کۆربەندێ داڤۆس ئێک ژ گرنگترین کۆربەندێن ئابۆری یێن جیهانی یە، لێ ژبلی پەنەلێن ل سەر شاشەیان دهێنە دیتن و بابەتێن ب ئاشکرایی دهێنە بەحسکرن، سەرۆک و سەرکردەیێن وەلاتێن جیهانێ ب دەلیڤە بۆ کۆمبوونێن ل پشت پەردەیان دبینن و پشکدارییا شاندا هەرێما کوردستانێ ب سەرۆکاتییا سەرۆکێ جڤاتا وەزیران، گرنگییەکا تایبەت بۆ هەرێمێ هەیە.
د کۆربەندێ ئابۆری یێ جیهانی یێ ئەڤ سالە دا، سەرۆک و سەرکردە و سەرمایەدار و هەروەسا بازرگان و ئابۆرناس ژ زێدەتری حەفتێ وەلاتێن جیهانێ پشکدارن و پشکدارییا دۆنالد تڕامپ، سەرۆکێ ئەمریکا، گرنگییەکا تایبەت ددەتە کۆربەندی.
پشکدارییا شاندا هەرێما کوردستانێ گرنگییەکا تایبەتتر هەیە، ژبەر کو، بەری پشکدارییا داڤۆس، نێچیرڤان بارزانی، سەرۆکێ جڤاتا وەزیرێن هەرێما کوردستانێ، کۆمبوونەکا سەرکەفتی ل بەغدایا پایتەختێ ئیراقێ دگەل حەیدەر عەبادی کرییە و هەروەسا ئەنجامێن کۆمبوونێن دگەل حەسەن رۆحانیێ سەرۆکێ ئیرانێ و بەرپرسێن دی یێن ئیرانی ژی بۆ هەرێما کوردستانێ ئەرێنی بووینە، لەورا ب دەستپێکرنا دانوستاندنان دگەل بەغدا و ئیرانێ کو هەر ژ پشتی رێفڕاندۆما سەرخوەبوونا کوردستانێ، کۆمبوونا دگەل بەرپرسێن هەرێمێ رەت دکر، وەک دەستپێکەکێ بۆ چارەکرنا کێشەیان ب دیالۆگ دیار دبیت.
دەستپێکرنا دانوستاندنێن هەولێر و بەغدا کو ژ ئەگەرێ بزاڤێن دپلۆماسی و زمانێ نەرم یێ سەرۆکاتییا حکومەتا هەرێمێ بوو، ژ بۆ دەستپێکرنا دانوستاندنان و ئەنجامدانا رێکەفتنێن نوو دگەل وەلاتێن دەردۆر گرنگە و هەروەسا دەمێ دەستپێکرنا وان ژی گونجای بوو کو هەڤدەم دگەل دەستپێکرنا داڤۆس بوویە و داڤۆس ژی دەرگەهەکە کو شاندا هەرێمێ چاڤ ب ژمارەکا مەزن یا سەرکردەیێن وەلاتێن زلهێز بکەڤیت و د پەراوێزێن کۆربەندا ئابۆری دا، شاندا هەرێمێ کۆمبوون و رێکەفتنان دگەل وەلاتان بکەت.
هەروەسا ژ ئالییەکێ دی ڤە، شاندا هەرێمێ دێ ل داڤۆس دگەل عەبادی کۆم بیتە ڤە و کۆمبوون د چارچووڤەیێ داڤۆس دا ب ئامادەییا نوونەرێن وەلاتان، گرنگییەکا دی هەیە، ژبەر کو هەر ژ دەستپێکا تێکچوونا پەیوەندیێن هەرێم و بەغدا، هەموو وەلاتان هەمان داخوازییا هەرێما کوردستانێ هەیە، ئەوژی چارەکرنا کێشەیان ب دیالۆگ و د چارچووڤەیێ دەستووری دا.
هەرچەندە بەغدا و ژمارەکا پشتەڤانێن وێ د هەیاما سێ مەهێن بووری دا ب هەموو رەنگان فشار خستە سەر هەرێمێ، فرۆکخانە و ژمارەکا دەریێن سنۆری ل سەر هەرێمێ داخستن، بەردەوامی دا بزاڤێن خوە یێ ئاراندنا تەخەکا وەلاتیێن کوردستانێ، لێ حکومەتا هەرێمێ بەردەوامی دا سیاسەتەکا لسەرخۆ و سەرەدانێن فرەنسا، ئەلمانیا، ڤاتیکان، بەغدا و تەهرانێ و هەروەسا سویسرا، ئەنجامێن سیاسەتا نەرم و دپلۆماسیەتا هەرێما کوردستانێ بوون و نەبوونا کارڤەدانێن هشک ژ حکومەتا هەرێمێ بەرانبەر بنپێکاریێن دەستووری یێن بەغدا، بوویە ئەگەر کو پڕانییا ئالیێن پشتی رێفراندۆمێ دژی کوردستانێ راوەستاین، دوبارە دەست ب باشکرنا پەیوەندیێن دگەل هەرێمێ بکەن.