لرۆژا ٢/١٠/٢٠١٨ ل جڤاتا نوونەرێن عیراقا فیدرال ھەلبژارتن بۆ سەرۆک کۆماراێ عیراقێ ھاتنە ئەنجامدان ، لدیف رێکەفتن و لێک تێگەھشتنێن پێکھاتێن عیراقێ پۆستێ سەرۆک کۆماری پشکا گەلێ کوردە ، لدوو گەرێن چوویی ب رێکەفتن دناڤبەرا پارتی و ئێکەتیێ ئەڤ پۆستە دایە ئێکەتیێ ، و شێوازێ دیارکرنا کاندیی ب رێکەفتنە دناڤبەرا فراکسیۆنێن کوردستانی . لێ ژبەرکۆ ڤێ جارێ سەرۆک بارزانی و پارتی کاندیێ خۆ ھەبوو بۆ پۆستێ سەرۆک کۆماریێ ئەوژی ( دکتور فوئاد حسێن ) وەکی کۆدەتایەت دژی پێشنیارا سەرۆک بارزانی و پارتی ئێکەتیی ڤی پۆستەی ب ملکێ خۆ زانی و دگەل لایەنێن دیتر یێن کوردی و عەرەبی رێککەفتنی و شێوازێ ھەلبژارتنێ برە دناڤ ھۆلا پەرلەمانی .
ھەر کەسەک دزانین بڤی شێوازێ نھو یێ ھەلبژارتنا سەرۆک کۆماری کاندیدێ ئێکەتیێ دێ دەنگان بدەستڤە ئینیت و ھەردەم دێ دژایەتیا پارتی و سەرۆک بارزانی کەن . چونکی بۆ عەرەبێن عیراقێ ھەردەم ئێکەتیێ فەرترە داکۆ وەکی زۆر جاران ب ساناھی بۆ پاراستنا بەرژەوەندێن خۆ بکاربینن دژی بەرژەوەندێن ھەرێما کوردستانێ . دڤان سالێن دەربازبوویی ئێکەتیێ خۆیاکریە کۆ کوردایەتیا خۆ ژدەست دایە و زێدەتر بوویە حزبەکا عیراقی و کار بۆ عیراقچیەتێ دکەت ، ھەر وەکی لدەسپێکا ئاڤاکرنا عیراقا پشتی دکتاتوریەتا سەردامی سیستەمێ فیدرالیەتا پارێزگەھا پەسند کری و پشتی پۆستێ سەرۆک کۆماریێ سەر ب حزا وان ئەڤ عیراقیبوون زێدەتر ژلایێ وان پیرۆز و گرنگتر بوو ، ئاگەھشتە ئاستێ وەلات فرۆشیێ دژی سەرخۆبوونا کوردستانێ راوەستان و خیانەتا ١٦ ئکتۆبەرا سالا ٢٠١٧ بۆ رادەستکرنا کەرکووکا دلێ کوردستانێ و دەڤەرێن دی یێن کوردستانی یێ، دەرڤەی ئیدارا ھەرێما کوردستانێ و پشتەڤانیا برینا بۆدجە و مۆچێ ھەرێما کوردستانێ ژلایێ حکومەتا عیراقا فیدرال و مل ب ملێ پێشمەرگەھێن پارتی رێگری ل داگیرکرنا ھەرێما کوردستانێ نەگرت بەرامبەر میلیشیاتێن حەشدا شیعی و ...ھتد . پشتی شکەستا وان ل ھەلبژاردنێن جڤاتا نوونەرێن عیراقێ ل ١٢/٥/٢٠١٨ و یێن پەرلەمانێ کوردستانێ ل ٣٠ / ٩/٢٠١٨ و ئاریشە و دووبەرەکیێن وان یێن نافخۆیی زێدەتر خۆ نێزیکی عیراقێ کر . کار گەھشتە وی ئاستی بەرھەم سالحێ ل وان جودابوویی و پارتیەکا جودا دامەزراندنی بکەنە کاندیێ خۆ بۆ پۆستێ سەرۆک کۆماریێ .
