بریارێن سەرۆکێ حکومەتێ نێچیرڤان بارزانی دێ رەوشا ساخلەمیێ بەرەڤ قوناغاکا رووھن ڤە بەت و دێ رێک ل وان کەسان ھێتە گرتن ئەوێن ب کەیفا خوە بازرگانیێ ب ژیان و ساخلەمیا خەلکی دکەن و چەندین بریارھاتینە دان کو ئەڤ بریارە ب شێوەیەکێ راستەوخو دێ کارتێکرنێ ل باشبوونا کەرتێ ساخلەمیێ ل ھەرێما کوردستانێ کەن.
ئەو بریارێن کو دێ رەوشا ساخلەمیێ باش کەن کو ژ لایێ سەرۆکێ حکومەتێ ڤە ھاتینە دان ئەڤەنە کو پێدڤییە ھەموو کەسێن موولەتێن کرین و فرۆتنا دەرمانان ھەین موولەتێن خوە نوو بکەن و ب تنێ وەزارەتا ساخلەمیێ ماف ھەیە موولەتان بدەت نەک چ جھەتێن دیتر، ئەڤ بریارە دێ بیتە رێگر ل ھەمبەری وان کەسان یێن ب کەیفا خوە دەرمان دئینانان بێی چ مەرج بیی گومان دەمێ دبێژیت پێدڤییە وەزارەتا ساخلەمیێ ب تنێ ماف ھەیە ئەڤە وێ چەندێ دگەھینیت کو چەندین مەرج ھەنە ھەتا کەسەک ب شێت مولەتا کرین و فرۆتان دەرمانان ب دەست خوەڤە بینیت.
ھەروەسا بریارەکا دیتر کو گەلەک یا گرنگە بۆ وەلاتیان کو ئەو کەسێن بارزگانیا قەچاخ ب دەرمانان دکەن دێ ھێنە سزادان و ل دیڤ یاسایێ دێ سەرەدەریێ ل گەل ھێتەکرن، بێ گومان ڤێ بریارێ ژی گرنگیەکا تایبەت ھەیە بۆ ھندێ ئەڤ کەسێن حەزا کرین و فرۆتنا دەرمانان ھەبیت ب شێوەیەکێ قاچاخ دێ ب توندێ ھێنە سزادان و ب زەحمەتە ئێدی کەس ھەبن ب ڤی کاری رابن، ژ بەرکو سزایێن دژوار ھەنە.
دیسان بریارەکا دیتر یا سەرۆکێ حکومەتا ھەرێما کوردستانێ نێچیرڤان بارزانی ئەوە کو چ کەسان ماف نینە دەرمانان ب ھەلگریت ژ بلی دەمانسازان، ئەڤ بریارەژی وێ چەندێ دگەھینیت کو سلامەتیا دەرمانان یا پاراستی بیت و ل دیڤ ستاندەردێن جیھانی دەرمان بھێنە ھەلگرتن و نەھەرکەسەک ب کەیفا خوە دەرمانان ب ھەلگریت.
خالا ژ ھەموو یێ گرنگتر ئەوە کو نابیت چ پەیوەندی دناڤبەرا دەرمانسازان و نۆشداران و خودانێن تاقیگەھان دا ھەبیت، ژ بەرکو ئەڤ دیاردە گەلەک یا ھەی ل ھەرێما کوردستانێ دەمێ دەرمانسازان کرێیا جھێ نۆشداران ددا و نۆشداران ژی نەخوش فرێ دکرنە دەرمانخانێن دەرمانسازان و ئێدی ئەڤ پەیوەندییە ئەگەر ئاشکرا بوو ئەو کەس ب توندی دێ ھێنە سزادان.
ل دوماھیکێ چەندین بریارێن دیتر ژی یێن گرنگ ھەنە و یا گرنگە ئەڤ بریارە ھەموو وەکو خوە بھێنە جێ بەجێکرن و رێز ل یاسایێ بھێتە گرتن و ھەر کەسێ سەرپێچەک دیت کو پێچەوانەی ڤان بریاران بوو ماف ھەیە سکالایەکێ پێشکێش بکەت و ئەڤ بریارە ھەموو بۆ ھندێ نە کو پشیک ب دزییڤە گۆشتی نەخوت، بەلکو ژ دەستێ خودانێ خوە بخوت و خودانێ وێ دزانیت کا کیژ پشکا گوشتی یا باشە و کیژک یا خرابە و ھەموو بریارێن سەرۆکێ حکومەتێ دێ خزمەتەکا باش یا وەلاتیان کەن.