دەمێ چەند رۆژانە گەلەک کەس ل سۆشیال میدیایێ و کەنالێن ھندەک ئالیێن سیاسی دەربارەی رادەستکرنا دەستھەلاتێ ھەڤبەرییا ھەرێما کوردستانێ و ئیراقێ دکەن. راست دبێژن، ل ئیراقێ ژ سالا دوھزار و چارێ تا نوکە، سەرۆکوەزیرێ پێنجێ یە دھێتە سەر دەستھەلاتێ و ل ھەرێمێ، ھەر ئێک کەسە، تنێ دو سال نەبن کو ئێکەتیێ ئەو پۆست وەرگرتبوو.
رەخنەکرن و ھەڤبەرکرنا ھەرێما کوردستانێ ب ئیراقێ یان ھەر جھەکێ دی بیت، گەلەک باشە ئەگەر رەخنە و ھەڤبەرکرنەکا لۆژیکی بیت، لەورا ئەم دشێین بێژین، ئیراق وەک روویێ تیۆری بۆ بابەتێ گوھۆرینا سەرکێ وەزیران، ژ ھەرێما کوردستانێ دیمۆکراسیترە، لێ ئەگەر ئەم ل گەل خۆ دراست بین، پێدڤییە ئەم نەبتنێ وەک تیۆری ھەڤبەرکرنێ بکەین، بەلکو وەک پراکتیک، کا حکوومەتێن ھەرێما کوردستانێ چ کرییە؟ و حکوومەتێن ئیراقێ چ؟
ھەرچەندە بەری سالا دوھزار و سێیێ، پێشکەفتن و ئاڤەدانی یا ل بەغدا و باژێرێن دی یێن ئیراقێ ھەیی، ب تایبەت باژێڕێن سوننی، گەلەک ژ یا ھەرێما کوردستانێ زێدەتر بوو. ئەگەر وێ ھەموویێ حساب نەکەین و وەسا دابنین کو ل سالا دوھزار و سێیێ ھەرێما کوردستانێ و باژێڕێن ناڤەراست و باشۆرێ ئیراقێ، ژ خالا سفڕ دەستپێ کرییە و بۆ دەمێ پازدە سالان حکوومەتا ئیراقێ چ کرییە و حکوومەتا ھەرێما کوردستانێ چ کرییە؟ ئەنجام دێ چ بیت؟
حکوومەتا ئیراقێ، ئەو حکوومەتا بودجەیا وێ یا سالانە نێزیکی سەد ملیار دۆلاران چ کرییە؟
حکوومەتا ئیراقێ شیایە ژ د پازدە سالێن بووری دا ب رەنگەکێ گەلەک جان بودجەیا خۆ د ژناڤبرن و وێرانکرنا باژێڕێن ئاڤا و ئاڤەدان دا ب مەزێخیت. بەغدا ئەو باژێرێ ھەموو عەرەبان خەون پێڤە ددیتن، نوکە بوویە باژێڕەک کو دەمێ کابووس دھێتە ئێکی دبینیت یێ ل بەغدا. بەغدا ئەو باژێڕێ جھێن گەشتیاری و کەیف و سەما و بووراندنا دەمێن خووش، نوکە بوویە مەزنترین نموونەیا ھەبوونا تیرۆر و کوشتن و وێرانکرن و تالانکرن و ھەژاری و دەردەسەریێ. بەغدا ئەو باژێڕێ ل سەردەمێ ھارۆن رەشیدی ب پایتەختێ خواندن و زانینێ دھاتە نیاسین، نھا بوویە باژێڕەک کو خواندەڤان و زانایێن وێ نەوێرن لێ بژین و قەستا ھەرێما کوردستانێ و دەڤەرێن ئارام دکەن. ئەو بەغدایا پێشتر ب جادەیێن موتەنەبی و ئەبی نٶاس و پر و رێیێن خۆ یێن جوان بەرنیاس، نوکە ھەر جادەیا تێڕا دەرباز ببی، دێ ب دەھان زالگەھـ کەڤنە رێیا تە و دوور نینە ل داوییا رێ، دیوارەکێ کلبستۆنان ل بەر سینگێ خۆ ببینی و نەشێی دەرباز ببی.
دبینم پێدڤی ناکەت بەحسێ ھەولێرێ بکەین کو زێدەباری گەندەلی و کێم و کاسیێن ھەین، ژ چ بوویە چ و نابێژم کا بەری پازدە سالان ب چ رەنگی بوو و نوکە چاوایە؟بەحسێ فشارێن سیاسی یێن حکوومەتێن ئیراقێ ئەوێن دەستھەلاتێ ئاشتیانە رادەست دکەن، یێن ل سەر ھەرێما کوردستانێ ژی ناکەم.
ئەگەر رادەستکرنا دەستھەلاتێ دێ مە گەھینیتە وێ یا ئیراق گەھشتیێ، ئەز بێژم مە پێدڤی ب وی جۆرێ دیمۆکراسیێ نینە. تنێ ئەم پێدڤی نە چاکسازییان ل ھەرێما خۆ بکەین، گەندەلی و ھەژاریێ نەھێلین. ھەڤڕکیێن خۆ یێن سیاسی ل سەر ئاستێ ناڤخۆ بکەین و ل سەر ئاستێ دەرڤە ھەڤڕکیێ ب شکاندنا ئێک دو و بنپێکرنا پیرۆزیێن کوردستانێ نەکەین.

ئیراق ژ ھەرێما کوردستانێ دیمۆکراسیترە!
ژیوار عەبدولجەبار