بڕیارا ڤەکێشانا هێزێن ئەمریکی ژ رۆژئاڤایێ کوردستانێ هاتە دان، بریار سوپرایز و ژ نیشکەکێ ڤە بیت یان نە، نها بابەت ئەو نینە. بابەت ئەوە ئەرێ کوردێن رۆژئاڤا چ بژاردە مانە؟ سەرکرداتییا رۆژئاڤا بۆچی پاشەرۆژا خوە وەسا چارچووڤە کربوو کو د پەیوەندییەکا تەلەفۆنی را بیت؟ ئەرێ هێزێن فرەنسا و وەلاتێن ئەورۆپی دێ شێن جهێ هێزێن ئەمریکی گرن و کوردان پارێزن؟ سەرکرداتییا رۆژئاڤا رێککەفتنەک ل گەل هەرێما کوردستانێ کربا، باشتر نەبوو ژ رێککەفتنێ ل گەل رژێما سووری؟
سەرکرداتییا هەرێما کوردستانێ و کەسێ سەرۆک مەسعوود بارزانی و سەرۆکوەزیر نێچیرڤان بارزانی ل سالێن بووری چەندین جاران داخواز ژ سەرکرداتییا رۆژئاڤا کر؛ خوە ژ پەکەکێ و درووشمێن وێ ڤەقەتینن، خوە وەک هێزێن سیاسی یێن نوو و دیمۆکرات نیشا حکوومەتا سووریێ و وەلاتێن رۆژئاڤا و رۆژهەلات بدەن، داکو بەهانەیا بسەرداگرتنا رۆژئاڤا بۆ تورکیا و چ هێزێن دی نەهێلن، لێ سەرکرداتییا پەیەدێ نەشیا وی کاری بکەت و هەر گاڤەکا تورکیا گەفێن هێرشکرنێ کربان، پەیەدە دا رێکخستنا خوەنیشاندان کەت و خوەنیشاندەر دا ب هەلگرتنا وێنەیێن عەبدوللا ئۆجەلانی ل سەر سنۆرێ تورکیا خڕڤەبن.وێنەیێ ئۆجەلانی نەکو نەشیا رۆژئاڤا بپارێزیت، بەلکو گەفا ل سەر رۆئاڤا چەندجارکی زێدەکر.
بەری ئەمریکا بڕیارا ڤەکێشانا هێزێن خوە بدەت، سەرکرداتییا رۆژئاڤا دەلیڤەیەکا دی ژی هەبوو کو تورکیا تا رادەیەکی ئارام بیت و بەهانەیێن وێ بۆ هێرشکرنێ کێم ببن، ئەوژی رێککەفتن ل گەل هەرێما کوردستانێ و دەربازبوونا پێشمەرگەیێن رۆژ بۆ رۆژئاڤایێ کورستانێ بوو، نابێژین پێدڤی بوو رۆژئاڤا ئێکسەر ل سەر وێ پلانێ رازی ببیت، لێ هەر چ نەبا، پێدڤی بوو یەپەگێ وەک چارەیەکا دەمکی هزر د بابەتی دا کربا تاکو رەوش ئارام دبوو.
نها رەوش گەهشتییە ئاستەکی، هەرێما کوردستانێ ژی نەشیت رۆژئاڤا بپارێزیت و سەرکرداتییا رۆژئاڤا دزانیت هێزێن ئەمریکی و ئەورۆپی یێن ل بۆیەرێن شازدەی ئۆکتۆبەرێ بەڕەڤانی ژ هەرێما کوردستانی یا شەرعی نەکری، بەرانبەر هێرشێن تورکیا بەرەڤانیێ ژ وان ژی ناکەن. رۆژئاڤا نها تنێ دەرگەهەک بۆ خوە هێلا، ئەوژی حکوومەتا سووریێ یە و داخوازا پاراستنا رۆژئاڤا ژ حکوومەتێ دکەت. هەرچەندە رژێما ئەسەدی دخوازیت دەستهەلاتا وێ ڤەگەڕیتە دەڤەرێن بن کونترۆلا کوردان، لێ دزانیت کورد نها نەچارن و چ رێیێن دی نەماینە، لەورا بۆ پاراستنا وان، ب چ رەنگێ دخوازیت دێ ب وی رەنگی رێککەفتنێ کەت.
گەر ل بابەتی هەمویێ ڤەگەڕین، دێ گەلەک "گەر" هێنە گۆتن. گەر سەرکرداتییا رۆژئاڤا خوە ژ درووشم و وێنە و پەیکەرێن ئۆجەلانی رزگارکربا، ل سەر چ ئایدیۆلۆژی با، رەوش نەدگەهشتە ڤی ئاستی! گەر سەرکرداتییا رۆژئاڤا ل دەستپێکێ رێککەفتن ل گەل رژێما سووریێ کربا، رەوش نە دگەهشتە ڤی ئاستی و عەفرین و دەڤەرێن دی ژی داگیر نەدبوون! گەر سەرکرداتییا رۆژئاڤا رازی ببا پێشمەرگەیێ رۆژئاڤا دەرباز ببا، بلا هەبوونا وان کارتۆنی ژی با، تورکیا ل زڤراتییا نها نەدبوو! گەر سەرکرداتییا رۆژئاڤا هەبوونا خوە ب هەبوونا هێزێن بیانی ڤە نەگرێدابا، رۆژئاڤا ب پەیوەندییەکا تەلەفۆنی ب ڤی رەنگی لاواز نەدبوو! نها ژی گەر سەرکرداتییا رۆژئاڤا نەشێت ل گەل حکوومەتا سووریێ رێککەفتنەکا باش بکەت و مافێن کوردان د چارچووڤەیێ دەستوورێ دەولەتا سووریێ یا ئێکگرتی دا گەرەنتی نەکەت، یان کورد دێ بنە بندەستێن تورکیا، یانژی وەلاتیێن نەخواستی و پشتگوههاڤێتی یێن کۆمارا عەرەبی یا سووری.