نێچیرڤان بارزانى به‌ره‌ڤ پڕا سیێ یا زلهێزێن جیهانێ
شێرزاد نوری
پشتى كو حكومه‌تا هه‌رێما كوردستانێ هه‌موو رێ ل به‌ر به‌غدا ب شێوه‌یه‌كێ ئاشكرا ڤه‌كرین ژبۆ دانوستاندنان، پاشى پێشوازى ل بریارا دادگه‌ها فیدرال كرى ئێدى به‌غدا بێ ده‌نگى هه‌لبژارتیه و چ بهانه نه‌ماینه نه‌گرتین، لێ ب ڤشارێن وه‌لاتێن زلهێز به‌غدا دێ نه‌چاربیت ده‌ست ب دانوستاندنان كه‌ت ژبه‌ركو ره‌ڤینا به‌غدا ژ دانوستاندنان بتنێ ژبۆ وێ یه‌كێ یه هه‌ر كه‌سه‌ك خوه ل سه‌ر سه‌رێ ئێدى شه‌ریف بكه‌ت و بانگه‌شێ ژبۆ هه‌لبژارتنان بكه‌ت.
ل ده‌ستپێكا ڤێ مه‌هێ سه‌رۆكێ فره‌نسا ب داخوازه‌كا فه‌رمى سه‌رۆك وه‌زیر نێچیرڤان بارزانى داخوازكره فره‌نسا وه‌كو سه‌رۆكوه‌زیرێن ده‌وله‌تان ب دانانا ئالایێ كوردستانێ و نڤیسنا كوردى پێشوازى لێ هاتكرن، فره‌نسا ب هه‌موو ره‌نگه‌كى پشته‌ڤانیا خوه بۆ دانوستاندنا دیاركریه، لدووڤدا ژى په‌یوه‌ندى ب عه‌بادى كرییه بۆ وێ چه‌ندێ دانوستاندنان ده‌ستپێ بكه‌ن لێ بهانه هه‌ر ئه‌وبوویه كو رێفراندۆم ئه‌گه‌رێ نه‌كرنا دانوستاندنایه، لێ یا راست كو عه‌بادى ڤه‌دشێریت بتنێ كوشتنا ده‌مى تاكو هه‌لبژارتنێن ئیراقێ دهێنه‌كرن، ژبه‌ركو ئه‌قلیه‌تا سه‌ركرده‌یێن ئیراقێ ئه‌وه هه‌ر كه‌سێ ژ هه‌مویان پتر كوردان سزابده‌ت دێ پتر ده‌نگان بده‌ستخوه‌ڤه‌ئینیت. لێ سزادنا هه‌رێمێ ژ ئالیێ به‌غدا ڤه نه‌بوویه ئه‌گه‌ر كو رێك ل په‌یوه‌ندیێن هه‌رێمێ و وه‌لاتێن جیهانێ بهێنه‌گرتن، شاندا حكومه‌تا ب سه‌رۆكاتیا نێچیرڤان بارزانى چه‌ندین كۆمبوونێن گرنگ ل ئه‌لمانیا كرن و وه‌زیرێ ده‌رڤه‌یێ ئه‌لمانیا ب ئاشكراى پشته‌ڤانیا خوه بۆ هه‌رێمێ دیاركر و ئاماژه‌كر كو پشتى شه‌ڕێ داعشێ ژى دێ هاریكاربن بۆ ئاڤه‌دانكرنا ده‌ڤه‌رێن وێرانكرى، لێ یا گرنگ زیگمار گابریێلى ئاماژه بێ كرى كو ئه‌گه‌ر به‌غدا به‌رهه‌ڤ نه‌بیت دانوستاندنان د چارچووڤه‌یێ ده‌ستۆری دا دگه‌ل هه‌رێمێ بكه‌ت ئه‌و دێ نه‌چاربن هاریكاریێن خوه راگرن، ئه‌ڤه ژى ده‌لیڤه‌كا باشه كو به‌غدا نه‌چاربیت پێنگاڤا دانوستاندنان بهاڤێژیت ژبه‌ركو ئه‌لمانیا ئێك ژ وان وه‌لاتێن بهێزبوویه، كو هاریكاریا ئیراقێ دشه‌ڕێ دژى داعشێ دا كرى، دنها دا ژى ژماره‌كا مه‌زن یا شیره‌تكار و راهێنه‌رێن وان مه‌شقێ بهێزێن ئیراقێ دكه‌ن، سه‌رۆكوه‌زیرێن هه‌رێما كوردستانێ دهه‌موو پرێسكۆنفرانسان