ل هه‌موو دینایێ كارێ سه‌ره‌كى یێ هه‌ر حكومه‌ته‌كێ ئه‌وه‌ كار بكه‌ت ل سه‌ر هندێ كو باوه‌رییا وه‌لاتیان ب ده‌ست خوه‌ ڤه‌ بینیت و ئه‌ڤ چه‌نده‌ژى كاره‌كێ ب ساناهى نینه‌، به‌لكو دڤێت حكومه‌ت هه‌موو مافێن وه‌لاتیان بده‌تێ بۆ رووهن بكه‌ت كو هه‌موو خه‌ماوێ خزمه‌تكرنا وه‌لاتیانه‌ و نه‌ك چ كارێن دیتر بۆ هندێ وه‌لاتیان باوه‌رى ب حكومه‌تێ هه‌بیت یا پێدڤییه‌ حكومه‌ت كه‌سێن خرابكار و گه‌نده‌ل دوور بێخیت و سزا بده‌ت و بكه‌ته‌ عیبره‌ت دا چ كه‌سێن دیتر ده‌ستێن خوه‌ درێژنه‌كه‌ن بۆ مافێن وه‌لاتیان.
ئه‌گه‌ر ئه‌م به‌رێ خوه‌ بده‌ینه‌ حكومه‌تا هه‌رێما كوردستانێ و ب تایبه‌تى سه‌رۆكێ حكومه‌تێ نێچیرڤان بارزانى چه‌ندین پرۆژه‌ و بریار ده‌رئێخستینه‌ ژ وان پرۆژێ چاكسازیێ كو نها ل په‌رله‌مانێ كوردستانێ یه‌ و دیسان كاركرن بۆ پتر هه‌بوونا شه‌فافیه‌تێ د هه‌موو بیاڤان دا وه‌كو نه‌فت و ژێده‌رێن سرۆشتى .
هه‌روه‌سا سه‌رۆكێ حكومه‌تێ بزاڤكرینه‌ كو كه‌رتێ ساخله‌میێ به‌ره‌ڤ پێشڤه‌ ببه‌ت و چه‌ندین رێنمایى و بریار ده‌ركرینه‌ و هه‌ركه‌سێ پیگریێ پێنه‌كه‌ت دێ ب توندى هێته‌ سزادان و ژ خالێن دیتر یێن حكومه‌تێ ئه‌وه‌ كو ده‌لیڤێن كارى بۆ كه‌سێن بێ كار په‌یدا بكه‌ت و بۆڤێ چه‌ندێ ژى نێچیرڤان بارزانی، سەرۆک وەزیرێن ھەرێما کوردستانێ ل گەل شاندەکێ جڤاتا بازرگانیا ئەمریکی و کوردستانی کو ژ نوونەرێن 30 کۆمپانیێن وارێن جودا یێن بازرگانی ل ئەمریکا پێک ھاتبوو کۆمبوو و راگەھاند کو دێ پشتەڤانیا کەرتێ تایبەت یێ بیانی ل ھەرێما کوردستانێ کەین و ئه‌ڤ كومبوونه‌ گه‌له‌ك دگرنگن بۆ هه‌رێما كوردستانێ و ب تایبه‌تى ئینانا كومپانیێ بیانى دبیاڤێن وه‌به‌رهێنانێ دا و درستكرنا پرۆژێن مه‌زن د بیاڤێن بازرگانى و گه‌شت و گوزارێ و چاندن و چه‌ندین بیاڤێن دیتر.
چاكسازى و ب ده‌ستڤه‌ئینانا باوه‌رییا وه‌لاتیان نه‌كاره‌كێ ب زه‌حمه‌ته‌، به‌لێ پێدڤى ب هه‌بوونا ئیراده‌كا بهێزه‌ و سزادانا خه‌لكێن خرابه‌ بێ گومان ئه‌گه‌ر حكومه‌تێ ئه‌ڤ پێنگاڤه‌ هاڤێت دێ وه‌لاتى هه‌موو ده‌مان د به‌رهه‌ڤ بن گیانێ خوه‌ پێشكێشى حكومه‌تا خوه‌ بكه‌ن و ئه‌گه‌ر ئه‌م بچینه‌ د ناڤ وه‌لاتیان دا ب تنێ وان وه‌لاتیان ئێك تشت ژ حكومه‌تێ دڤێت ئه‌وژى هه‌بوونا یه‌كسانیێ یه‌ د ناڤبه‌را هه‌موو وه‌لاتیان دا.
ل دوماهیكێ یا گرنگه‌ حكومه‌تێ پلانه‌كا درێژخایه‌ن هه‌بیت بۆ باشتركرنا سیسته‌مێ پرێڤه‌برنا وه‌لاتى د هه‌موو سكته‌رێن ژیانێ دا بۆ هندێ باوه‌ریه‌كا موكم د ناڤبه‌را وه‌لاتیان و حكومه‌تێ دا درست ببیت.