چار سالێن دووماھیا کابینا ھەشتێ یا حکومەتا ھەرێما کوردستانێ ب سەرۆکاتیا نێچیرڤان بارزانی ، قۆناغەکا پر ئاستەنگ و مەترسیدار بوو ل ئەزمۆنا حوکمرانیا حکومەتا ھەرێما کوردستانێ ، راستە ل کابینێن بەرتر ژی ئاستەنگ و ئاریشە ھەبوون ، لێ نەگەھشتنە ئاستێ ڤان چار سالان .
ژلایەکێ ھندەک ئالی و کەسایەتیێن سیاسی یێن ھەرێما کوردستانێ ب نھێنی داخاز ل حکومەتا ناڤەندیا عیراقێ دکر بۆدجە و مۆچێ ھەرێما کوردستانێ ڕاکرن ژ بووی برسیکرنا خەلکی و ھاندانا خەلکی بۆ سەرھەلدانا خۆنیشاندانا دژی حکومەتا ھەرێمێ ، ژلایەکێ دیتر ھەرێم کەفتە د مەزنترین شەردا دگەل مەزنترین و پڕ شیانترین رێکخستنا تیرۆرستیا جیھانی ( داعش ) ، کۆ ژبووی مانەڤە و خۆراگریا ھەرێمێ پێتڤی ب خەرجیێن ھەرە زۆر ھەبوون ، دڤان کاودانان دا ھژمارەکا حزبێن پشکدار ل حکومەتا ھەرێما کوردستانێ خۆ لبەر ڤان ئاستەنگ و ئاریشەیان نەگرت و ژبووی ھەلوەشاندنا حکومەتا ھەرێمێ و ئێخستنا بەرپرسیاریا وێ لسەر ملێن پارتی و سەرۆکێ وێ ، خۆ ل حکومەتێ ڤەکێشا .
یا ژ ڤێ ھەمیێ مەزنتر و دژوارتر ، خیانەتا نشتیمانی و نەتەوایەتیا بالێ دەسھەلاتدارێ ئێکەتیا نشتیمانی کوردستان بوو کۆ ئێکە ل حزبێن دەسھەلاتدارێن ھەرێمێ و خودان ھێزا ئابووری و لەشکری ل شازدێ ئکتۆبەرا سالا ٢٠١٧ بوونە پشکەک ل ھێزێن داگیرکەرێن کوردستانێ و ب حەشدا شەعبی یا عیراقێ ب رێنمایی و پیلانێن لەشکرێ رژێما ئیرانێ کەرکووک و دەڤەرێن کوردستانێ یێن دەرڤەی ئیدارا ھەرێما کوردستانێ داگیر کرن و ھەمی ھەول و شیان بکار ئینانا بۆ داگیرکرنا تەڤایا کوردستانێ و لناڤبرنا کیانێ ھەرێما کوردستانێ و گەماروویێن سیاسی و ئاسمانی ژی لسەر دانان .
لێ ژبەرکۆ سەرۆکێ حکومەتا ھەرێما کوردستانێ باوەریەکا ھەرە مۆکۆم ب خەلکێ کوردستانێ و ئەزمۆنا وێ ھەبوو ، کۆ ئەڤ باوەریە پەروەردەیا نشتیمانی و نەتەاویەتیا پارتی دیموکراتی کوردستان و رێبازا پیرۆزا بارزانی نەمرە ، لسەر بنەمایێ ئازادی و رزگاریا کوردستانێ و بەرەڤانیکرن ل ماف و ئارمانجێن خەلکێ کوردستانێ و خۆراگری بەرامبەر پیلانێن دوژمن و داگیرکارا .
بەلێ لسەر ڤی بنەمایەی پارتی دیموکراتی کوردستان ب شانازیڤە پرۆسا راپرسیا سەرخۆبوونا کوردستانێ سەرئێخست و ھەر زوو قوناغێن دژوار دەرباز کرن و پیلانێن خیانەتکار و داگیرکاران ژناڤ برن ، ژ لایێ لەشکری ب پشکداری و رێنمایی یێن جەنابێ سەرۆک مەسعود بارزانی ، پێشمەرگەھێن کوردستانێ ب شیانێن سنۆردارێن لەشکری و ووڕە بلندیێ ، لەشکرێن داگیرکارا تۆشی مەزنترین شکەستن کرن و داستانێن ھەرە مەزن تۆمارکرن ، مینا پردێ و مەحموودیێ و سحێلا و ...
ژلایێ ئێمناھیی سازێن ئێمناھیی یێن ھەرێما کوردستانێ رەوش ڕاگرت و کونترۆل لسەر کر و وەنەکر ڤالایێن ئێمناھی درۆست ببن و ھیڤیێن خیانەتکار و داگیرکار بجە نەھاتن .
ژلایێ ئابووری ژی ب سیاسەتا رێزدار سەرۆکێ حکومەتێ رێکێن نەچاری ڤەدیتن و خەلکێ کوردستانێ ژی د رەوشێ گەھشت و پشتەڤانیا حکومەتێ کر ، تاکۆ لدەمەکێ کێم بەرەڤ چارەسیێ چۆ ، ئەڤەژی ژ ئەنجامێ سیاسەتا سەرۆکێ حکومەتێ بۆ یا سەرخۆبوونا ئابوورێ کوردستانێ نەخاسمە نەفت و گازێ . لسەر ئاستێ پەیوەندیێن ئابووری ژی دگەل وەلاتێن ھەرێمی ، دیستا حکومەتا ھەرێما کوردستانێ شیا سەرەرای ئاستەنگێن حکومەتا عیراقێ شیا پەیوەندیا بەردەوام بھێلیت و گەماروویێن عیراقێ شکاندن .
ژبلی وێ سەرکەفتنا مەزنا سیاسەتا نێچیرڤان بارزانی ل شکاندنا گومارۆیا سیاسی و ئاسمانی ، چونکی دوان کاودانێن دژوار دا سەرۆکی و بەرپرسێن وەلاتان مینا سەرۆکێ فەرەنسا پێشوازی ل جەنابێ وی کر و کەنالێن پەیوەندیێن دبلۆماسیێن ھەرێمێ دگەل جیھانێ نەھاتنە برین ، بەلکی بەرەڤ پێشڤە برن و چەندین دەسکەفت و سەرکەفتنێن مەزن لسەر دەستێ سەرۆکێ حکومەتا ھەرێما کوردستانێ بدەستڤە ھاتن .
لەوما دشێین بێژین ، نێَچیرڤان سەرۆکێ حکومەتا ھەرێما کوردستانێ د چار سالێن ھەرە دژوار دا ، ب باوەریەکا مۆکۆم ب گەل و وەلاتێ خۆ و دۆزا ڕەوایا خەلکێ کوردستانێ و سیاسەتەکا سەرکەفتی یا ھەمە لایەنە ، دیرۆکەکا نوو تۆمارکر کۆ بۆ ھەتا ھەتا جھێ شانازیێ بیت .