دا گۆتیه به‌غدا فه‌رموو دا دانوستاندنان د چارچووڤه‌یێ وى ده‌ستۆرى دا بكه‌ین یێ هه‌وه ئیمزا ل سه‌ركرى و كارپێ دكه‌ن، لێ نه‌به‌رهه‌ڤبوونا وان وێ چه‌ندێ دگه‌هینیت كو ئه‌گه‌ر ده‌ستۆرى جێ به‌جێ بكه‌ن دێ بن پێكاریێن وان دژى هه‌رێما كوردستانێ ئاشكرابن وبڤى ره‌نگى دێ ل هه‌مبه‌ر هه‌رێمێ لاوازبیت، هه‌ردیسا شیره‌تكارا ئه‌لمانیا ژى به‌حس لوێ چه‌ندێ كرى كو ئه‌و ب هوویرى چاڤدێریا ره‌وشێ نها یا هه‌رێمێ دكه‌ن دڤێت مافێ هه‌رێمێ بهێته دان هه‌ر لدۆر ڤى بابه‌تى دێ په‌یوه‌ندى ب سه‌رۆكوه‌زیرێن ئیراقێ بكه‌ت داكو ژ هه‌لوه‌ستێ خوه بهێته خوار رێكێن دانوستاندن ل گۆرى ده‌ستۆرى بگریته به‌ر، پشتى سه‌ره‌دانا وه‌لاتێ ئه‌لمانیا ژ سه‌ره‌دانێن گرنگ یێ بارزانیێ سه‌رۆك وه‌زیر كو وه‌لاتێ به‌ریتانیایه ترێزامه‌ى د په‌یوه‌ندى خوه‌یا ته‌له‌فونى دا ره‌وشا هه‌رێمێ یا پشتى شازده‌ى ئوكتۆبه‌رێ دگه‌ل سه‌رۆكێ وه‌زیران گه‌نگه‌شه‌كرى داخوازكریه وه‌لاتێ خوه دده‌مه‌كێ نێزیك دا ئه‌و سه‌ره‌دان ژى دێ هێته‌كرن، وه‌لاتێ به‌ریتانیا ژى مینا وه‌لاتێ ئه‌لمانیا دشێت فشاران بێخیته سه‌ر به‌غدا كو مافێ هه‌رێما كوردستانێ برێكێن ده‌ستۆرى بده‌ت و ئێدى ده‌ست ژوان بێنپێكاریان به‌رده‌ت ده‌رباره‌ى هه‌رێما كوردستان.
لڤێرێ حكومه‌تا هه‌رێمێ دڤێت هزر دوێ چه‌ندێ دا بكه‌ت كو دده‌مێ هه‌لبژارتنان حزبێن ده‌ستهه‌لاتدار ل ئیراقێ گه‌له‌ك پێدڤى هه‌رێمێ دبن پشتى كو هه‌رێمێ سزادده‌ن، وه‌لاتیێن ئه‌ره‌بێن ئیراقێ ژخوه رازى دكه‌ن، دێ بزاڤان كه‌ن ب هه‌موو رێكا خوه ل به‌ر هه‌رێمێ شرین بكه‌ن، ژبه‌ركو هه‌ر حزبه‌ك یان كه‌سه‌كێ به‌ربژار و كورد پشته‌ڤانیێ لێ بكه‌ن بێ كۆمان دێ پۆستێ سه‌رۆكوه‌زیران وه‌رگریت، دنهادا دیسا مالكى هه‌لوه‌ستێ خوه تا راده‌یه‌كى هه‌مبه‌ر هه‌رێمێ نه‌رم كرییه، ژبۆ وێ یه‌كێ ڤێ جارێ ژى بۆ خوه بده‌لیڤه ب بینیت كو كورد پشته‌ڤانیا وى بكه‌ن لێ ئه‌ز باوه‌ردكه‌م ئه‌و سه‌ربۆرا دگه‌ل مالكى چ جاران ناهێت ژبیركرن، ل دڤى ده‌مى دا ئێكگرتنا حزبێن كوردى گرنگه بۆ پێكئینانا هه‌ڤپه‌یمانیه‌كا نشتیمانى ژ هه‌موو حزبان دژى وێ یه‌كێ بن هه‌ڤدوو تۆمه‌تبار بكه‌ن به‌لكو ل سه‌ر وێ چه‌ندێ كاربكه‌ن دێ چاوا دژى به‌غدا راوستن و پێگه‌هێ خوه بهێزكه‌ن دده‌مێ كرنا هه‌لبژارتنان دا هێزا خوه ل سه‌ر یا وان ب سه‌پینن.
