دناڤا هه‌موو جیهانێ دا ب هزاران ئایینێن جودا جودا هه‌نه‌ و ئه‌گه‌ر به‌رێ خوه‌ بده‌یه‌ پترییا ئایینان په‌یاما وان گرنگیێ دده‌ته‌ مرۆڤایه‌تیێ و دووركرنا مرۆڤان ژ كارێن خراب وه‌كو كوشتنێ و دزیێ و چه‌ندین خرابیێن دى.
سه‌رۆكێ حكومه‌تا هه‌رێما كوردستانێ نێچیرڤان بارزانى هه‌رده‌م رێز ل هه‌موو پێكهاته‌یێن هه‌رێما كوردستانێ گرتیه‌ بێى جوداهى و ته‌كید ل پێكڤه‌ژیانا ئایین و كێمه‌ نه‌ته‌وان كرییه‌ ئه‌ڤ چه‌نده‌ ژى ب تنێ كارێن مرۆڤێن سه‌ركرده‌ و خودان هزره‌كا فه‌كرى و دیسان دیتنه‌كا دوور بۆ پاشه‌رۆژێ و نابیت روولێ سه‌رۆكێ حكومه‌تێ د بیاڤى دا بهێته‌ ژبیركرن.
دیسان بارزانى ب گرنگى ڤه‌ بەحسا رۆلێ زانایێن ئۆلا ئیسلامی د ئاشتییا جڤاکی دا کر و دیاركر كو پرسا تیرۆرێ پرسه‌كا جیهانى و نێڤ ده‌وله‌تییه‌ و گرنگیدان ب وێ پرسێ ئه‌ركێ مامۆستایێن ئولی یه‌، لڤێره‌ یا گرنگه‌ مامۆستایێن ئولى ب جدى كار بكه‌ن بۆ نه‌هێلانا هزرا تیرۆرى و بۆ وه‌لاتیان ب سه‌لمینن كو ئایین یێ به‌رییه‌ ژ وان كه‌سان یێن ئایینى بۆ به‌رژه‌وه‌ندیێن خوه‌ یێن تایبه‌تى و گه‌هشتنا هنده‌ك مه‌ره‌مان بكار دئینن و دیار بكه‌ن كو ئه‌و كه‌سێن كوشتنێ دكه‌نه‌ به‌دیلێ پێكڤه‌ژیانى و ئارامیا هه‌رێما كوردستانێ تێكدده‌ن جهێ وان ل هه‌رێما كوردستانێ نابیت و دڤێت ئه‌و بار بكه‌ن، ژبه‌ركو وه‌لاتیێن هه‌رێما كوردستانێ ئازادى دڤێت و نه‌ڤێت ب زۆرى تشته‌ك ب وان دا بهێته‌ سه‌پاندن.
مامۆستایێن ئولى دشێن ب چه‌ندین رێكان روولێ خوه‌ ببینن بۆ نه‌هێلانا هزار تیرۆرێ وه‌كى ل سه‌ر مینبه‌ران دڤێت بهێته‌ رووهنكرن كو په‌یوه‌ندییا ئایینى ب چ ره‌نگان په‌یوه‌ندى ب هزرا توند ره‌وڤه‌ نینه‌ و هه‌ر گاڤا كه‌سه‌كى ئایین بۆ مه‌ره‌مێن توندكاریێ بكارئینا دڤێت ب توندى بهێته‌ سزادان و نابیت هیچ كه‌سه‌ك گوهدارییا وان كه‌سان بكه‌ت ئه‌وێن ئایینى بۆ تێكدانا ئارامیا هه‌رێمێ بكاردئینن.
هه‌روه‌سا مامۆستایێن ئولى دشێن ب رێكا راگه‌هاندنێ و گێرانا سمیناران بۆ وه‌لاتیان رووهن بكه‌ن كو ئه‌و كه‌سێن كارێن تیرۆرى دكه‌ن دوورن ژ ئۆلا ئیسلامێ و دڤێت ب هه‌ر ره‌نگێ هه‌بیت وه‌لاتی خوه‌ ژ ڤان كه‌سان دوور بكه‌ن.
یا گرنگه‌ وه‌لاتى ژى پیچه‌كێ هزرا خوه‌ بكه‌ن و چاڤێن خوه‌ ڤه‌ بكه‌ن به‌رێ خوه‌ بده‌نه‌ وه‌لاتێ تۆركیا كا چاوا ئایینى بۆ به‌رژوه‌ندییا وه‌لاتێ خوه‌ بكار دئینن یا گرنگه‌ مه‌ژى هه‌مان هزر هه‌بیت ئه‌م مفایى ئولا ئیسلامێ وه‌ربگرین بۆ چه‌ندین بیاڤان وه‌كو گه‌شتیارى وه‌كو جهێن ئایینى و دیسان لایه‌نێ ئابۆرى و ره‌وشه‌نبیرى و چه‌ندین بیاڤێن دیتر نابیت ئه‌م رێكێ بده‌ینه‌ هنده‌ك تیرۆرستان ب ساناهى ب هنده‌ك ته‌كبیران وى وه‌لاتى بكه‌نه‌ ئاگر و خوین.
ل دوماهیكێ دڤێت مامۆستایێن ئایینى مفایى ژ گوتارا نێچیرڤان بارزانى وه‌رگرن بۆ هندێ پتر خزمه‌تا جڤاكێ كوردى بكه‌ن ب هه‌موو پێكهاتێن وێڤه‌ كار بكه‌ن بۆ به‌لاڤكرنا هزرا ئاشتیێ و خه‌لكى ژى باشتر هشیار بكه‌ن بۆ هندێ گوهدارییا چ مه‌لایان نه‌كه‌ن كو مه‌ره‌ما وان به‌لاڤكرنا توندۆتیژى بیت و یا گرنگه‌ بزانین كو چ جارا دوژمن نه‌شێن خوه‌ هه‌مبه‌رى هه‌رێما كوردستانێ سه‌ر بكه‌ڤن و دیار بووژى كا گۆتارا نێچیرڤان بارزانى شكه‌ستن ب ته‌كبیرێن به‌غدا ئینا!