بۆچی راکرنا پاشکەفتا موچەی ب دلێ گۆڕان نەبوو؟
کارزان فەقێ
ئه‌و روودانێن ل كوردستانێ چێدبن، هه‌ر حزب و ل گۆرى خواست و به‌رژه‌وه‌ندیا خوه شرۆڤه‌كرنێ بۆ دكه‌ت، ب هه‌مان شێوه‌یێ وان تێكستێن ئایینى یێن ده‌ما رێكخراوه‌كا توندره‌و ل گۆر پێدڤى و به‌رژه‌وه‌ندا خوه ته‌فسیرێ بۆ دكه‌ت و به‌روڤاژى رێكخراوه‌كا میانره‌و گۆتنه‌كا جوداتر هه‌یه، لێ ئه‌وێن ئه‌م ل كوردستانێ دبینین پرسێن گرێداى ژیان و ژیارا خه‌لكینه، نه‌ك مژارێن هزرى و ئۆلینه، له‌ورا بۆ بریاردانێ و چێكرنا باوه‌ریێ ل ده‌ف خه‌لكى ب ساناهى تره، بۆ نموونه ئه‌گه‌ر فرۆتنا كه‌ركوكێ شه‌رمزارى بیت، ب هه‌مان شێوه ئه‌و پارتا كو كه‌ركووكێ ڤه‌دگه‌رینیت، دێ شانازیه‌كێ بخوه تۆماركه‌ت، هه‌روه‌سا ئه‌گه‌ر چێبوونا قه‌یرانا دارایی و دانانا سیسته‌مێ پاشكه‌فتا مووچه بۆ حزبا ده‌ستهه‌لاتدرا جهێ روو ره‌شى و شه‌رمه‌زاریێ بیت كو هه‌موو ده‌ما ب تنێ پارتى و سه‌رۆكێ حكومه‌تا هه‌رێمێ پێ هاتیه تۆمه‌تبار كرن، پا ئه‌ز دبێژم ل ده‌مێ د قۆناغا ئێكێ گهۆرین د پاشكه‌فێ دا كری ده‌ستكه‌فت بوو و لده‌مێ ب ئێكجارى سیسته‌مێ پاشكه‌فتا مووچه‌یێ فه‌رمانبه‌ران هه‌لوه‌شاندى شانازیه‌كا مه‌زنتر بوویه بۆ پارتى. هه‌لبه‌ت ل ڤێرێ ده‌ما هه‌موو حزبێن دى كو دبێژن نابیت ئه‌ڤ پرسه ببیته موزایه‌ده چونكى مافێ فه‌رمانبه‌رانه، گرنگه ئه‌م روودانین وى ده‌مى ل بیرا خوه بینین ده‌ما قه‌یران چێبووى و پشتى ڤێ یه‌كێ ژى نه ب تنێ دخواستن قه‌یران وه‌كو خوه بمینیت، به‌لكو پێشنیارا هه‌موو ڤان حزبێن دى ئه‌و بوویه نابیت به‌غدا ئیدى هیچ بره پاره‌یه‌كێ ب رێكا حكومه‌تا هه‌رێمێ بۆ فه‌رمانبه‌ران ره‌وانه‌بكه‌ت، به‌لكو ده‌ما وان خوه وه‌كو ئالیێن نه‌رازى ناڤكرى؛ ئه‌و شیره‌ت ل به‌غدایێ دكر كو پێدڤیه وه‌كو پارێزگه‌هێن دى سه‌ره‌ده‌رى ل گه‌ل پارێزگه‌هێن هه‌رێمێ بهێته كرن نه‌ك ل گه‌ل قه‌واره‌یێ حكومه‌تا هه‌رێمێ. ئێك ژ وان حزبان ژى بزاڤا گۆران بوو كو نها خوه‌دان رێكه‌فتنه‌كا سیاسى یه ل گه‌ل پارتى یا دیموكراتى یا كوردستان، هه‌لبه‌ت ئه‌و رێكه‌فتنا گۆران و پارتى نه ژ بۆ ڤێ كابینا حكومه‌تا هه‌رێمێ یه كو نێچیرڤان بارزانى سه‌رۆكاتیا وێ دكه‌ت، به‌لكو ئه‌و رێكه‌فتن بۆ كابینا نه‌هێ یه كو هێشتا بزاڤێن پێكئینانا وێ به‌رده‌وامن، كه‌واته، گۆران گه‌له‌ك حه‌زا وى ئه‌و بوویه ل ده‌مێ ئه‌و دچیته‌ڤه ناڤا حكومه‌تێ ژنوو ئه‌و ئاریشه‌یێن دارایی یێن خه‌لكێ كوردستانێ بهێنه چاره‌كرن ژ بۆى وى ده‌مى وه‌ها بهێته شرۆڤه‌كرن كو ئه‌ڤه ده‌ست كه‌فته بۆ وان، چونكى ئه‌ڤه مه‌رجێ گۆران بوو بۆ پێكئینانا حكومه‌تێ، لێ سه‌رۆكێ جڤاتا وه‌زیرێن هه‌رێمێ خوه ل به‌ندا وى ده‌مى نه‌گرت و هه‌ر ده‌ما رێكه‌فتنا كابینه‌یا وى ل گه‌ل به‌غدا ل دۆر پشكا هه‌رێمێ د بۆدجه‌یا ئیراقێ چوویه د بیاڤێ بجهـ ئینانێ دا و به‌غدا پاره‌ی پێدڤیێ موچه‌یێ فه‌رمانبه‌ران هنارتى، بارزانیێ سه‌رۆك وه‌زیر ب ئه‌ركێ ڤێ كابینێ دیت كو وى سیسته‌می هه‌لوه‌شینیت. كه‌واته بۆ كابینا بهێت هیچ تشته‌ك دده‌ستێ گۆرانێ دا نه‌هێلا ژ بۆ موزایه‌ده‌كرنێ، به‌لكو ب باوه‌رم گۆران و حزبێن دى جاردن دێ ڤه‌گه‌رنه‌ڤه وان درۆشمێن ده‌مێ چێبوونا ئۆپۆزسیۆنێ و دابینكرنا موچه‌یێ كابانا مالێ. بەلگە بۆ ڤێ یەکێ ژی سەرنجا پۆستێ عەلی حەمە سالح ل فەیسبۆکێ بدەن كو پشتى زانى حكومه‌تا هه‌رێمێ دێ د رۆژا هه‌ینى و د بهێنڤه‌دانێ سیسته‌مێ پاشكه‌فتا مووچه‌ى هه‌لوه‌شینیت، ئێكسه‌ر ل فێسبۆكێ باس ل وێ یەکێ کر كو راکرنا پاشکەفتێ مووچه‌ى مەرجێ وان بوویە، لێ نەگۆتیە مەرجێ گۆڕان بۆ کابینا نوو بوویە، کەواتە پارتی سیحرا بزاڤا گۆران بەتالکر و دگەل بریارا هنارتنا پشکا هەرێمێ ژ بۆدجەیا ئیراقێ؛ ئەو سیستەم هەلوەشاند.. کەواتە ئەڤ بریارە ب دلێ بزاڤا گۆران نەبوو، چنکی گۆڕانێ دخواست لگەل ڤەگەریانا وان بۆ ناڤ حکومەتێ ژنوو ئەو بریار هاتبا دان.
