پەروەردە ئێک بنەمایێن ھەری سەرەکی یە بۆ پێشکەفتنا ھەر وەلاتەکی و ب شاھـ دەمارا وەلاتان دھێتە ھژمارتن و ھەموو وەلات بناغ و بنیاتێ ئاڤاکرنا وەلاتەکێ پێشکەفتی ژ پەروەردێ دەست پێ دکەن و نابیت ئەڤ کەرتێ گرنگ بھێتە پشت گوھـ ئێخستن.
ل ھەرێما کوردستانێ ژی چەندین بزاڤ ھاتینەکرن بۆ پێشڤەبرنا کەرتێ پەروەردێ، بەلێ مخابن ھەتا نوکە ھەرێم نەشیایە ببتە خودان سیستەمەکێ پێشکەفتی یێ پەروەردێ و د ناڤ چەندین کێشە و ئاریشاندا د نالینیت وەکو ئاریشا ئاڤاھیان و نەبوونا سیستەمەکێ پێشکەفتی و درێژخایەن و ھەر وەزیرەکێ سیستەمەک دگەل خوە ئینایە و برییە و ڤێ چەندێ ژی کارتێکرنەکا ئەرێنی ل سەر ئاستێ زانستی یێ قوتابیان ھەبوویە.
سەرەرای چەندین کێماسیان حکومەتا ھەرێما کوردستانێ چەندین بزاڤکرینە بۆ بەرڤ پێشڤەبرنا کەرتێ پەروەردێ ئاڤاکرنا ئاڤاھیان و دامەزراندنا ژمارەکا زێدە یا مامۆستایان و خەلاتکرنا قوتابیێن زیرەک و ڤەکرنا خولان بۆ بلندکرنا ئاستێ مامۆستایان و چەندین کارێن دیتر.
نێچیرڤان بارزانی سەرۆکێ حکومەتا ھەرێما کوردستانێ پیشتر راگەھاند بوو، بۆ بەرھنگاربوونا توندوتیژیێ مە پێدڤی ب ھەبوونا سیستەمەکێ پێشکەفتی یێ پەروەردێ یە، بێ گومان ھەبوونا سیستەمەکێ پێشکەفتی یێ پەروەردێ دێ بیتە ئەگەر کو جڤاکەکێ نەساخ و تژی تەمبەلی و ئاخفتن بھێتە گوھۆرین بۆ جڤاکەکێ ھشیار و ب کریار.
یا گرنگە بزانین کو چ وەلات و چ جڤاک نەھاتنە گۆھارتن بێی ھەبوونا پەوەردەکا باش یا بەرئاقل نینە ئەم باس ل پێشکەفتنێ بکەین، بێی ھەبوونا پەروەردەکا باش، و پەروەردەکا باش ل دەسپێکێ ژ خێزانێ دەست پێ دکەت و دڤێت خێزان بھێتەھشیارکرن و کو پەروەردەکرنا زارۆکان، نەبەس دانا خوارنەکا باش و کرینا جل و بەرگایە و دەرئێخستنا زارۆکانە بۆ پارک و مولان، بەلکو یا گرنگە خێزان ب ھشیاری سەرەدەریێ دگەل زارۆکان بکەن و خوە لێ بکەنە خودان وەکو لایەنێ ھزری و ئەقلی و رەفتاری و ئاڤاکرنا کەسایەتیا زارۆکی.
دیسان بۆ ھشیارکرنا جڤاکی و نەھێلانا نەریت و رەفتارێن خەلەت ژ سالا ئێکێ یا پەروەردەکرنا زارۆکی دەست پێ دکەت، ئەرێ مامۆستا شیاینە ب ڤی رۆلی رابن یانژی ئەوژی نەشیاینە ب ئەرکێ خوە یێ راستەقینە رابن و دەمێ مامۆستا کارێ خوە درست نەکەت وەکو وی جوتیارییە دەمێ زەڤیەکێ دچینیت و پشتا خوە ددەتێ و پشتی بۆرینا دەمی دھێت و داخازا بەرھەمی ژێ دکەت و یاژنژی دەمێ پرسیار ژ سۆقراتی ھاتیە کرن کو تە چ ھیڤی ھەیە وی بەرسڤ دا گوت تاکە ھیڤیا من ئەوە دایک و باب دەمێ خوە بدەنە زارۆکێن خوە و دگەل بژن یاریان ل گەل بکەن و وان ب جوانی پەروەردە بکەن، ژبەرکو ئەز دزانم ل دەمێ زارۆکێن وان مەزن بوون ھندی پارێن وان شۆلکرین دێ بۆ پەروەردەکرنا زارۆکێن خوە مەزێخن و پاشی چێنابن ژی.
ل دوماھیکێ یا گرنگە وەلاتی و حکومەت ب ھشیاری سەرەدەریێ دگەل کەرتێ پەروەردێ بکەن و ھەموو شیانێن خوە ب مەزێخن بۆ باشتر کرنا کەرتێ پەروەردێ، ژبەرکو دەرگەھێ ھەموو سەرکەفتنا ژ کەرتێ پەروەردێ دەست پێ دکەت.