ھەر ل دەرکەفتنا نێچیرڤان بارزانی وەک وەک سەرکردە دناڤ پارتی دیموکراتی کوردستان دا ، ل بوھار لاوینیێ دا سەرکردەکێ دیموکرات خواز و ھێمن و مینار ڕەو بوویە ، ھەردەم فاکتەرێ ئێکرێزیا نشتیمانی بوویە ، خۆ دوور گرتیە ل رەفتار و داخۆیانیێن توند و شکەستێ لایەنێ بەرامبەر د بەرتەنگترین کاودان دا . پشتی سەرھەلدانا گەلێ کورد ل باشوور روولێ وی وەک سەرکردەکێ گەنێ بلیمەت و دووربین بەرچاڤ بوویە .
پارتی دیموکراتی کوردستان و ئێکەتی نشتیمانی کوردستان پارتیێن سەرەکی و کاریگەر بوونە د گۆرەپانا سیاسی یا کوردستانی دا ، زۆر جاران ھەڤپەیمانی و ئاڵۆزی دناڤبەرا واندا درۆست بوونە ، نێچیرڤان بارزانی لدەمێ ھەڤپەیمانیا مینا بابێ خۆ یێ رەحمەتێ ، ئەندازیارێ ئاشتیا ناڤخۆیی شەھیدێ ھەردەم ساخ ھەردەم ھەوڵ دایە ، ئەڤ ھەڤپەیمانیە و ئێکگرتنە د بەردەوام بن خۆ پێشڤەبرنا دوزا سیاسی و جڤاکی یا کوردستانی ، لدەمێ ناکۆکیان ژی ھەردەم رۆلەکێ کاریگەر ھەبوویە بۆ تەشەنە نەکرنا قەیران و ناکۆکیێن دناڤبەرا وان دا ، ھەر ل شەرێ ناڤخۆیی یێن ناڤەراستا سالێن نەوەتان دا بگرە ھەتا نھو .
پێکڤە برێڤەبرنا ھەمی کابینێن حکومەتا ھەرێمێ ژلایێ پارتی و ئێکەتیێ ب کێمترین ئاڵۆزی ، نەخاسمە وان کابینێن بسەرۆکاتیا نێچیرڤان بارزانی ، ژ بەر کاریگەریا جەنابێ وی بوویە .ژبلی ڤێ چەندێ روولێ نێچیرڤان بارزانی بۆ چارەکرنا قەیرانێن ناخۆیێن ئێکەتیێ ، دیسان روولەکێ مەزن بوویە .
پشتی خیانەتا بالەکێ ئێکەتی نشتیمانی ل شازدێ ئکتۆبەرا سالا ٢٠١٧ و ئەو دربا گران ب خیانەتا وان ل گەلێ کورد و ئەزمۆنا سیاسی یا کوردستانێ کەفتی ، ھەر ل داگیرکرنا کەرکووکێ و بڕینا بۆدجە و مۆچێ ھەرێمێ و ئینانا لەشکرێن بیانی بۆ نەڤبرنا قەوارێ ھەرێما کوردستانێ و ھەلوەشاندنا حکومەتا ھەرێما ب سەرۆکاتیا نێچیرڤان بارزانی . قەیرانێن مەزنتر دروست کرن و گەماروویێن سیاسی و ئابووری و ئاسمانی لسەر کوردستانێ سەپاندن . نێچیرڤان بارزانی چ جار پەنا نەبرە بەر ھەول و داخۆیانیێن زڤر بۆ تەشەنەکرنا زێدەتر پەیوەندیێن دناڤبەرا ھەردوو ئالیان ، ڤێ سەرکردە و رێبەرێ زانا و دووربین ، ڤێ جارێ ژی ب ھێمنانە و سیاسەتەکا نەمر سەرەدەری دگەل ڕەوشێ کر و شیا لدەمەکێ کێم دا ھەرێما کوردستانێ لڤان قەیران و ئاستەنگان دەرباز بکەت و سەرەدەیەکا نشتیمانیانە و برایانە دگەل ئێکەتیێ کر بتایەت ئەوێن دناڤ کابینا نێچیرڤان بارزانی دا و ھەست ب دووبەرەکیێ نەھاتە کرن .
