حكومه‌ت و فه‌لسه‌فا وژدانى
به‌ده‌ل گابێركى
ل پرانیا وه‌لاتێن دنیایێ گرنگیه‌كا مه‌زن دده‌نه لایه‌نێ وژدانى و بزاڤێ دكه‌ن ئه‌ڤى هه‌ستى ل ده‌ڤ وه‌لاتیێن خوه په‌یدا بكه‌ن، نه‌ك وژدانێ وه‌كو هه‌سته‌ك ب تنێ ل ده‌ڤ وان بیت، به‌لكو وه‌كو كریار ره‌نگڤه‌دانا خوه د ناڤ هه‌موو جڤاكى دا هه‌بیت، بێ گومان بۆڤێ چه‌ندێ ژى كاره‌كێ مه‌زن و ب زه‌حمه‌ت دڤێت گه‌له‌ك كه‌س هه‌نه هزر دكه‌ن كو وژدان هه‌سته‌كێ تاكه‌كه‌سیى یه و چ په‌یوه‌ندى ب سیسته‌مێ حكومرانیێ نینه، ئه‌ڤه مه‌زنترین خه‌له‌تیه مرۆڤێ رۆژهه‌لاتا ناڤێن د كه‌ڤیته تێدا و ژ بیر دكه‌ت كو ئه‌وژى وه‌كو هه‌ركه‌سه‌كێ دیتر دڤێت خودانێ وژدانا خوه بیت و بۆ خاترا كه‌سێ نه‌ك بێ وژدانیه‌كێ ل كه‌سێ بكه‌ت و نه‌ك بێ ده‌نگ ببیت به‌رامبه‌رى بێ وژدانیێ.
هه‌روه‌سا ئه‌گه‌ر به‌رێ خوه بده‌ینه ئولێن جیهانى هه‌موویان گرنگیه‌كا مه‌زن دایه لایه‌نێ وژدانى، و فه‌لسه‌فا ڤێ چه‌ندێ ئه‌وه كو هه‌ر كه‌سێ گوهدارییا وژدانا خوه بكه‌ت چ جارا نه‌كه‌سێ د ئیشینیت و نه مافێ كه‌سێ دخوت و حكومه‌تێن جیهانێ ژى گرنگیه‌كا مه‌زن دده‌نه فه‌لسه‌فا وژدانى و دیار دكه‌ن ئه‌و ده‌مێ مرۆڤان ب باشى گوهداریا وژدانا خوه كرییه ل وى ده‌مى مرۆڤ ئارام بوون و هه‌ست ب به‌خته‌وه‌ربوونێ كر و حكومه‌تانژى هه‌ست ب سه‌ركه‌فتنه‌كا مه‌زن كر، ئه‌گه‌ر به‌رێ خوه بده‌ینه وه‌لاتێن پێشكه‌فتى چ سیسته‌مێن باش نه‌بوون، ب تنێ وان گوهدارییا وژدانا خوه كر پشتى كوشتنا ب ملیۆنان مرۆڤان وان باش زانى ئه‌و یێن ل سه‌ر رێكه‌كا خه‌له‌ت دچن و وان پێدڤى ب رێكه‌كا راست هه‌یه و رێكا راستژى ب تنێ گه‌هشتن و گوهداریكرنا وژدانا خوه بوو و ئه‌و ده‌نگێ بلند هه‌رده‌م ل سه‌ر هه‌ر تاوانه‌كێ و یان باشیه‌كێ مرۆڤى ب باشى ئاگه‌دار دكه‌ت.
هه‌روه‌سا حكومه‌تا هه‌رێما كوردستانێ یا گرنگه بباشى هزر د وێ چه‌ندێ دا بكه‌ت كو ئه‌و كه‌سێن گوهدارییا وژدانا خوه نه‌كه‌ن ب كێر حكومرانیێ ناهێن و دڤێت بهێنه سزادان و لادان بۆ هندێ مرۆڤه‌كێ پاقژ و دلوڤان ل كوردستانێ درست ببیت و رێزێ ل مرۆڤ و مرۆڤایه‌تیێ بگریت و حكومه‌ت دشێت ڤێ چه‌ندێ ب رێكا وه‌زاره‌تا په‌روه‌ردێ بكه‌ت زارۆكان فێرى هندێ بكه‌ن كا وژدان چیه و گرنگیا وێ چیه بۆ مرۆڤى و جڤاكى و وه‌لاتى د جیهانا سه‌رده‌م و پێشكه‌فتى دا ئاڤاكرنا وه‌لاته‌كى بێى هه‌بوونا وژدانێ كاره‌كێ ب زه‌حمه‌ت و ئه‌سته‌مه، هه‌ر ژ به‌رهندێ دڤێت ئه‌م كار بكه‌ین بۆ ئاڤاكرنا وه‌لاته‌كى نه‌یێ تژى ئاڤاهى بیت نه‌یێ تژى ترۆمبێلێن پێشكه‌فتى بیت، به‌لكو یێ تژى وژدان بیت.
ل دوماهیكێ یا گرنگه حكومه‌ت ب جدى ل سه‌ر هندێ كار بكه‌ت ب درستاهى مرۆڤان ئاڤا بكه‌ت و بۆ ڤێ چه‌ندێ ژى كاره‌كێ ب زه‌حمه‌ت و سه‌خت دڤێت، به‌لێ ل داهاتى دێ وه‌لاته‌كێ تژى رووناهى و وژدان درست بیت.
