بۆچى سه‌رۆكێ حكومه‌تێ ژ كه‌رتێ ساخله‌میێ ده‌ست پێكر؟
به‌ده‌ل گابێركى
مرۆڤ و ژیان دو تشتنێن گرنگن بۆ هه‌ركه‌سه‌كى و یا گرنگه مرۆڤ یێ به‌رده‌وام بیت دگه‌ل ژیانێ و ئێك چركه‌ژى نه راوه‌ستێت و تاكو مرۆڤ یێ به‌رده‌وام بیت پێدڤییه ساخله‌میه‌كا باش مرۆڤى هه‌بیت و ئه‌ستمه بێى هه‌بوونا كه‌رته‌كێ پێشكه‌فتى یێ ساخله‌میێ ئه‌م ب شێین د ساخله‌م بین.
بزاڤیێن سه‌رۆكێ حكومه‌تێ نێچیرڤان بارزانى ده‌سپێكه‌كا باشن بۆ هندێ هه‌م بازرگانێ كرینا ده‌رمانان سنۆره‌كى بۆ بدانیت و بێژیتێ ستۆب! و هه‌م باوه‌ریێ بۆ وه‌لاتیان درست بكه‌ت كو ئێدى هوین بهاترین كه‌سن ل ده‌ڤ حكومه‌تێ نه‌ك چه‌ند كه‌سه‌كێن به‌رژه‌وه‌ندیخواز و هه‌م ئه‌ڤ بریاره دێ بنه ئه‌گه‌ر كو باوه‌رییه‌كا باش دناڤبه‌را حكومه‌تێ و وه‌لاتیان دا درست ببیت و ئه‌ڤه‌ژى گرنگترین خاله و پیڤه‌ره بۆ هه‌ردوولا.
دیسان نێچیرڤان بارزانى ئاماژه ب چه‌ندین خالێن گرنگ دایه ژ وانژى ئێدى رێك ناهێته‌دان بۆ ریكلامكرنا وان ده‌رمانان یێن پێدڤى ب وه‌ره‌قا نۆژدارى هه‌ی و هه‌ر كه‌سێ كه‌ره‌ستێن نۆژدارى كوپى بكه‌ت و كرین و فرۆتنێ بكه‌ت ل وى ده‌مى دێ خوه ل هه‌مبه‌رى دادگه‌هێ بینت و ل دیڤ یاسایێ هێته سزادان و رێك ب ده‌رمانسازه‌كى ناهێته‌دان كو پتر ژ ئێك موله‌تا ده‌رمانخانێ یان كوگه‌هه‌كا ده‌رمانان هه‌بیت و ئێدى ده‌رمانساز نه‌شێن بێى وه‌ره‌قا نۆژدارى ده‌رمانان بفرۆشن.
بێ گومان ئه‌ڤ خالێن ل سه‌رى و چه‌ندین خالێن دیتر سه‌رۆكێ حكومه‌تێ ده‌رئێخستینه بۆ هندێ وه‌لاتى نه‌بنه قوربانى به‌رژه‌وه‌ندیێن چه‌ند بازرگانه‌كان و بارزانى باش دزانیت ئه‌گه‌ر كه‌رتێ ساخله‌میێ به‌ره‌ڤ پێشڤه نه‌چیت دێ هه‌موو رێكێن سه‌ركه‌فتنێ د نه‌خوه‌ش و بێهێز بن، هه‌ر ژ به‌رهندێ دبیت ب ڤان بریاران چه‌ندین بازرگان دلگران بن، به‌لێ هه‌رده‌م به‌رژه‌وه‌ندیێن گشتى دڤێت ل سه‌ر به‌رژه‌وه‌ندیێن تایبه‌تى بن و رێز ل ماف و ژیانا وه‌لاتیان بهێته‌گرتن و خه‌لكێ هه‌رێما كوردستانێ ب خوه‌شى و ساخله‌م بژیت.
ل دوماهیكێ روولێ سه‌رۆكێ حكومه‌تا هه‌رێما كوردستانێ رووله‌كێ مه‌زن و كاریگه‌ره د چاره‌سه‌ركرنا كێشه‌یێن وه‌لاتیێن هه‌رێما كوردستانێ دا و سالێن بهێت دێ پتر خزمه‌تا وه‌لاتیان هێته‌كرن ب تایبه‌تى د بیاڤێ ساخله‌میێ دا په‌روه‌ردێ دا، ژ به‌ركو پێشڤه‌برنا ڤان كه‌رتان ل داهاتى دێ ئارمانجا حكومه‌تێ بن و ڤێ ئارمانجێ ده‌ست پێكر ژ كه‌رتێ ساخله‌میێ و بۆچى سه‌رۆكێ حكومه‌تێ ژ كه‌رتێ ساخله‌میێ ده‌ست پێكر؟ ژ به‌ركو عه‌قلێ ساخله‌م هه‌رده‌م د له‌شه‌كێ ساخله‌م دایه.
