چل سال دووری تە ، لێ دگەل تە و لسەر رێبازا تە
March 3, 2019
وتار و بیروڕا
لێ ئەوا مرۆڤ پێ دلخۆش پشتی بوورینا چل سالا بسەر وەغەرا ڤی رێبەرێ مەزن ، ھێشتا رێبازا وی نە تنێ زیندی مایە ، بەلکی بەردەوام د گەشەبوونێ و بەرفرەھبوونێ دا و پێشەنگا بزاڤا رزگاریخوازیا گەلێ کوردە و بۆیە قوتابخانا شۆرەشگێریێ و نەتەوایەتیێ و وەلات پارێزیێ و ئاڤەدانیێ و ئێمناھیێ و پێگەھاندنا رێبەر و سەرکردێن کاریزما . زۆر ژ دەروێش و پەیڕەوێن ڤێ رێبازا پیرۆز ب گیان و ھەستێ سەردەمێ شۆرەشا مەزنا ئیلۆنێ ، خەباتێ بۆ بدەستڤەئینانا ئارمانجێن وێ رێبازێ دکەن ، نفشێ نھۆ ژی دزانیت پارتی و رێبازا پیرۆزا بارزانی نەمر ، فاکتەرێن بدەست ڤەھاتنا دەسکەفتێن مە یێن نەتەوی و نشتیمانی نە و ھەر ئەوژی دپارێزن و پێشڤە دبەن .
مینا سەردەمێ تە تەحەددایا پیلان و بەرنامێن خیانەتکار و داگیرکارا دکەن و ب فەلسەفا رێبازا بارزانی نەمر ب ئێمناھی و باوەری بخۆ بوونێ بسەر وان بسەردکەڤن و دەسکەفتێن کوردستانێ زێدەتر و مەزنتر دکەن و ئارامیێ و بەختەوەری دابین دکەن .
ئەگەر پەیڕەوێن رێبازا بارزانی نەبان بەرھەمێ سەرھەلدانا ١٩٩١ پەرلەمان و حکومەتا ھەرێما کوردستانێ نەدبو ، ئەگەر پێشەوایێ رێبازا بارزانی نەمر سەرۆک مەسعود بارزانی نەبا ھەلبژاردن و ئازادی و دیموکراسی و پاراستنا ھەرێمێ و ڕاپرسیا سەرخۆبوونا کوردستانێ نەدبوون ، ئەگەر دەولەتمەدا نێچیرڤان بارزانی نەبا شەپۆلێن ئاڤەدانیێ دبەردەوام نەدبوون و پیلانێن خیانەتکارێن شازدێ ئکتۆبەرا ٢٠١٧ بۆ داگیرکرن و ژناڤبرنا قەوارێ ھەرێما کوردستانێ دا سەرگرن و گەماروویێن ئابووری و سیاسی لسەر ھەرێمێ نەدھاتنە شکەستن ، نێچیرڤان بارزانی ب پەیرەوکرنا سیاسەتا بارزانی نەمر یا دووربین و ھێمن شیا چەندین کەناڵێن دبلۆماسیەتێ بۆ بھێزکرنا کوردستانێ ڤەکەت و کوردستانێ ل مەزنترین پیلانا ھەرێمی رزگار بکەت و ھەولێرا پایتەخت بکەتە قیبلەیا دبلۆماسیەتێ ل رۆژھەلاتا ناڤین و دوژمن و نەیارا بکەتە دوست و کوردستانێ بکەتە گزیرتەکا ئارام دناڤ ڤولکانەکا ئاگرین دا . چەوا جیھان ب سەرکەفتن و کاریزمایا بارزانی نەمر حیبەتی بوو ، ئەڤرۆ ژی جیھان ب سیاسەت و دبلۆماسیەتا سەرۆکێ حکومەتا ھەرێما کوردستانێ حیبەتی مایە و خەلکێ کوردستانێ زێدەتر لدوور پارتی و رێبازا بارزانی نەمر کۆم کریە ووڕە و باوەریا وان ب پاشەرۆژا کوردستانێ بلند و بھێز کریە .
راستە چ ساڵە خەلکێ کوردستانێ ڕۆندکا ب وەغەرا بارزانی نەمر درێژیت ، لێ بجە ھاتنا پشکەکا ھیڤی و ئارمانجێن بارزانی نەمر و گاڤێن بەرەڤ بجە ھاتنا ئارمانجێن دیتر لسەر دەستێ پێشەنگ و پەیڕەوێن رێبازا وی گرنژین لسەر لێڤێن خەلکێ نشتیمان پەروەرێ کوردستانێ درۆست کریە ، چونکی دزانیت رحا بارزانی نەمر ب گەھشتنا خەلکێ کوردستانێ ب مافێن خۆ یێن نەتەوی و نشتیمانی شاد دبیت .
لەوما خەلکێ کوردستانێ ئەڤ رێبازە وەکی رێکا ئازادی و رزگاریا کورد و کوردستانێ ھەلبژارتیە و دێ لسەر بەردەوام بیت ھەتا بدەست ڤەھاتنا ئارمانجێت دووماھیێ و باوەری پێ ھەیە .