ئەڤ روولەژی ب ھەمی کەسان ناھێتە کرن ، نھو ژی پشتی ھەلبژاردنێن پەرلەمانێ کوردستانێ ل ( ٣٠ ) ێ ئیلونا ٢٠١٨ کۆ پارتی دیموکراتی کوردستان سەرکەفتنەکا مەزن بدەستڤە ئینایە و بوی بھێزتر کرنا ھەرێما کوردستانێ و پێکئینانا حکومەتەکا نشتیمانی ، پارتی دیموکراتی کوردستان زێدەتر ل چار مەھایە چاڤەرێ حزبێن دیتر یێن سەرکەفتی بۆ خۆ ئێکلاکرنێ د پشکداریا کابینا نوو دا ، ھەتا نھو ئێکەتیێ نەشیایە خۆ ئێکلا بکەت چ ژبەر ناکۆیێن ناڤخۆیی یان ژی داخازیێن وان یێن زێدەتر ل بەرکەفتیێن خۆ یێن ھەلبژاردنا و پێکڤە گرێدانا بابەتێن کەرکووکێ و عیراقێ ژلایێ ئێکەتیێ .
زێدەتر گیرۆبوونا ھەلبژاردنا دەستەیا سەرۆکاتیا پەرلەمانی و پێکئینانا کابینا نوو یا حکومەتا ھەرێما کوردستانێ دبەرژەوەندا ھەرێمی دا نیە ، لەوما پشتی چەندین کۆمبوونان دگەل ئێکەتیێ پارتی ب پرانیا پەرلەمانی نەچار بوو سنوورەکی بۆ ڤێ گیرۆبوونێ دانێت . دیارە ئێکەتی ڤێ چەندێ ب تۆلڤەکرن ھژمار دکەت و دەنگۆیێ دوو ئیدارەیێ و شەرێ ناڤخۆیی لسەر ئاستێ جادێ ھەیە ژلایێ ئێکەتیێ . لێ باشترە ئێکەتی بۆ خۆ لڤێ ھزرێ دوور بکەت چونکی ئەڤ سەردەمە بسەر چوویە نە خەلکێ کوردستانێ نەژی خەلکێ سلێمانیێ بۆ وێ پاشکەفتنێ دزڤریت . ژلایێ دەستووری ژی چ لایەن نەشێن د چارچۆڤێ پارێزگەھەکێ دا ھەرێمەکێ رابگەھینیت و ئەڤ چەندە د بەرژەوەندا سازیێن نیڤ نەتەوی و ھەرێمی ژی دا نیە و پشتەڤانی لێ ناھێتە کرن ، نەژی ئێکەتی ل جڤاتا پارێزگەھێ پارێزگەھا سلێمانیێ پڕانیە کۆ بشێت ڤان رەنگە گاڤان بھاڤێژیت . یا باشتر بۆ ئێکەتیێ ئەوە گۆھداریا نێچیرڤان بارزانی بکەت ، کۆ بریارە ڤان نێزیکا سەرەدانا وان بکەت بۆ چارەکرنا پرسێن نافخۆیی و بەرچاڤ بوونا روولێ وان دکابینا نوو یا ھەرێما کوردستانێ .
ئەگەر ئێکەتی ھزر بکەت پێشمەرگەە لبەردەست ھەیە ، ئەڤەژی سەر ناگریت چونکی دکابینا نوودا پێشمەرگەھێ کوردستانێ دبن ھەژموونا حزبایەتی دا نامینیت و دێ بیتە لەشکرەکێ نشتیمانیێ ئیکگرتی و گاڤێن دەسپێکی یێَ نێچیرڤان بارزانی وەک سەرۆکێ ھەرێما کوردستانێ دێ ئێکگرتنا پێشمەرگەھی بیت و لسەر دەستێ وی پەیوەندیێن ھەرێما کوردستانێ دگەل عیراقێ و جیھانێ دێ زۆر پێشڤە چن و بیتە ھەرێما چەسپاندا یاسایێ ب سازیکرنا دام و دەزگەھا و پاراستن و بھێزتر کرنا قەوارێ ھەرێما کوردستانێ ژلایێ سیاسی و کارگێری و ئابووری . ئەو نێچیرڤان بارزانیێ قەیرانێن پشتی شازدێ ئکتۆربەرێ بسەرفیرازی دەرباز کری ، ھەر قەیرانەکا دیترا ئەو درۆست دکەن ب ساناھی تر دێ دەرباز کەت .