پشتى بۆ جیهانێ دیاربووى كو به‌غدا به‌رامبه‌رى هه‌رێما كوردستانێ نیازێن وێ باش نینن و حه‌زا ئاشتیێ و پێكڤه‌ژیانێ نینه‌ و باوه‌رى ب دیموكراسیه‌تێ نینه‌ و یا به‌رده‌وامه‌ ل سه‌ر سزادانا وه‌لاتیێن هه‌رێما كوردستانێ فه‌ره‌نسا بوو ئێكه‌م جار بشێوه‌یه‌كێ راسته‌وخوه‌ پێشوازییه‌كا گه‌رم ل نێچیرڤان بارزانى كر و گۆته‌ ده‌ستهه‌لاتدارێن به‌غدا هه‌رێما كوردستانێ نه‌پاریه‌كێ ب ساناهییه‌ كو هین ب كه‌یفا خوه‌ ب داعیرن و ئێدى رێكێناده‌ین مافێن كوردان بهێنه‌ بنپێكرن و پاشى ئه‌لمانیا پێشوازییه‌كا مه‌زن ل سه‌رۆكێ حكومه‌تا هه‌رێما كوردستانێ كر و ڤێ سه‌ره‌دانێ پتر پشت راستى دا ملله‌تێ كورد و په‌یامه‌كا بهێزژى دا به‌غدا و حكومه‌تا هه‌رێما كوردستانێ یا ب تنێ نینه‌ و ئه‌م وه‌كو ئه‌لمانیا دۆستێن كورداینه‌ ل رۆژێن خوه‌ش و نه‌خوش.
هه‌روه‌سا سه‌ره‌دانا سه‌رۆكێ حكومه‌تێ نێچیرڤان بارزانى بۆ وه‌لاتێ ئیتالیا و پێشوازییا گه‌رم یا پاپا فرانسیس پاپایێ كاسولیكێن هه‌موو جیهانێ گرنگییا خوه‌ یا تایبه‌ت هه‌یه‌ و رولێ پاپاى روله‌كێ گرنگه‌ د چاره‌سه‌ركرنا هه‌موو كێشه‌ و ئاریشێن جیهانێ دا و بێ گومان پاپا دشێت ل سه‌ر ئاستێ نیڤده‌وله‌تى بۆ چاره‌سه‌كرنا كێشه‌ و ئاریشێن دناڤبه‌را هه‌رێما كوردستانێ و حكومه‌تا عیراقێ رولێ خوه‌ ببینیت و ئه‌ڤ كێشه‌ و ئاریشه‌ ب رێكێن ئاشتیانه‌ بهێنه‌چاره‌سه‌ركرن و رێز ل مافێن كوردان بهێنه‌گرتن.
وه‌كى یا دیار به‌غدا سیاسه‌ته‌كا دۆژمنكارانه‌ لگه‌ل هه‌رێما كوردستانێ دكه‌ت و یا هه‌موو بزاڤان دكه‌ت، هه‌رێما كوردستانێ دابریت لگه‌ل هه‌موو جیهانێ و به‌لگه‌ژى بۆڤێ چه‌ندێ ئه‌وه‌ كو به‌غدا رێنه‌دا وه‌زیرێ به‌رگرییا به‌لجیكا سه‌ره‌دانا هه‌ولێرێ بكه‌ت، به‌لێ (ستیڤن ڤاندیپیت) وه‌زیرێ به‌رگرییا به‌لجیكا ره‌تكر كو ئه‌و سه‌ره‌دانا به‌غداژى بكه‌ت ئه‌ڤ چه‌نده‌ژى دۆژمناتییا به‌غدا به‌رامبه‌رى هه‌رێما كوردستانێ پشتراست دكه‌ن و ئێدى چ گومان نامینن.
دیسان پاپا دوعا بۆ هه‌رێما كوردستانێ دكه‌ت و داخازا ئاشتى و پێكڤه‌ژیانێ بۆ هه‌موو پێكهاتێن هه‌رێما كوردستانێ دكه‌ت.
بێ گومان ئه‌ڤ سه‌ره‌دانه‌ دێ ل داهاتى پتر به‌رهه‌مێ وێ دیار بیت دێ ره‌وشا هه‌رێما كوردستانێ به‌ره‌ڤ باشتر چیت و نه‌خوه‌شیێن چه‌ند سالێن بۆرى دێ بنه‌ خوه‌شى و سه‌ركه‌فتن بۆ هه‌رێمێ، ژ به‌ركو ئه‌ڤه‌ حه‌زا وه‌لاتێن زلهێزه‌ بۆ مانا هه‌رێمه‌كا بهێز و خودان پێگه‌هـ ل سه‌ر ئاستێ هه‌موو جیهانێ، به‌س مخابن هێشتا پترییا پارتێن سیاسى یێن هه‌رێما كوردستانێ لاڤ لاڤێ بۆ به‌غدا دكه‌ن و وه‌كو شاندێن حزبى سه‌ره‌دانا به‌غدا دكه‌ن بێى كو هیچ سه‌نگه‌ك و بهایه‌ك هه‌بیت.
ب پشت راستیڤه‌ سه‌رۆكێ حكومه‌تا هه‌رێما كوردستانێ نێچیرڤان بارزانى دێ ل داهاتى ژى چه‌ندین سه‌ره‌دانێن دبلوماسیێن گرنگ هه‌بن و ئه‌ڤ هه‌موو سه‌ره‌دانه‌ دێ د به‌رژوه‌ندییا هه‌رێما كوردستانێ دا بن و ل نێزیك دێ هاوكێشێن سیاسى ل رۆژهه‌لاتا ناڤه‌راست گورانكارى ب سه‌رداهێن و ئه‌ڤا نوكه‌ چێدبیت هه‌موو هاوكێشێن سیاسیێن ده‌مكینه‌.
ل دوماهیكێ یا گرنگه‌ هه‌موو پارتێن سیاسی ل هه‌رێما كوردستانێ ئێك ده‌نگ و ئێك رێزبن و هه‌ر ئه‌ڤ چه‌نده‌یه‌ دبیته‌ ئه‌گه‌رێ سه‌ركه‌فتنا ملله‌تێ كورد و پاراستنا هه‌رێما كوردستانێ ژ ده‌ستێن دۆژمنان.