ئه‌گه‌ر به‌رێ خوه‌ بده‌ینه‌ مێژوویا مرۆڤان و هه‌ڤركیێن وان دێ بینى ل سه‌ر گه‌له‌ك بابه‌تان بووینه‌ وه‌كو پاره‌ ده‌ستهه‌لات به‌رفره‌هكرنا رووبه‌رێ وه‌لاتێ خوه‌ و هه‌ر وه‌لاته‌ك یان هێزه‌ك ب ناڤ و درۆشمه‌كێ جودا كار بۆ گه‌هشتنا ڤان ئارمانجان كرییه‌، به‌لێ بكارئینانا چه‌كى ل سه‌رده‌مێ به‌رێ تاكه‌ چاره‌سه‌ر بوویه‌ و ئه‌ڤ چه‌نده‌ ببوو دیارده‌ دناڤ ملله‌تێن جیهانێ ئانكو كه‌سێ سه‌ركه‌فتى ب تنێ ئه‌و بهێزبوویه‌ د بیاڤێ چه‌كى دا و ئه‌گه‌ر به‌رێ خوه‌ بده‌یه‌ مێژوویێ یا تژى بوویه‌ ژ خوون رێتنێ وه‌كو شه‌رێن مه‌غولان و ده‌وله‌تا عوسمانى و ئه‌ورۆپا ل سه‌رده‌مێن تاریكى، مرۆڤ ل وى سه‌رده‌مى ژ بلى كوشتنێ و ژناڤبرنێ چ رێكێن دیتر بكار نه‌دئینانا بۆ سه‌ركه‌فتنا خوه‌، ئانكو ئه‌ز دشێم بێژم ل وى سه‌رده‌مى مرۆڤى ب تنێ پشت به‌ستن ل شیانێن خوه‌ یێن له‌شى دكر، به‌لێ نوكه‌ باراپتریا جیهانێ هه‌موو شیانێن خوه‌ یێن له‌شى یێن كرینه‌ د خزمه‌تا ئه‌قلێ خوه‌ دا.
ئه‌گه‌ر ئه‌م به‌رێ خوه‌ بده‌ینه‌ ملله‌تێ كورد كو دڤیا ئه‌وژى گه‌هشتبا مافێن خوه‌ شاد ببا، به‌لێ مخابن هه‌رده‌م بووینه‌ قوربانى سیاسه‌تا وه‌لاتێن جیران و زلهێزێن جیهانێ و دوماهیك ته‌پكژى 16ی ئۆكتۆبه‌رێ بوو كو پلانه‌ك بوو ل دژى ملله‌تێ كورد هاتبوو دانان كو سه‌د سالێن دیتر كوردان پاشڤه‌ ببه‌ن و دارێژه‌رێن ڤێ پلانا مه‌زن هنده‌ك خاین و خوه‌فرۆش بوون ب هه‌ڤكارى دگه‌ل وه‌لاتێن ئه‌قلیمى و جیران رێككه‌فتن خه‌ونا ملیۆنان كوردان بن ئاخ بكه‌ن و قودسا كوردستانێ ب ساناهى بده‌نه‌ دۆژمنان و هندى دنیایه‌كێ كه‌رامه‌تا ملله‌ته‌كى بشكێنن! ئه‌ڤ پلانا مه‌ترسیدار ل كه‌ركووكێ ب تنێ نه‌ د راوه‌ستیا ئانكو مه‌ره‌ما وان داگیركرنا ته‌ڤایا كوردستانێ بوویه‌ و پشتى فرۆتنا كه‌ركووكێ حه‌شدا شه‌عبى دگه‌ل دوژمنێن نافخوه‌ و ئیران و له‌شكه‌رێ عیراقێ لڤینكرن بۆ گرتنا هه‌ولێرێ، به‌لێ ب قاره‌مانیا پێشمه‌رگه‌ى شیان وێ پلانا چه‌په‌ل تێكبشكێنن و بێژنه‌ خاكفرۆشان، چ هێز نه‌شێن مه‌ بشكێنن ئه‌گه‌ر خیانه‌ت و خوه‌ فرۆتن نه‌بیت.
پاشان یا گرنگه‌ بزانین كو مێژوو دیده‌ڤانه‌ كو پتشى 16ى ئۆكتۆبه‌رێ هه‌رێما كوردستانێ د ره‌وشه‌كا ئێكجار خراب دا بوو و ل به‌ ردیوارێ هه‌رفینێ بوو، به‌لێ نابیت روول و كاریگه‌رییا سه‌رۆكێ حكومه‌تێ نێچیرڤان بارزانى بهێته‌ ژبیركرن كو ب رێكێن دبلۆماسى ده‌ست ب چه‌ندین سه‌ره‌دانێن گرنگ كر ژ وانژى سه‌ره‌دانا مێژوویى یا وه‌لاتێ فره‌نسا كو دبیته‌ بناغه‌ بۆ شكاندنا هه‌موو ئاسته‌نگان و ژناڤبرنا پیلانێن خاكفرۆشان و نابیت ژ بیربكه‌ین گه‌له‌ك جارا ئه‌وا مرۆڤ د خیانه‌تێ دا ژ ده‌ست دده‌ت یان د جه‌نگه‌كێ دا ژ ده‌ست دده‌ت، مرۆڤ دشێت دوجارا هند و زێده‌تر ب رێكا دوبلۆماسیه‌تێ ب ده‌ست خوه‌ ڤه‌ بینیت.