حکومەت ل پرانیا وەلاتان خوە ل ھەموو ئاریشان دکەتە خودان و ب چ رەنگان ژ ئاریشان نارەڤیت و بزاڤا چارەسەرکرنا وان ددەت و ھەموو پارتێن سیاسی پشتەڤانیا خەلک و حکومەتا خوە دکەت ب لایەنێن رازی و نەرازی، بەلێ ھەرێما کوردستانێ ب تنێ ئەو جھە یێ کو گەلەک پارتێن سیاسی بزاڤا ھندێ دکر کو حکومەتا ھەرێم نەمینیت و بێ گومان ئەڤ ھاوکێشە یە دژی ھەموو پیڤەرێن رەوشتی یە کو تو بزاڤا ژناڤبرنا گەمیەکێ بکەی کو تو بخوەژی د وێ گەمیێ دا بژی.
حکومەتا ھەرێما کوردستانێ د چەندین قوناغێن سەخت و دژوار دا دەرباز بوو، بەلێ خالا ھەری گرنگ ئەوە کو د ڤێ قوناغا ھەستیار دا کار بھێتەکرن بۆ خوەشکرنا پەیوەندییان دگەل وەلاتێن ئەقلیمی و جیران کو ئەڤ پەیوەندییە ل سەر بنیاتێ بەرژەوەندیێن ھەڤپشک بھێنە دارێشتن گەلەک کەس و لایەن ھەبووینە چ بەرنامێن دەرەکی یان نافخوەیی کارکرییە بۆ نەھێلانا حکومەتا ھەرێما کوردستانێ یان کێمکرنا روولێ حکومەتێ د ئێکلاکرنا ھەموو ئاریشان دا، بەلێ ئەڤ چەندە ب زەحمەت کەت و ب تایبەتی پشتی روودانێن ١٦ی ئۆکتۆبەرێ، دەمێ ھەرێم کەفتیە دبن مەترسیەکا مەزن ڤە، سەرۆکێ حکومەتێ نێچیرڤان بارزانی خواندنەکا باش بۆ ھەموو روودانێن ل دەڤەرێ درست دبن کر و شیا ھەرێما کوردستانێ ژ بەلایەکا مەزن دوور بێخیت و خەونێن وان بن ئاخ بکەت یێن خەون ب کەفتنا ھەرێما کوردستانێ ڤە دیتن.
لڤێرە یا گرنگە ل سالا ٢٠١٩ێ حکومەت چەندین کارێن مەزن بکەت ببنە گەرێن گوھۆرینێن مەزن وەکو کرنا ریفۆرمان د ھەموو بیاڤان دا و دەربازکرنا پرۆژێ چاکسازیێ ئەوێ نوکە ل پەرلەمانێ کوردستانێ مایە راوەستایی یا گرنگە ئەڤ پرۆژەیە بھێتە پەسەندکرن و ل دەمێ ئەو پرۆژە بھێتە پەسەندکرن دێ ١٠٠ملیار دینار بۆ حکومەتێ ھێنە ڤەگەراندن و حکومەت دشێت ب ڤی پارەیی چەندین پرۆژێن گرنگ یێن ئابۆری و ستراتیژی بکەت د ھەموو بیاڤان دا وەکو چاندن ھەر بگرە ژ پشتەڤانیکرنا جوتیاران ب درستکرنا پرۆژێن سەردەمیانە و زانستی و فێرکرنا جوتیاران و چاوانیا زێدەکرنا بەرھەمێن چاندنێ کو ب بڕبڕا پشتا وەلاتان دھێتەدانان و دیسان ب ڤی کوژمێ مەزن یێ داھاتی حکومەت دشێت د بیاڤێ گەشت و گوزارێ چەندین پرۆژێن گرنگ بکەت وەکو درستکرنا پرۆژێن گەشت و گوزاری و نوژەنکرنا جھێن ھەری جوان یێن گەشتیاری.
ھەروەسا پێشڤەبرنا وەلاتەکی یا خوەشکرنا وی کار و ماندیبوون دڤێت ئاخفتن تشتەکە و کریار تشتەکێ دیتر و ھەردەم ئەو کەسێن د ئاخڤن گەلەک پترن ژ یێن کار دکەن و یا گرنگە د سالا نوو دا ئەڤێن کار دکەن پتر بن ژ وان یێن د ئاخڤن، ژ بەرکو چ وەلات ب ئاخفتنێن بێ کریا پێشنەکەفتینە، بەلکو پترییا ئەو وەلاتێن گەھشتینە کوپیتکا پێشکەفتنێ د ھەموو بیاڤان دا گەلەک کێم د ئاخڤن و پتر کار دکەن.
ل دوماھیکێ یا گرنگە حکومەت و وەلاتی پێکڤە کار بکەن بۆ درستکرنا پرەکا ھەڤبەش و ھەردووک و خوە ب خودانێ ڤێ پرێ بزانن.