راسته د گۆتارا خوه یا جێواز دا نێچیرڤان بارزانی سه‌رۆكێ حوكمه‌تا هه‌رێما كوردستانێ گه‌له‌ك ب سه‌رگه‌رمی رۆلێ ملله‌ت ب گشتی ب باشی هه‌لسه‌نگاند و گۆت كو ملله‌تێ ده‌ستێ حوكمه‌تێ گرت و ل وان رۆژێن نه‌خۆش ته‌حه‌مول كر، ب نیڤ مووچه‌ی و ب پاشكه‌فت و گرانی و قه‌یران، به‌لێ مرۆڤ هه‌كه چاڤێ خوه ل هنده‌ك راستیان نه نقینیت، هنده‌ك تشتێن به‌ره‌ڤاژی مه دیتن و گوه لێبوون، ل ده‌سپێكا قه‌یرانێ ژبلی شه‌رێ حه‌شدا سه‌عبی ب سه‌ر مه‌داهاتی و بووین بێهنته‌نگی، گه‌له‌ك ره‌خنه هاتنه ئاراسته‌كرن ژ هنده‌ك حزبان و ژ هنده‌ك خه‌لكێ پالڤه‌دای ژ لایێ وان حزبان ڤه، مرۆڤی هه‌ستكر كو كاك نێچیرڤان یێ مایه بتنێ و ژبلی یێن كه‌یف پێ هاتی كو پارتی بهژیێت و چه‌ندی بهێته ئازاردان بۆ وان باشبوو، سه‌ر هندێ را ژی بزاڤێن وی دگه‌رم بوون و بۆ خۆله‌كه‌كێ ژی بێزار و بێ مۆرال نه‌بوو، دزانی كو ئه‌وی و مالبات و حزبا وی باشی د رابردویێ خوه دا یا چاندی هه‌ر دێ وێ باشیێ و چاكیێ هه‌لینن و به‌رهه‌مئینن، چونكو ئه‌و تۆڤێ وان چاندی یێ خومالی یه، ئه‌و ژی ئیراده‌یا گه‌ل زێده‌باری خه‌بات و خوین و خوه‌ه و قوربانیدان، ئه‌ڤه ژی قانوونا دونیایێ یه و هه‌موو ئاینێن ئه‌سمانی ژی داكۆكیێ ل سه‌ر دكه‌ن، ژلایه‌كێ دی ڤه، مه‌رجه‌عێ وی و یێ كوردستانێ كه‌سه‌كێ مه‌زنه، مسعود بارزانی چه‌ندێ مه‌زن بوو، ده‌ست ژ پۆستێ سه‌رۆكاتیێ به‌ردا مه‌زنتر لێهات و هه‌موو ئه‌و كه‌سێن ره‌خنه لێ دگرتن بێده‌نگ كرن و ده‌ڤێ وان یێ نه‌ساخ هاته گرتن و گۆتنه‌كا جوان ل ڤێره دهێته بیرا من كو ل سه‌ر سۆشیال میدیایێ به‌لاڤبوویه،"ته منه‌ت ب پۆستێ سه‌رۆكاتیێ نینه ، به‌لكو پۆستێ سه‌رۆكاتیێ منته‌ت ب ته هه‌یه"، ب دروستی ژی وه‌سا هاته سه‌لماندن.
ئه‌ڤجا نها مه نه‌ڤێت ئه‌م برینێن كه‌ڤن نووكه‌ینه ڤه كا ل شوونا هندێ ڤان حزبێن كوردی پشته‌ڤانكربا و ملێ خوه دابا به‌ر وێ مه‌حنه‌تا ب سه‌ر نێچیرڤان بارزانی، رابوون خه‌نجه‌ر ل پشتێ دان، و گرۆڤه ژی رۆندكێن پێشمه‌رگه‌ی بخوه بوون یێن ب سه‌ر وان حزبان ڤه، به‌لێ پشتی ڤه‌بوونا گرێكان چاوا یێن دبنه ملحه‌م؟! و كه‌س نه‌زانیت كی بوو خوه‌دانێ كریارا چه‌په‌ل؟!. یا گرنك ئه‌وه مزگینیا نێچیرڤان بارزانی دێ دلێ خه‌لكی خۆشكه‌ت، به‌لێ هێشتا خودانێن ره‌خنه‌یان یێن به‌هانان دگه‌ریێن و ب دهۆلا وی دا بقوتن، هه‌لبه‌ت پتریان وان ره‌خنه‌گران ژی ئه‌ون یێن موسته‌فید، چونه كه‌ن و چو به‌رهه‌می نه‌گه‌هیننه وه‌لاتێ خوه ژ بلی تێكدانێ و خوه شه‌ریفكرن ل سه‌ر نڤیسه‌ره‌كێ هه‌ژار یێ بخوازیت راستیان بده‌ته دیاركرن وه‌كو وژدان و رێیا خودێ، دێ بێژنێ متمه‌لق!. واته یێ به‌رگریا ژ سه‌میانێ نه‌كه‌ن؟ نانێ خوه حه‌لال نه‌كه‌ن، مادبیت بابێ ته نانی بده‌ته ته و تو به‌را بهاڤێژیێ؟! یان مه‌لاقی ئه‌وه مرۆڤ دزیا بكه‌ت و ب دهولا بابێ خوه داده‌ت و چو كه‌سپا نه‌كه‌ت ژبلی ئاخفتنێن نه ل هه‌ژی ره‌وشت و نه‌ریتێن ڤی مله‌تێ ره‌سه‌ن؟!
شێرزاد نایف
