانژى ب بهانه‌یا بازارێ ئازاد وه‌لاتیان ب ریچكینن و نابیت حكومه‌ت بهێلیت بازرگان وه‌لاتیان بریچكینن و یا گرنگه‌ حكومه‌ت بازارى ب ته‌مامى كونترۆل بكه‌ت.