ئه‌گه‌ر ئه‌م به‌رێ خوه‌ بده‌ینه‌ په‌یوه‌ندیێن وه‌لاتان ل سه‌ر بنه‌مایێن به‌رژه‌وه‌ندیێن هه‌ڤپشك هاتینه‌ دارێژتن و ئه‌ڤ په‌یوه‌ندییه‌ بووینه‌ ئه‌گه‌رێ خوشكرنا ژیانا وه‌لاتیان و گه‌شه‌كرنا وه‌لاتان، لڤێره‌ خالا هه‌رى گرنگ ئه‌وه‌ ئه‌م باسێ په‌یوه‌ندیێن كوردستانا باشۆر دگه‌ل حكومه‌تا عیراقێ بكه‌ین كو په‌یوه‌ندیێن دوور و درێژن و چه‌ندین جاران ئه‌ڤ په‌یوه‌ندییه‌ گه‌هشتینه‌ بلندترین ئاست و دژوارترین و هه‌رده‌مێ په‌یوه‌ندیێن هه‌رێما كوردستانێ و به‌غدا دگه‌ل ئێك د خوه‌ش بن ژیانا وه‌لاتیان ژى د ئاسته‌كێ هه‌رى بلند و خوه‌ش دابوویه‌ و عیراقه‌كا ئارام و بێ كێشه‌ و ئاریشه‌ بوویه‌.
نابیت ئه‌م ژ بیر بكه‌ین هه‌رده‌مێ په‌یوه‌ندیێن هه‌رێمێ و به‌غدا تێكبچن و كورد داخازا جودابوونێ بكه‌ن و یان مافێن خوه‌ بكه‌ن وه‌لاتێن ئه‌قلیمى و جیران مایتێكرنێ د ناڤخوه‌یا عیراقێ دا دكه‌ن و ئه‌ڤ چه‌نده‌ژى ل ده‌مێ كرنا ریفراندومێ ب رووهنى هاته‌ دیتن و پشتى هنگى روودانێن 16ى ئۆكتۆبه‌رێ ئه‌و چه‌نده‌ دوپاتكر، هه‌ر ژ به‌رهندێ یا گرنگه‌ حكومه‌تا عیراقێ باش هزرا خوه‌ بكه‌ت چ عیراق د ئارام و ته‌نا نابن ل ده‌مه‌كى كورد بهێنه‌ بێبه‌هركرن ژ مافێن وان.
هه‌روه‌سا یا گرنگه‌ ئه‌م باش به‌رێ خوه‌ بده‌ینه‌ روودانێن پشتى 16ى ئۆكتۆبه‌رێ كو چه‌ندین بزاڤێن دبلۆماسى یێن سه‌ركه‌فتى ژ لایێ حكومه‌تا هه‌رێما كوردستانێ ڤه‌ هاتنه‌ هاڤێتن وه‌كو بكارئینانا رێكێن دبلۆماسى و چوونا سه‌رۆكێ حكومه‌تا هه‌رێما كوردستانێ بۆ چه‌ندین وه‌لاتان وه‌كو فره‌نسا و ئیران و ئه‌لمانیا ئه‌ڤ هه‌موو بزاڤه‌ بوونه‌ رێخوشكه‌ر بۆ هندێ جاره‌كا دیتر ره‌وشا هه‌رێمێ به‌ره‌ڤ باشبوونێ بچیت پشتى د چه‌ندین قوناغێن دژوار دا ده‌رباز بوویى.
دیسان هه‌بوونا تێگه‌هشتنه‌كێ د ناڤبه‌را حكومه‌تا هه‌رێما كوردستانێ و حكومه‌تا به‌غدا كو دوور كه‌فتن ژێك و مه‌زنكرنا ئاریشان دێ ره‌وشێ به‌ره‌ڤ خرابتر ڤه‌ به‌ت یا گرنگه‌ لێكتێگه‌هشتنه‌ك بۆ ئاریشان هه‌بیت و ئه‌گه‌ر ئاریشه‌ به‌ره‌ڤ چاره‌سه‌ربوونێ چوون و په‌یوه‌ندیێن هه‌ڤپشك ل سه‌ر بنیاتێ به‌رژه‌وه‌ندیێن هه‌ڤپشك بهێنه‌دانان دێ ره‌وشا وه‌لاتى به‌ره‌ڤ باشبوونێ چیت و ژیانا وه‌لاتیان دێ خوشتر لێهێت.
یا گرنگه‌ ئه‌م بزانین كو دێ ره‌وشا ئابۆرى یا هه‌رێما كوردستانێ به‌ره‌ڤ باشبوونێ چیت و پشتى سه‌ره‌دانا سه‌رۆكێ حكومه‌تێ و بۆ به‌غدا و راگه‌هاندنا سه‌رۆكوه‌زیرێن به‌غدا عادل عه‌بدلمه‌هدى كو دیاركر بوو نوكه‌ په‌یوه‌ندیێن به‌غدا و هه‌ولێر د ئاسته‌كێ هه‌رى باش دانه، بێ گومان ئه‌ڤ لێدوانه‌ په‌یامه‌كا جوانه‌ بۆ هه‌موو عیراقیان و وه‌لاتیێن هه‌رێما كوردستانێ كو پشتى چه‌ندین ئازار و نه‌خوه‌شى ژ ناكوكیێن هه‌ولێر و به‌غدا دیتین.
ل دوماهیكێ یا گرنگه‌ سالێن بهێن بۆ پتر پێشڤه‌برنا ئاستێ خزمه‌تگوزاریان بیت بۆ هه‌ڤ وه‌لاتیان بێى جوداهى و دیسان دابه‌شكران هه‌موو داهاتێ وه‌لاتى ب یه‌كسانى ب سه‌ر هه‌موو پێكهاته‌یێن عیراق و هه‌رێما كوردستانێ بۆ هندێ عیراق ژى ل د هنده‌ك بیاڤان دا بهێته‌ رێزێن پیشیێ وه‌كو ئاستێ ژیانێ و په‌روه‌ردێ و پاقژیێ.