دەنگدا مافەکێ سرۆشتیێ ھەر وەلاتیەکێ ئاسایی و یاسایی یە د پرۆسا دیموکراسی دا ، رێگریکرن ل دەنگدانا خەلکەکی ، یان سۆستنا دەنگێن خەلکەکی . پرۆسا دیموکراسی لەنگەر دکەت و تاوانەکا دھێتە کرن . ھەرچەندە عیراق ل دیڤ دەستوور و یاسایان . وەلاتەکێ دیموکراسی یە و ب دەنگدانا ئازاد و دیموکراسیانە جڤاتا نوونەران و سازیێن دیتر دھێنە ھەلبژارتن .
ئەنجامێن دووماھی ھەلبژارتنێن جڤاتا نوونەرێن عیراقێ یێن ١٢/٥/٢٠١٨ کارڤەدانێن دژوار و جودا جودا پاش خۆ ھێلان ، چونکی لایەنێن دووراندی ، لایەنێن سەرکەفتی ب سەختەکار تاوانبار کرن ، پرانیا ئەندامێن جڤاتا نوونەرێن عیراقێ ئەوێن دووبارە خۆ کاندیکری ب دەستەیا سەرۆکایەتی ڤە ، تووشی شکەستنێ بوون . لەوما پەنا برە بەر تۆلڤەکرنێ ل خەلکی ، تاکۆ ئاگر بەردایە ھژمارەکا سندوقێن دەنگێن عوبارکری . ژبلی ھەڤرکیێن لایەنێن عەرەبی دگەل ئێک . بەرامبەر ھەرێما کوردستانێ ژی پەنا برە بەر رێکارێن نە دستووری و یاسایی ، وەک ھژمارنەکرنا دەنگێن دەرڤەی و تایبەت و پەنابەرێن ل ھەرێما کوردستانێ ب بریار و یاسایا پەرلەمانێ عیراقێ ل ٦/٦/٢٠١٨ . چونکی لسەر ڤان ئاستا ئەو لایەنێن عەرەبی و ھژمارەکا پارت و لیستێن کوردستانی تووشی شکەستنێ بوونە .
ئەگەر ئەڤ رەفتارێن پەرلەمانتارێن عیراقێ بەرامبەر ھەرێما کوردستانێ رەفتارێن تولڤەکرنێ و سزادانا خەلکی نەبن . چما تنێ دەنگێن تایبەت یێن ھەرێما کوردستانێ نەخاسمە یێن پێشمەرگەھێن کوردستانێ و دەنگێن سەدان ھزار ئاوارێن ھاتینە کوردستانێ ناھێنە ھژمارکرن .
ئەگەرمەبەستا وە تۆلڤەکرن و سزادانا خەلکی نەبیت . ژلایەکێ دیتر لسەر ئاستێ دەنگێن دەرڤەی وەلاتی لیستا پارتی پرانیا دەنگان بدەستڤە ئینا ، دەنگێن وان ژی ب ھەما شێوە لێکرن .
ئەڤ یاسا و بریارێن جڤاتا نوونەرێن عیراقا فیدرال ژبلی کو ، نە یاسایی و دەستووری نە و بریارا کەس و لایەنێن شکەست خوار و دووراندی نە و چ بھا ژلایێ خەلکێ خۆ نەمایە ژبەر شکەستنێن خۆ یێن سیاسی و ئابووری یێن سالێن بووری .
دبیت شوفینیێن عەرەب ئەوێن دڤیا پشتی راپرسیا سەرخۆبوونا کوردستانێ ل ٢٥/٩/٢٠١٧ ب ھێزا لەشکری قەوارێ سیاسی و ئیداری یێن ھەرێما کوردستانێ ژناڤ ببەن و ب رێنمایی یێن گرۆپەکێ خیانەتکارێن کوردستانێ ، ب ھەمی ھێز و شیانێن خۆ ھێرشی ھەرێما کوردستانێ کری و پرانیا دەڤەری ماددێ سەد و چل داگیر کری . پێشمەرگەھێن کوردستانێ ب بەشداری و سەرپەرشتیا سەرۆک بارزنی و پارتی دیموکراتی کوردستان ، خەونا وان کرە خەیال و ب مەردانە بەرسینگێ حەشتا شەعبی و پاسدارێن ئیرانی گرت بۆ داگیرکرنا کوردستانێ و ل (پردی و سحێلا و مەحموودیێ ) مەزنترین داستان تۆمارکرن . ئەڤ سەرکەفتنێن پێشمەرگەھێن پارتی قەومارێ ھەرێما کوردستانێ پاراست و جیھان حیبەتی کر و حکومەتا عیراقێ ژی نەچار کر دەست ب دیالۆگێ بکەت .
دیارە بڤان بریارا پەلەمانێ عیراقێ و لایەنێن دووراندی دڤێت ب ھژمار نەکرنا دەنگێن پێشمەرگەھێن کوردستانێ تۆلا داستانێن (پردی و سحێلا و مەحموودیێ ) ل پێشمەرگەھێ کوردستانێ بکەنەڤە کۆ ھیڤیێن وان ژناڤبرنە .
جھێ مخابنیێ یە پارت و قەوارێت سەرنەگەفتی یێن ھەرێما کوردستانێ دڤان ھەلبژارتنان دا بووینە دیڤەلانکێن ڤان عەرەبێت شۆفینی ، دژی پێشمەرگەھی و خەلکێ کوردستانێ پشتەڤانیا ڤان بریارا دکەن و چ ھزر بۆ پێشمەرگەھێ کوردستانێ نەکر و دەنگێن وان ھژمار نەکرن .
ئەگەر ئەڤ لایەنێن کوردستانێ ھەستا نەتەوایەتیێ و وەلاتینیێ ھەبیت ، بڤی رەنگی دژایەتیا مافێ پێشمەرگەھێن کوردستانێ یێن بووینە ئەگەرێ مانەڤا ھەرێمێ و پاراستنا ئێمناھیا خەلکی . جھێ پاداشتکرن و رێزگرتنا پێشمەرگەھی ، دێ دنگێ وان سوژن ..!
لێ دیارە کەس و لایەنێن پشتەڤانیا سۆتنا دەنگێن پێشمەرگەی کری ، پلە و پایە و بەرژەوەندێن تایبەت ، ل پێشمەرگەی و بەرژەوەندێن نەتەوی و نشتیمانی پیرۆزتر و گرنگترن ، پێتڤی یە پێشمەرگەە و خەلکێ کودردستانێ ، ڤان رەفتار و سەرەدەریێن وان ژبیر نەکەت و ل ھەلبژارتنێن داھاتی ڤان تۆلا لێ بکەنەڤە و پشتەڤانیا وان حزب و قەوارێن کوردستانێ بکەن ئەوێن دەسکەفتێن مە دپارێزن و مەزنتر دکەن و ئەو بخۆ پێشمەرگە.