ئه‌و ملله‌تێن گه‌هشتینه‌ خه‌ونێن خوه‌ هه‌رده‌م خودان ئیراده‌یه‌كا بهێزبووینه‌ و چ جارا خیانه‌ت ل وه‌لاتێ خوه‌ نه‌كرییه‌ و هه‌رده‌م قوربانیداینه‌ بۆ هندێ خه‌لكێ وان ب ئازادى بژیت و یێ دوور بیت ژ هه‌ر نه‌خوه‌شییه‌كێ ب هزاران كه‌سان د بیاڤێن جورا و جوردا ژیانا خوه‌ كرییه‌ قوربان بۆ ئاڤاكرن و گه‌شه‌كرنا وه‌لاتێ خوه‌.
ئه‌گه‌ر ب باشى به‌رێ خوه‌ بده‌ینه‌ مێژوویا ملله‌تێ كورد یا تژییه‌ ژ قوربانیدانێ و ب هزاران سه‌ركرده‌ د ناڤ دا رابووینه‌ و شوره‌ش بۆ ئازادیێ ده‌ستپێكرینه‌، به‌لێ شوره‌ش و ماندیبوونا زۆر هه‌ر زۆى ژناڤ دچوون ب تنێ ئێك ئه‌گه‌ر هه‌بوویه‌ ئه‌وژى جڤاكێ كوردى ئێك نه‌بوویه‌ و یێ دابه‌شكرییه‌ ل سه‌ر بنه‌مایێ عه‌شائیرى و بنه‌مالێن بچووك و هێڤێنێ كه‌رب و كینه‌كا مه‌زن د ناڤبه‌را وان دا هه‌یه‌ تا وى راده‌یى سه‌را بچووكترین ئاریشه‌ د به‌رهه‌ڤن ب سه‌دان كه‌سان ژ ئێك و دوو بكوژن! ئه‌ڤ چه‌نده‌ ژى بوویه‌ ده‌لیڤه‌كا باش بۆ دۆژمنێن ملله‌تێ كورد كو ب ساناهى مفایى ژ وان ده‌رزان ببینن و لایه‌نه‌كى دژى لایه‌نه‌كێ دیتر بكابینن و ئه‌ڤ كریاره‌ وه‌كو په‌له‌كا ره‌ش و ئاگرى یا مایه‌ دیڤ ملله‌تێ كورد ڤه‌ و ئه‌ڤ په‌له‌ و خیانه‌ته‌ ل 16ى ئۆكتۆبه‌رێ ژى جاره‌كا دیتر دوباره‌ بۆ ڤه‌ و ته‌ڤایا دلێن كوردان برینداركرنه‌ڤه‌ هه‌ر ژ به‌رهندێ یا گرنگه‌ ملله‌تێ كورد به‌رى هاڤێتنا هه‌ر پێنگاڤه‌كێ هزارا هندێ بكه‌ت كو ئێدى چ جارێندى دیتر خیانه‌ت و مێژوو خوه‌ دوباره‌ ناكه‌نه‌ ڤه‌.
سه‌رۆكێ حكومه‌تا هه‌رێما كوردستانێ نێچیرڤان بارزانى شیا هه‌ر زوى وێ په‌لا ئاگرى ب ڤه‌مرینیت و نه‌هلا زیانێن وێ قه‌واره‌یێ هه‌رێما كوردستانێ ب هه‌لوه‌شینیت ئه‌وژى هه‌ر زوى چه‌ندین پێنگاڤێن دبلۆماسى هه‌م ل سه‌ر ئاستێ جیهانێ و هه‌م ل سه‌ر ئاستێ نافخوه‌یى هاڤێتن و داخواز ژ هه‌موو لایه‌نێن سیاسى یێن هه‌رێمێ كر كو ئێك رێزییا خوه‌ ب پارێزن و چه‌ندین سه‌ردانێن دبلوماسى بۆ ده‌رڤه‌یى وه‌لاتى كرن وه‌كو فه‌ره‌نسا و چه‌ندین وه‌لاتێن دیتر و ئاسایكرنا په‌یوه‌ندییان لگه‌ل به‌غدا و وه‌لاتیێن جیران.
ل دوماهیكێ یا گرنگه‌ هه‌موو ملله‌تێ كورد هزر ددرستكرنا جڤاكه‌كێ مه‌ده‌نى و پێشكه‌فتى بكه‌ت كو ببیته‌ كێره‌ك بۆ قه‌تاندنا سیسته‌مێ عه‌شائیرى.