پشتی رودانێن ١٦ ئۆکتۆبەرێ سەرۆکێ حکومەتا ھەرێما کوردستانێ یێ بەردەوامە ل سەر بزاڤێن خوە بۆ زڤراندنا پێگەھەکێ بھێزتر بۆ ھەرێما کوردستانێ و ئەڤ چەندەژی دێ ب بۆرینا دەمی بۆ ھەموو وەلاتیان باشتر دیاربیت، بارزانی ژ فەرەنسا دەستپێکر و بەرەڤ ئەلمانیا چوو و ل جەم پاپایێ کاسولیکێن جیھانێ و ئەڤ کاروان خەباتا دبلوماسی دێ یا بەردەوام بیت تا ھەرێما کوردستانێ ژ پیلانێن بەغدا و دۆژمنێن کوردان بھێتە پاراستن.
ھەر بەردەوامییا پشتەڤانیکرنا مانا ھەرێمەکا بھێز د چارچوڤێ دەستۆرێ عیراقێ دا رێکس تیلەرسوسن وەزیرێ دەرڤە یێ ئەمریکا پەیوەندییەکا تلەفونی یا گرنگ لگەل نێچیرڤان بارزانی سەرۆکێ حکومەتا ھەرێما کوردستانێ ئەنجامدا ئەڤێ پەیوندیێ چەندین مفایێن خوە ھەنە ھەم ل سەر ئاستێ جیھانێ و ھەم ل سەر ئاستێ ناڤخوەیا عیراقێ، ژبەرکو ئەڤە پەیامەکا گرنگەژ ئەمریکا بۆ ھەموو جیھانێ و ب تایبەتی بۆ ئیران و عیراقێ کو ئەم پشتا خوە نادەینە کوردان و دڤێت ھوین سنۆرێن خوە بزانن و کورد ھەر دۆستێن مە یێن گرنگن و ئەگەر ئەم بەرێ خوە بدەینێ دێ بینی عیراق ژی ھێدی ھێدی یا دھێتە دانوستاندنان و ئەو باش دزانیت نەشێت ھەرێما کوردستانێ ب ھەلوەشینیت و یا نەچارە مافێن کوردان بدەتێ.
ئەمریکا دڤێت ب رێکێن خوە یێن تایبەت بەغدا نەچار بکەت ھەموو مافێن کوردان بدەتێ ب تەمامی ھەموو دەستۆرێ عیراقێ بھێتە جێبەجێکرن و بۆڤێ پێنگاڤێ ئەمریکا بەردەوام گشڤاشتنکرینە، بەس وەکو پێدڤی نەبووینە، بەلێ نوکە بۆ ئەورۆپا و ئەمریکا و ب تایبەتی ئەمریکا مانا ھەرێمەکا بھێز یا تایبەتی بیت ب کوردانڤە یا گرنگە و ئەستەمە ئەمریکا دەستان ژ کوردان بەربدەت و ئەڤ پەیوەندییا رێکس تیلەرسوسن لگەل نێچیرڤان بارزانی بەلگەیە بۆ ھندێ کو ئێدی ئەمریکا دێ پتر گڤشاتنان ل بەغدان کەت و ناھێلیت بەغدا ب کەیفا خوە یاریا ب ژیانا مللەتێ کورد بکەت کو ب درێژاھییا مێژوویێ قوربانیداینە بۆ ئازادبوونێ.
بەردەوام و ھەموو دەمان سەرۆکێ حکومەتا ھەرێما کوردستانێ یا دوپاتکری کو ئەو لگەل دانوستاندنانە و دژی ھەر توندوتیژیەکێنە و گرنگییا ڤێ پەیوەندیێ ژی ئەو کو ئەمریکا ژی دڤێت ھەموو کێشە و ئاریشێن ھەرێم و بەغدا ب رێکا دانۆستاندنێ بھێنە چارەسەرکرن و دنوکە دا پشتەڤانیکرنا واشنتۆن بۆ ھەرێما کوردستانێ یا گرنگ و کاریگەرە و دێ چەندین دەستکەفتن بۆ ھەرێما کوردستانێ ھەبن و ل داھاتی ژی دێ ڤان دەستکەفتنان ب چاڤێن خوە بینین.
بێگومان دڤێ قوناغا ھەستیاردا ئەڤ پەیوندییا تلەفونی ھاتە ئەنجامدان و ئەمریکا باش دزانیت نوکە ب شێوەیەکێ جدی ھەرێما کوردستانێ و بەغدا یێن ل سەر چەندین ئاستان دانۆستاندنێ دکەن و ئەڤ پەیوەندییە پتر بۆگڤاشتنایە ل سەر بەغدا و عەبادی و زێدەکرنا بۆدجەیا ھەرێما کوردستانێ و دانا مووچێن فەرمانبەرێن ھەرێمێز
ل دوماھیکێ ئەڤ پەیوەندییە بۆ دوپاتکرنێ یە ل سەر بھێزکرنا پەیوەندیێن دناڤبەرا واشنتۆن و ھەرێما کوردستانێ و نێچیرڤان بارزانی ژی رولەکێ سەرەکی یێ دیتی د بھێزکرنا ڤان پەیوەندییاندا و ل رۆژێن داھاتی ژی دێ چەندین پەیوەندیێن گرنگ یێن دبلوماسی و گرنگ بۆ ھەرێما کوردستانێ ب چاڤێن خوە بینی ب تنێ دڤێ قوناغێ دا یا گرنگ ئەوە کورد بەردەوام بن ل سەر ژناڤبرنا گەندەلیێ و سەر ئێخستنا پرۆژێ چاکسازیێ.