ملله‌تێن جیهانێ ب هزاران شه‌هید داینه‌ هه‌تا گه‌هشتینه‌ مافێن خوه‌ و ب ئازادیێ شادبووین هه‌ر بگره‌ ژ وه‌لاتێن رۆژهه‌لاتا ناڤه‌راست و هه‌تا دگه‌هیته‌ ئه‌مریكا باكور و باشۆر و ئه‌فریقیا ئه‌ورۆپا و چه‌ندین وه‌لاتێن دیتر ب ماندیبوون و ئێكگرتنێ و جه‌نگێن به‌رده‌وام گه‌هشتنه‌ ئازادیێ و شیان وه‌لاته‌كى بو خوه‌ درست بكه‌ن و تێدا ب خوه‌شى و سه‌ربلندى بژین.
یا من دڤێت ئاماژێ پێ بده‌م ملله‌تێ كورده‌ كو تاكه‌ ملله‌ته‌ ل رۆژهه‌لاتا ناڤه‌راست ژمارا وان دگه‌هیته‌ چل ملیونان و هه‌تا نوكه‌ دبێ خودانن و قوربانی ده‌ستێن وه‌لاتێن زلهێز و جیرانن كو هه‌ر ئێك ل دیڤ پێگه‌هـ و هێزا خوه‌ به‌رژه‌وه‌ندیێن خوه‌ ب ده‌ست خوه‌ڤه‌ دئینیت.
ئه‌و وه‌لاتێ دگوتنێ كوردستان سایكس بیكویێ كرنه‌ چوار پارچه‌ و ئه‌ڤه‌ بوو ده‌سپێكه‌كا مه‌ترسیدار ل سه‌ر ژیان و چاره‌نڤیسێ وه‌لاته‌كى كو دگوتنێ كوردستانێ، ملله‌ته‌كى كو دگوتنێ ملله‌تێ كورد، كورد و كوردستان بوونه‌ چار پارچه‌ د چه‌ندین به‌لگه‌یێن مێژوویى دا كو دیار دكه‌ن ل وى ده‌مى كوردان چ رابه‌رێن بهێز نه‌بووینه‌ كو رابه‌رییا ملله‌تێ كورد بكه‌ن و دگه‌ل به‌رژه‌وه‌ندیێن بریتانیا و فره‌نسا بگونجن، به‌لكو به‌رۆڤاژى ل چه‌ندین جهێن كوردستانێ بریتانى هاتنه‌ كوشتن ل سه‌ر ده‌ستێ كوردان بناڤێ ئایینى و چوونا به‌هشتێ و ژبلى شه‌رێ كوردان بخوه‌ژى كو دابه‌ش ببوون ب سه‌ر چه‌ندین هوزێن بچووك كو هه‌ر هوزه‌كێ بخوه‌ دڤیا و ئه‌ڤ هوزه‌، چه‌ندین جاران ژ لایێ سه‌فه‌وییان و عوسمانیان دهاتنه‌ بكارئینان ل دژى ئێك به‌رامبه‌رى چه‌ند پارچه‌یێن چه‌كى یان چه‌ند فلوسه‌كان و هه‌ر ئه‌ڤ چه‌نده‌ژى وێ چه‌ندێ دوپات دكه‌ت كو ب درێژاهیا مێژوویێ كورد ئێك نه‌بووینه‌ و چ جاران چل ملیون كوردان ئێك رابه‌ر و ئێك سه‌رۆك نه‌بوویه‌، به‌لكو هزار سه‌رۆك عه‌شیره‌ت هه‌بووینه‌ و هه‌موویان ژى چ ژ ئه‌لف و بێیا سیاسه‌تێ نه‌دزانى.
مخابن! ئه‌و ره‌وش یا به‌رده‌وام بوو و یا به‌رده‌وامه‌ژى هه‌تا نوكه‌! ده‌مێ گه‌له‌ك كه‌سان دگوت كوردان بخوه‌ خیانه‌ت ل ئێك و دوو دكر و نه‌دهێلان ئه‌و بگه‌هنه‌ مافێن خوه‌ گه‌له‌ك جارا كه‌نیا مرۆڤى دهات و زوو باوه‌رى بو مرۆڤى چینه‌دبوو، به‌لێ مخابن 16ى ئۆكتۆبه‌رێ ئه‌و هه‌موو گومان ره‌ڤاندن!
كه‌ركووك ئه‌و باژارێ ب درێژاهیا مێژووێ ملله‌تێ كورد خه‌ون پێڤه‌ دیت ب ساناهى هاته‌ فرۆتن و نابیت ئه‌و باژار بهێته‌ ژبیركرن، ژ به‌ركو ل ده‌مێ كه‌فتنا ڤى باژارى هزار برین د دلێ هه‌ر كورده‌كى دا درستكرن.
كه‌ركووك دناڤبه‌را ئه‌ڤرۆ و رابۆرى دا دێ فه‌رموون به‌رێ خوه‌ بده‌نه‌ كه‌ركووكا ئه‌ڤرۆ یا بێ ئالایێ كوردستانێ و چه‌ندین چه‌ته‌ و خوه‌فرۆش یاریان ب خه‌لكێ كه‌ركووكیان دكه‌ن و دیسان كه‌ركووكا ئه‌ڤرۆ یا بێ ئالایێ كوردستانێ و بێ ئازادییا مرۆڤێ كورد كو بۆ چه‌ندین سه‌ده‌یێن دیتر دێ هه‌ست ب هه‌موو كێماسیه‌كێ كه‌ن و كه‌ركووكا رابۆرى هه‌بوونا كه‌رامه‌ت و ئازادیێ هه‌ر كورده‌ك دشیا ب ئازادى بژیت ئالایێ كوردستانێ د هه‌ر كونجه‌كێ ڤه‌ بوو، به‌لێ مخابن 16ى ئۆكتۆبه‌رێ وه‌كو په‌له‌كا ره‌ش بوویه‌ به‌لایه‌ك بۆ كه‌ركووك و كه‌ركووكیان.
پشتى وان باردوخێن نه‌خوه‌ش یێن ب سه‌رێ كوردستانێ هاتین سه‌رۆكێ حكومه‌تێ نێچیرڤان بارزانى چه‌ندین رێكێن دبلوماسى بكارئینان بۆ ئاسایكرنا ره‌وشا كه‌ركووكێ كو جاره‌كا دیتر ژیان ل وێرێ ڤه‌ژیته‌ڤه‌ ئه‌وژى ڤه‌كرنا رێكان دناڤبه‌را هه‌ولێرێ و كه‌ركووكێ و راوه‌ستاندنا چه‌ندین زێده‌گاڤیان كو ده‌رباره‌یى مافێن كه‌ركووكێ د هاتنه‌كرن و فرێكرنا نه‌فتا كه‌ركووكێ دوباره‌ ب رێكا بۆریا كوردستانێ كو پشكه‌ك ژ داهاتێ نه‌فتێ دێ بۆ كه‌ركووكێ بیت.
ل دوماهیكێ یا گرنگه‌ هه‌ر كورده‌ك وانه‌یه‌كا باش ژ رابۆرى وه‌ربگریت و ئێدى خیانه‌تكار ب ئێكجارى بهێنه‌ شه‌رمزاركرن.