ل دوازدەی مەها گولانێ هەلبژارتنێن جڤاتا نوونەرانن، هەرچەندە د ناڤا خەلکی دا، گەرم و گۆریا هەلبژارتنێن جارێن بووری و رێفڕاندۆمێ پێڤە دیار نینە، لێ پشکداری نەکرن، چو مفای ناگەهینیتە وەلاتییان.
د هەلبژارتنێن جڤاتا نوونەرێن ئیراقێ دا، هەموو پارت، قەوارە، بزاڤ و رەوت و هەڤپەیمانی و هتد.. یێن سیاسی، بانگەشەیا هەلبژارتنان دەستپێ کرینە و پرۆژەیێن خوە راگەهاندینە، لەورا پێدڤییە خەلک بێ ئومێدیێ بدەتە ئالییەکی و دوبارە پێداچوونێ د بڕیارا پشکدارینەکرنێ د هەلبژارتنان دا بکەن. ژبەر کو، هەر پارێزگەهەکێ چەند کورسیێن دەستنیشانکری هەنە، ئەگەر دەهـ هزار کەس یان ملیۆنەکا دەنگدەران پشکداری هەلبژارتنان بن، دێ هەر ئەو کورسی بۆ خەلکێ وێ پارێزگەهێ هێنە پڕکرن. بۆ نمۆنە، پارێزگەها دهۆکێ 12 نوونەر ل پەڕلەمانێ ئیراقێ هەنە و هەرچەند خەلک پشکداری دەنگدانێ بیت، 12 نوونەر دێ ژ پارێزگەها دهۆکێ بنە ئەندامێن پەڕلەمانێ ئیراقێ، لەورا بایکۆتا هەلبژارتنان، چو مفا نینە. یا گرنگ ئەوە پشکدار بین و بزانین کیژ ئالی دێ شێت مافێن مللەتێ کورد ل بەغدا پارێزیت، بزانین کیژ ئالی خودان هێز و کاریزمایە و ژبلی کو ئالیێن ئیراقی سەرەدەریێ دگەل دکەن، د ناڤا وەلاتێن رۆژئاڤا ژی دا پێگەهێ خوە هەیە.
ل گۆرەی یا ژ پارتێن سیاسی یێن هەرێما کوردستانێ دهێتە دیتن، پلان و پرۆژەیێن هەر ئالییەکی دیارن. ئالی هەنە سۆزان ددەن دوعایان بۆ مللەتێ کورد بکەن، نزا دوعا مە گەهیننە چ قووناغ؟ ئالی هەنە کو ژنوو ژدایک بووینە و خەونا ئیراقەکا بهێز و خودان سەروەری و زال دبینن، نزا مە چ مفا ژ ئیراقا بهێز و خودان سەروەری دیتی یە؟ ئالی هەنە پێشمەرگەیێ پیرۆزێ کوردستانێ ب میلیشیا ناڤ دکەن، ئەگەر پێشمەرگە میلیشیا بن، کێ ئەو پارت و بەرژەوەندیێن وان پاراستینە؟ ئالی هەنە ئەردێ کوردان دفرۆشنە شیعەیان، د هەموو دیرۆکا کوردان دا خەون ب ڤەگەراندنا بهۆست بهۆست ئاخا کوردان هاتینە دیتن، نزا فرۆشتنا ئاخێ دێ چ مفایی گەهینیتە مە؟ئالی هەنە خوە ب تڕامپێن نوو دزانن، نێ خۆ مە خێر ژ سەرێ تڕامپی ژی نەدیتییە. ل بەرانبەر ڤان هەموو ئالی و ئالییان، ئالی هەنە دخوازن کورد ئێکدەنگ و بهێز بن بەرانبەر هێزێن سوننی و شیعی و پێشوەخت پێشنیاز کرییە؛ کورد ل دەڤەرێن ئالۆزی ل سەر، ب ئێک لیست پشکدار بن، لێ ژبەر بەرژەوەندیێن حزبی یێن بەرتەنگ، پێشنیاز هاتییە رەتکرن.
لەورا ب گرنگ نابینم هزر د بایکۆتا هەلبژارتنان دا بکەین کو ژبلی زیانان، چ مفایان ناگەهینیتە کوردان، بەلکو ل جهێ وێ، پێدڤییە هزر بکەین؛ کیژ ئالی دێ شێت زێدەتر بەرژەوەندیێن نەتەوەیی یێن کوردان پارێزیت؟ کیژ ئالی دێ شێت زێدەتر کوردان نێزیکی ئێک کەت و کەتە ئێک دەنگ؟ کیژ ئالی دێ شێت زێدەتر کار ل سەر ڤەگەڕاندنا مووچە و مافێن کوردستانییان کەت؟ کیژ ئالی دێ شێت بەلانسا پەیوەندیێن دگەل ئالیێن ئیراقی و پەیوەندیێن هەرێمی و نێڤدەولەتی راگریت؟