پشتی دڤان چەند رۆژێن بووری دا ھەرچار ئالیێن سیاسی ( بزۆتنەوا ئیسلامی – یەکگرتوویا ئیسلامی – کۆمەلا ئیسلامی و بزاڤا گۆڕان ) پشتی ، د سەرۆبۆرێن خۆ یێن ئۆپۆزسیۆنی و دەسھەلات داری دگەل حکومەتا ھەرێما کوردستانێ تۆشی شکەستنێ بووی و نەشیای دگەل واقعێ کوردستانێ بگۆنجن و درۆشمێن وان یێن چاکسازی و دیموکراستی بووینە درۆشمێن بریقەدارێن بێ کریار ، ل دووماھی ھەلبژارتنێن گشتی یێن عیراقێ ل ١٢/٥/٢٠١٨ بەراوور دگەل ھەلبژارتنێن بووری ڤان ھەرچار حزبا ھەتا راددەکێ زۆر جەماوەرێ خۆ لدەست دای . پشتی چەندین کۆمبوونا بریار دایە ، ھەڤپەیمانیەکێ پێک بین و پێکڤە بچنە بەغدا .
جھێ پسیارێ یە ، ئەرێ چەوا ئەڤ ھەرچار لایەنێن خودان ئایدیۆلۆژی و بیرێن ھەڤدژ دێ دگەل ئێک گۆنجن ...؟! .
بزوتنەوا ئیسلامی کو ب حزبا دایک یا بزاڤێن ئیسلامی ل کوردستانێ دھێتە ھژمارتن و ل سالا ١٩٨٧ ھاتیە دامەزراندن و دڤان سیە و ئێک ساڵێن تەمەنێ خودا نەشیایە دگەل جڤاکێ کوردستانێ بگۆنجین و جەماوەرەکێ زۆرێ کێم ھەیە ، چونکی ھەتا رادەیەکێ بزاڤەکە توند ڕەو بوویە و ب درۆشم ئارمانجا وان دەستوور و دەسھەلات ( قورئان و حەدیسن ) گرۆپێ توند رەو و تیرۆرستی یێن ( ئەنسار و الاسلام ) ب سەرۆکاتیا ( مەلا کرێکار ) و پاشان ( کۆمەلا ئیسلامی ) بسەرۆکاتیا ( عەلی باپیر ) لێ جودا بوونە و ناکۆکیێن کوور یێن ئایدیۆلۆژی دناڤبەرا واندا ھەنە .
کۆمەلا ئیسلامی کۆ بەری نھو پشکەک بوویە ل بزۆتنەوا ئیسلامی لسالا ٢٠٠١ ھاتیە دامەزراندن و پرۆگرامێ وێ (اھل السنە و الجماعە) یە .
یەکگرتوویا ئیسلامی ژی ، وەکی حزبەکا ئیسلامیا کوردستانی یا میانڕەو و نێزیک ل ھزرا ئیخوان و الموسلمین ، زۆر دگەل ئایدیۆلۆژیا حزبێن دیتر یێن ئیسلامی دھەڤ دژن و ھەتا راددەیەکێ گرنگیێ ددەتە لایەنێ نەتەوی و نشتیمانی .
بزاڤا گۆران ژی وەک حزبەکا علمانی و درۆشمێن نەتەوی و نشتیمانی بلند دکەت ، پشتی ل ئێکەتیا نشتیمانی کوردستان جودابووی ل سالا٢٠٠٩ ھاتیە دامەزراندن , وەک بزاڤەکا علمانیا نشتیمانی ، خۆ ب بزاڤەکا چاکساز خواز و رەوشەنبیر دیار دکەت ، لێ دڤان نەە سالان دا د ھەمی پرۆژێن خۆدا تووشی شکەستنێ بوویە و ل دووماھی ھەلبژارتن پرانیا جەماوەرێ خۆ لدەست دایە ، چ لدەمێ ئۆپۆزسیۆنێ یان د حکومەتێ دا .
ئەرێ ھەڤپەیمانیەکا لڤان ھزرێن ھەڤدەژ پێک بھێت دێ چەوا سەرگریت ..؟ ! ، ئەو چ ئارمانج و ستراتیژی یە وان کۆم دکەت ..؟ علمانیەت و ئیسلامیەت ..! یان ئیسلاما میانڕەو و ئیسلاما تۆند ڕەو ..! نەخاسمە ئەوێن ژ ئەنجامێ ناکۆکیا و دووبەرەکیێ ژێک جودا بووی .
ئەگەر ھەلگرێن پەیاما نەتەوی و نشتیمانی یا کوردستانی بن ، پێتڤی بوو دڤان کاودانان دا ناکۆکیێن خۆ یێن دگەل حزبێن دیتر یێن کوردستانی لادا بان و ب گۆتارەکا نشتیمانیا ئێکگرتی بەرامبەر لایەنێن سیاسی یێن عیراقی راوەستابان ژبوی چەسپاندنا مافێن دەستووری و یاسایی یێن خەلکێ کوردستانێ و بھێزکرنا پێگەھێ ھەرێمێ ژلایێ سیاسی و ئابووری .
ئەگەر مەبەستا وان دژایەتیا حکومەتا ھەرێما کوردستانێ ژی بیت ، ھەر وەکی بەری نھو ھندەک ژوان بۆ ڤێ چەندێ لدەمێن تەنگاڤ دا خۆ دناڤ حکومەتێ ڤەکێشای و ھندەکێن دیتر ژی داخاز ل حکومەتا عیراقێ دکر ئاستەنگا بۆ حکومەتا ھەرێما کوردستانێ درۆست بکەن و بۆدجە و مۆچێ ھەرێمێ ببڕن و ھێرشێن لەشکری بینە سەر ، لێ ب لێزانینا رێزدار نێچیرڤان بارزانی سەرۆکێ حکومەتا ھەرێما کوردستانێ و سیاسەتا پارتی دیموکراتی کوردستان ھەمی ئەو گاڤ و پیلانێن وان ھاتنە ھەلوەشاندن و گاڤێن داھاتی ژی یێن بڤی رەنگی سەرناگرن و ب گرانی دێ لسەر وان راوەستیت .
ئەز باوەرم ئەڤ ھەڤپەیمانیا وان لدەمەکێ زوو ئەگەر نەھێتە ھەلوەشاندن ژی دێ لەنگەر بیت ، بتایبەت یەکگرتوویا ئیسلامی ھەلگرا ھزرەکا تێکەرلا میانرەوا ئیسلامی و نەتەوی و نشتیمانی ، نەشێت دگەل وان بژیت ، ئەگەر دگەل بمینیت ژی جەماوەرەکێ زۆرێ خۆ دێ لدەست دەت و دبیت ببیتە ئەگەر دووکەرت بوونا وێ چونکی ھەڤپەیمانیەکا ئایدیولۆژیێن ھەڤ دژن .
ھەبوونا ڤێ ھەڤپەیمانیێ کاریگەری و پێگەھەکێ گرنگ د پەرلەمانێ عیراقێ نابیت چونکی ژمارەکا وەسا نینە کۆ ببنە کارتەکا فشارێ تنێ ( ١١ ) کورسی نە . ئەڤە بخۆ ژی نیشانێ ولاوازیا پێگەھێ وان یێ جەماوەری یە . و عیراقێ دێ سەرەدەریێ دگەل پارتی و ئێکەتیێ کەت وەک نوونەرێن کوردستانێ . کورد دبێژن سەرێ دوو بەرانا د قازانەکێ دا ناکەلیت ، ئەرێ چەوا سەرێ چار بەرانا دێ ل قازانەکێ دا کەلیت ..!