ژبۆ پاراستنا بەرژەوەندێن ئێکەتیێ و بنەمالا دەسھەلادارا ڤێ حزبێ ، لرۆژا ٢/١٠/٢٠١٨ بۆ ھەلبژاردنا سەرۆک کۆمارێ عیراقێ جارەکا دی ئێکەتیێ ئێکرێزیا ھێزێن کوردستانی ل بەغدا تێکدا و رێکەفتنا خۆ دگەل پارتی بن پێ کر و پۆست و بەرژەوەندێن کوردستانێ ل بەغدا ئێخستنە ددەستێ عەرەبێن شوفینی دا .
ئەڤەژی بۆ عەرەبێن شوفینی دەسکەفتەکێ ھەرە مەزنە ، ئەگەر ئەز ژی ئەندامەکێ عەرەب بام ل جڤاتا نوونەرێن عیراقێ دا ھەول دەم بڤی رەنگی رەفتار و سەرەدەریێ دگەل ھێزێن نشتیمان پەروەر و وەلات پارێزێن کورد کەم ، چونکی فوئاد حسێن کاندیدێ سەرۆک بارزانی و پارتی بوو بۆ سەرۆک کۆماریێ ، کاندیدێ وی کەسایەتی و وێ پارتیێ بوو ئەوێن چەندید سالە خەبات بۆ ئازادی و رزگاریا کوردستانێ کری و پێشڕەوایەتیا شۆرەشێن کوردستانی کری و ھەردەم بەرژەوەندێن خەلکێ کوردستانێ لبەرچاڤ گرتی نەک پاراستنا بەرژەوەندێن عیراقیبوونێ و رێبەرێن ڕاپرسیا سەرخۆبوونا کوردستانێ نە ل ٢٥ ێ ئیلۆنا ٢٠١٧ و بەربەستێن پۆلایین بوون بەرامبەر لەشکر و حەشدا شیعی بۆ داگیرکرنا کوردستانێ پشتی خیانەتا شازدێ ئکتووبەرێ ، ھێشتا خوینا کورشتیێن وان ل پردێ و سحێلا و مەحموودیێ ...و ھتد ھشک نەبوویە ، ئەرێ چەوا ئەو عەرەبێن بەرامبەر پێشمەرگەھێن پارتی ب سەرپەرشتیا سەرۆک بارزانی تووشی ڤێ شکەستنێ بووی و پیلانێن وان ھاتینە ژناڤبری ، ئەڤرۆ دێ دەنگی دەنێ بۆ سەرۆک کۆماریێ ..؟! . چونکی دزانن ئەگەر سەرۆک کۆمار ددەستێ پارتی و سەرۆک بارزانی دا بیت ، نەشێن جارەکا دی دەستوورێ عیراقا فیدرال بن پێ بکەن و پیلانێن داگیرکرنا کوردستانێ دابێرژنەڤە و ھەرێما کوردستانێ لاواز بکەن . لێ سەرۆک کۆمارێ بن سیبەرا عیراقچیەتێ ھەردەم گوستیلە ددەستێ دەسھەلاتدارێن عیراقێ و گەلەشەکێ بێ کنیاتە و بۆ بەرژەوەندێن خۆ دێ بکارئینن دژی ھەرێما کوردستانێ . ئەز باوەرم بەرھەم سالح وەک سەرۆک کۆمار ئامیرەکە ددەستێ پیلانگێر و خیانەتکارێن شازدێ ئکتۆبەرێ و نەشێت پارێزەریا دەستوورێ عیراقێ بکەت بتایبەت ئەو ماددە و خالێن گرێدایی ل ھەرێما کوردستانێ ، دانانا ئاراس شێخ جەنگی وەک راوێژکارێ سەرۆک کۆماری گاڤا دەسپێکا بەرھەم سالحی یە بۆ بکارئینانا پۆستێ سەرۆک کۆماریێ بۆ بەرژەوەندێن ئێکەتیێ نەک بۆ بەرژەوەندێن کوردستانێ و پاراستنا دەستوورێ عیراقێ .