گه‌له‌ك جارا ژیانا وه‌لاتیان دبیته‌ بابه‌تێ سه‌ره‌كى یێ هه‌ر حكومه‌ته‌كێ و ئه‌ركێ سه‌ره‌كى یێ خوه‌ دكه‌ته‌ خزمه‌تكرنا وه‌لاتیان و بێگومان ئه‌ڤ چه‌نده‌ ژ ڤالاتیه‌كێ ناهێت، به‌لكو هه‌موو حكومه‌ت باش دزانن تا ژینگه‌هه‌كا ئارام و خوش بۆ وه‌لاتیان نه‌هێته‌ درستكرن یا ب زه‌حمه‌ته‌ مرۆڤه‌كێ دروست و ساخله‌م بهێته‌ هه‌بوونێ.
حكومه‌تا هه‌رێما كوردستانێ چه‌ندین پێنگاڤێن گرنگ ب سه‌رۆكاتیا نێچیرڤان بارزانى هاڤێتینه‌ كو ئه‌ڤ بریاره‌ دبنه‌ ئه‌گه‌ر ژیانا وه‌لاتیان پتر به‌ره‌ڤ پێشڤه‌ بچیت دبیت كاریگه‌رییا ڤان بریاران زوو دیارنه‌بن، به‌لێ د پاشه‌رۆژێ دا ب رووهنى دێ دیار بن، مخابن چه‌ندین ئاسته‌نگ هه‌بووینه‌ كو حكومه‌ت ب دروستى كارنه‌كه‌ت وه‌كو ژماره‌كا زێده‌یا فه‌رمانبه‌ران و سیسته‌مێ عه‌شایرى و ده‌ستهه‌لاتا زێده‌ یا پارتێن سیاسى و چه‌ندین ئاسته‌نگێن دیتر هه‌بووینه‌ كو د گرێداینه‌ ب زلهێزێن جیهانێ وه‌كو هاتنا داعشێ و برینا بودجه‌یا هه‌رێما كوردستانێ ژ لایێ حكومه‌تا عیراقێ ڤه‌ و داكه‌فتنا بهایێ نه‌فتێ بۆ 25 دۆلاران، به‌لێ ئه‌ڤ هه‌موو ئاسته‌نگه‌ نه‌بوونه‌ رێگر ل هه‌مبه‌رى بجهئینانا پرۆژێن گرنگ و كاریگه‌ر ژ وانژى پرۆژێ فرێكرنا خازا سرۆشتى ب رێكا تۆركیا و ژ تۆركیا بۆ ئه‌ورۆپا كو ب بوچوونا بسپۆرێن ئابۆرى ئه‌ڤ پرۆژه‌ دێ یێ گرنگ و كاریگه‌ر بیت بۆ هه‌رێما كوردستانێ و داهاتێ وێ كێمتر نابیت ژ یێ نه‌فتێ بۆ هه‌رێما كوردستانێ كو ل ده‌مه‌كێ نێزیك ئه‌ڤ پرۆژه‌ دێ بدوماهیك هێت و بشێوه‌یه‌كێ فه‌رمى خازا سرۆشتى مل ب ملێ نه‌فتا هه‌رێما كوردستانێ دێ به‌ره‌ڤ بازارێن جیهانى چیت.
هه‌روه‌سا پشتى ئه‌ڤ پرۆژێ گرنگ د كه‌ڤیته‌ كارى هه‌رێما كوردستانێ ب شیوه‌یه‌كێ كاریگه‌ر و مه‌زن دێ بیته‌ ئه‌كته‌ره‌كێ سه‌ره‌كى ل سه‌ر ئاستێ جیهانێ، ژ به‌ركو ئه‌ڤرۆكه‌ شه‌رێ هه‌رى مه‌زن شه‌رێ ئابۆرى یه‌ و یێ ئه‌ڤرۆكه‌ دوو دینار هه‌ین هه‌موو ل چاڤ ل به‌رده‌رگه‌هێ وى نه‌ یا گرنگه‌ ئه‌م پشته‌ڤانیا قه‌واره‌یێ هه‌رێما كوردستانێ بكه‌ین بۆ هندێ پتر به‌ره‌ڤ پێشڤه‌ بچیت و پتر دبیاڤێن جودا جودا خزمه‌تا وه‌لاتیان بكه‌ت.
هه‌روه‌سا دانانا ده‌زگایه‌كێ تایبه‌ت ژ لایێ سه‌رۆكێ حكومه‌تێ نێچیرڤان بارزانى بۆ كونترۆلكرنا خوارنێ و ده‌رمانان وه‌كو وه‌لاتێن پێشكه‌فتى بۆ نموونه‌ ئه‌مریكا و ئوستۆرالیا و ئه‌لمانیا و چه‌ندین وه‌لاتێن دیتر یێن پیشكه‌فتى، كو ئه‌ڤ ده‌زگایه‌ دێ بشێوه‌یه‌كێ راسته‌وخو ب سه‌رۆكاتیا سه‌رۆكێ حكوتێ هێته‌ پرێڤه‌برن و گرنگییا ڤى ده‌زگه‌هی د هندێ دایه‌ كو ئه‌و كه‌سێن بشێوه‌یه‌كێ قاچاغ ده‌رمان و خوارنێ دئینه‌ ناڤ هه‌رێما كوردستانێ ب توندترین شێوه‌ بهێنه‌ سزادان.
ل دوماهیكێ یا گرنگه‌ بزانین كو دێ سالین داهاتى یێن گوهۆرینێن مه‌زن بن بگره‌ ژ لایێ ئابۆریڤه‌ و خزمه‌تكرنا وه‌لاتیان و بجهئینانا پرۆژێن چاكسازیێ.