جڤاك و مرۆڤ چ جاران ناهێنه‌ ژێك جوداكرن و ئه‌وێن جڤاكى پێك دئینن مرۆڤن یا گرنگه‌ هه‌ر مرۆڤ خوه‌ ل جڤاكى بكه‌نه‌ خودان و جڤاكێ خوه‌ بگه‌هینه‌ ئاسته‌كێ هه‌رى پێشكه‌فتى د هه‌موو بیاڤان دا وه‌كو ئازادى و یه‌كسانى و پاراستنا مافان ل وه‌لاتێن پێشكه‌فتى هه‌موو كه‌سه‌ك خوه‌ ب خودانێن جڤاكى ددانن نه‌ك ئه‌ركێ پێشڤه‌برنا جڤاكى دئێخنه‌ ستۆیێ حكومه‌تێ ب تنێ و خه‌له‌تیا هه‌رى مه‌زن ل ڤێره‌ ده‌ست پێدكه‌ت ئه‌وژى ئه‌و كه‌سێن حكومه‌تێ پێك دئینن و پرێڤه‌ دبه‌ن هه‌ر ئه‌ون یێن خه‌مساریێ دكه‌ن و ب ئه‌ركێ خوه‌ رانابن و چه‌ندین كێشه‌ و ئاریشه‌ توشى جڤاكى دبن.
بۆ نموونه‌ بابه‌ك دڤێت ب باشى و جوانى سه‌ره‌ده‌ریێ دگه‌ل زارۆكێن خوه‌ بكه‌ت دڤێت رێزێ و ڤیانێ بده‌ته‌ هه‌ڤژینا خوه‌ دڤێت فێرى كاركرنێ ببیت بۆ هندێ ئه‌ڤا ئه‌ڤرۆ سوباهى جوانتر لێ بهێت و یا گرنگه‌ بزانین ب تنێ ب كاركرنێ ئه‌ڤا ئه‌ڤرۆ سوباهى دێ جوانتر لێهێت.
كاره‌ساتێن جڤاكى ژ خێزانێ ده‌ست پێ دكه‌ن و ئه‌گه‌ر ئه‌م به‌رێ خوه‌ بده‌ینه‌ روودانا چه‌مچه‌مال كو ب راستى روودانه‌كا ئێكجار مه‌زنه‌ و كاره‌ساته‌كا مالوێرانكه‌ره‌ و نابیت ئه‌ڤ روودانه‌ بهێته‌ ژبیكرن، به‌لكو پێدڤى ل دیڤ چوون و لێكولینه‌كا جدییه‌ ژنه‌ك بناڤێ سێوان ب هزار برینان یا هه‌وار دكه‌ت من رزگار بكه‌ن من فرێكه‌نه‌ ژ ده‌رڤه‌ باشترین چاره‌سه‌رى بۆ برینێن من یێن كوور بكه‌ن و زه‌لامێ من شه‌رێ من كر و یا هه‌وار دكه‌ت بۆ یاسایێ كو ئه‌ڤی كه‌یسى دانه‌ئێخن و ئه‌گه‌ر راسته‌ یاسایه‌ك هه‌یه‌ دڤێت ئه‌ڤ زه‌لامه‌ ب توندترین شێوه‌ بهێته‌ سزادان.
ب سه‌دان رێكخرواوێن ژنان و مافێن ژنان هه‌نه‌ كه‌سێ خوه‌ ل ڤى كه‌یسى نه‌كرییه‌ خودان، به‌لێ سه‌رۆكێ حكومه‌تێ نێچیرڤان بارزانى هه‌ر ژ ده‌سپێكا درستبوونا ڤێ روودانێ دیاركرییه‌ كو ڤێ روودانێن ئه‌ز گه‌له‌ك دلگران كرم و هه‌موو به‌رهه‌ڤیه‌ك بۆ هاریكاریكرنا سێوانێ دیاركرینه‌ و بۆ دوماهیك جارژى بریار دایه‌ كو سێوان دلبریندار و له‌ش سۆتى ب فرۆكه‌كا تایبه‌ت فرێكه‌ته‌ ژ باشترین نه‌خوشخانه‌ ل وه‌لاتێ تۆركیا بۆ چاره‌سه‌ركرنا وێ و كو ئه‌ڤ پێنگاڤه‌ جهێ ده‌ست خوه‌شیێ یه‌.
ل دوماهیكێ یا گرنگه‌ كو ئه‌ڤ كه‌سێن ڤان جوره‌ تاوانان دكه‌ن ب توندى بهێنه‌ سزادان بۆ هندێ ببنه‌ وانه‌ بۆ هه‌موو كه‌سان یێن كو حه‌زا كرنا تاوانان هه‌بن دژى زارۆكێن بێ گونه‌هـ و ژنێن بێ ده‌ستهه‌لات و دڤێت د ناڤ جڤاكى دا رێزه‌كا تایبه‌ت ل ژنان بهێته‌گرتن و نه‌ك وه‌كو به‌نده‌یه‌كێ بیت د ده‌ستێ زه‌لامه‌كێ درنده‌ و بێ مێشك دا، به‌لێ راسته‌ و هزار جارا راسته‌ هه‌تا ژن ئازاد نه‌بیت چ جڤاك و وه‌لاتى ئازاد نابن و پێشناكه‌ڤن.