ئه‌م یێن ل سه‌رده‌مه‌كی كه‌س ب كه‌سێ نینه و كه‌س ژی خوه ل كه‌سێ ناكه‌ته خوه‌دان، قه‌یرانا باوه‌ریێ یه تایبه‌ت ژی ژلایێ ده‌سهه‌لاتان، ب تنێ ئه‌م كورد تێنه‌بین، ئه‌ڤجا چو حوكمه‌ت و چو ملله‌ت، میناك ل ده‌مێ خوه‌دێ نه‌كه‌ت روودانه‌كا مرنێ چێدبیت، هه‌موو كه‌سوكار و خه‌لك خوه ب خوه‌دانێ وی كه‌سێ وه‌غه‌ركری دزانن، لێ ل گه‌له‌ك وه‌لاتان كه‌س نینه مرۆڤی بڤه‌شێریت، كاكلا نه‌ته‌وا مه ژی وه‌كو ره‌سه‌ناتی ئێزدینه، و راسته هنده‌ك لایه‌نێن بیانی جاران وه‌كو مزایده ل هه‌ستا نازك دده‌ن و برینا وان یا نوو هه‌لدكۆلن، ڤی لایه‌نی و یێ دی دكه‌نه قوربان، به‌لێ بۆ هندێ مفایه‌كێ سیاسی بۆ خوه بهاڤێژنه سه‌ر، به‌لێ مه دیت ل پێشوازیكرنا جه‌نازه‌یێ پیرۆزێ میرێ ئێزدیان ته‌حسین به‌گ، مه زانی كا ژكیستێ كێ چوو و ئه‌و ده‌ربرینا سه‌رۆك وه‌زیران نێچیرڤان بارزانی چه‌ندا مۆرالی و راستی بوو، چونكو خۆیایه كو میر ئێك ژ شۆره‌شگێرێن كورد بوو د سه‌رخستنا بزاڤا رزگاریخوازا كوری و تایبه‌ت ژی یا بارزانیان، خوه سه‌رۆك وه‌زیران د گۆتارا خوه ژی دا ئاماژه پێ دا كو به‌رهه‌ڤیا وی ل شۆره‌شا ئیلۆنێ ی پێشچاڤ بوو، چه‌ند نه‌خۆشی دژیانا خوه دا دیتیه و درێره‌وا ئازادیێ و سه‌ربه‌ستیێ دا، كو ژ ئه‌نجامێ هاتیه ده‌سته‌سه‌ركرن ژ لایێ حوكمه‌تا عیراقێ ڤه سالا 1959 ب ده‌ستێن ئه‌فسه‌ره‌كێ عه‌ره‌ب ب ناڤێ عه‌بدولوه‌هاب ئه‌لشه‌واف ل مووسل و پشتی هینگی بۆ ژێریا عیراقێ هاتیه نه‌فیكرن، ل عماره و دیوانیه و ل به‌غدا ب زۆری هاتیه ئاكنجیكرن، ئه‌ڤ چه‌نده د ویكیپیدیا یا گۆگلێ ژی دا هاتیه ئاماژه‌پێكرن، هه‌لبه‌ت پشتی هینگی ژی ژلایێ مسته‌فا بارزانی ڤه هاته ئازادكرن، پشتی كو په‌یوه‌ندی ل گه‌ل ده‌سهه‌لاتا به‌غدا نه‌رمتر لێهاتی، چونكو سه‌ركرده‌كێ دلسۆز بوو بۆ كوردینیا خوه و خه‌باتا خوه، به‌رده‌وامی دابوو وێ خه‌بات و تێكۆشانا خوه، هه‌تا كو سالا 1970 كاروبارێن د ناڤبه‌را به‌غدا و بزاڤا كوردی دا ئارام بووی، هه‌تا 1975 ژی مابوو ل وه‌لاتێ خوه، پشتی هینگی قه‌ستا ده‌رڤه‌ی وه‌لاتی كری و پشتی سه‌رهلدانێ جاره‌كا دی ژی قه‌ستا كوردستانێ و خه‌لكێ خوه دكه‌ت ما سه‌ربه‌رز و جهێ ته‌قدیرێ و رێزلێنانێ ل ده‌ف حوكمه‌تا هه‌رێما كوردستانێ. ئه‌و خه‌مێن خوه یێن خه‌لكێ خوه بۆ كه‌سێ نێچرڤان بارزانی هێلان و وه‌غه‌را دووماهیێ كر، له‌ورا نێچیرڤان بارزانی ئاماژه ل ده‌سپێكا گۆتارا خوه دا كو ده‌روونا مه ئارام نابیت حه‌تا كو دووماهی ئێزدی ژی بزڤرینینه ڤه ژ ده‌ستێ تیرۆستێن داعش یێن پیلانا خرابیێ بۆ مله‌تێ مه‌ئینایی و خرابی ل دووڤ خوه دا هێلای. ل دووماهیێ ژی دیاربوو كو لایه‌نێ راست بسه‌ركه‌فت و یێ خراب شكه‌ست. ئه‌ڤجا خه‌ونا مه هه‌میان بوو كو پویته ل شنگارا بریندار بهێته دان، به‌لێ یا راست وهه‌ژی گۆتنێ ئه‌وه یا نێچیرڤان بارزانی پێشكێشكری د وێ گۆتارا خوه دا. ب راستی سپرایزه‌كا نه‌چاڤه‌رێكری بوو، خوه خه‌لكێ شنگالێ ب خوه باوه‌رنه‌دكر، و دێ بینین ژی به‌رهه‌مێ وان ده‌رده‌سه‌ریێن مه‌زنێن خه‌لكێ مه تووش بوویێ بهێته قه‌ربۆكرن و مۆزائیكا وێ جاره‌كا دی بهێته ڤه‌ژاندن.
شێرزاد نایف
