رولێ حكومه‌تێ د نه‌هێلانا توندوتیژیێ دا
به‌ده‌ل گابێركى
ئه‌گه‌ر ئه‌م به‌رێ خوه بده‌ینه كریارا توندوتیژیێ باراپتر مرۆڤێ بهێز به‌رامبه‌رى مرۆڤێ بێهێز بكار دئینیت وه‌كو ده‌ستهه‌لاتداره‌ك به‌رامبه‌رى كه‌سه‌كێ بێ ده‌ستهه‌لات مامۆستایه‌ك به‌رامبه‌رى قوتابیێن خوه و بابه‌ك به‌رامبه‌رى زارۆكێن و زه‌لامه‌ك به‌رامبه‌رى هه‌ڤژینا خوه، ئه‌گه‌ر ئه‌م ل دیڤ بۆچوونێن بسپۆرێن جڤاكى و ده‌روونى بچین كو ئه‌و دیار دكه‌ن ئه‌و كه‌سێن ب كارێ توندوتیژیێ رادبن، گه‌له‌ك دوورن ژ مرۆڤ و مرۆڤایه‌تیێ ئانكو ئه‌و كه‌سێ ده‌ستێ خوه دگه‌ل ده‌نگێ خوه ل ژنه‌كا بێ ده‌ستهه‌لان بلند بكه‌ت ل وى ده‌مى تشته‌ك نامینیت ب ناڤێ زه‌لام، هه‌روه‌كى ئاژه‌له‌كێ دره‌نده به‌رامبه‌رى مرۆڤه‌كا بێ ده‌ستهه‌لات، هێز و كه‌ربا خوه دادرێژیت.
ل وه‌لاتێن پێشكه‌فتى ژنێ رووله‌كێ كاریگه‌ر د هه‌موو بیاڤێن ژیانێ دا هه‌یه و جهێن تبلێن وێ ل هه‌موو جهان یێ دیاره بۆ نه‌هێلانا تاریاتیێ و په‌یداكرنا ژیانه‌كا خوه‌ش و یه‌كسان بۆ هه‌موو ته‌خێن جڤاكى، ل هه‌رێما كوردستانێ ژى سالانه چه‌ندین جورێن توندوتیژیێ به‌رامبه‌رى ژنان دهێنه بكارئینان و چه‌ندین ژن دبنه قوربانى نه‌ریتێن جڤاكى وه‌كو ببهانه‌یا پاقژكرنا شه‌ره‌فێ سالانه مه گوهـل چه‌ندین چیرۆكێن تراژیدى دبیت و دیمه‌نێن تراژیدى وه‌كو به‌رلێڤێن رووباران یێن ناڤدار و بترس كه‌فتین ژ كوشتن و هاڤێتنا ژنان.
حكومه‌تا هه‌رێما كوردستانێ ب چه‌ندین رێكان به‌رهنگارى نه‌هێلانا توندوتیژیێ بوویه و سه‌رۆكێ حكومه‌تێ نێچیرڤان بارزانى هه‌رده‌م بزاڤكرینه كو ژن و زه‌لام د ئه‌رك و مافان دا یه‌كسان بن و ژن ب ئازادانه ده‌نگێ خوه بگه‌هینیت و رازى نه‌بیت توندوتیژى به‌رامبه‌رى وێ بهێته بكارئینان.
لڤێره ئه‌ركێ حكومه‌تێ ئه‌وه كو به‌رده‌وام بیت ل سه‌ر نه‌هێلانا توندوتیژیێ ئه‌وژى ب چه‌ندین رێكان ئه‌وژى هاندانا راگه‌هاندنێ بۆ ب هوورى بچنه دناڤ مێشكێن هه‌موو كه‌سان دا و وه‌لاتیان هشیار بكه‌ن ل سه‌ر كاریگه‌رى و زیانێن توندوتیژیێ ل سه‌ر جڤاكى هه‌موویێ و ژ لایه‌كێ دیتر ڤه په‌روه‌ردێ هانبده‌ت كو ب رێكا په‌روه‌ردێ وانه‌كا تایبه‌ت هه‌بیت بۆ یه‌كسانیا هه‌موو ئه‌ندامێن خێزانێ و هشیاركرنا زارۆكان ل سه‌ر مه‌ترسیێن توندوتیژیێ.
دیسان گرنگه خولێن تایبه‌ت بۆ زه‌لامان بهێنه‌ڤه‌كرن كو چاره‌سه‌ركرنا ئاریشان دگه‌ل ژنان ب رێكا توندوتیژیێ كاره‌كێ خه‌له‌ته و ده‌ر ئه‌نجامێن مه‌ترسیدار ل دووڤ خوه دهێلیت.
ل دوماهیكێ یا گرنگه هه‌موو وه‌لاتى پشته‌ڤانێ حكومه‌تێ بن بۆ هندێ ژن و زه‌لام ب هه‌ڤرا و یه‌كسان بژین و ژن بخوه‌ژى ده‌نگێ خوه بلند بكه‌ت به‌رامبه‌رى زۆرداریێ.
