ب درێژاھییا مێژوویێ مللەتێ کورد توشی کارەساتان بوویە و چەندین روودانێن مەزن ب سەری ھاتینە ل ڤێرە ئەگەر ئەم خواندنەکا لوژیکی بۆ بارودوخێ ھەرێما کوردستانێ بکەین دێ بینین کو یا د قوناغەکا ھەستیاردا دەرباز دبیت ئەڤە ژی وێ چەندێ ناگەھینیت کو ھەرێمێ خواندنەکا خەلەت بۆ ڤێ قوناغێ کرییە، بەلکو ھەموو رۆژھەلاتا ناڤەراست یا دقوناغەکا مێژوویی دا دەرباز دبیت و بێگومان دێ گورانگاریێن مەزن دروست بن و دھێتە چاڤەرێکرن شەرێ ھەڤسەنگییا ھێزێ یان کێمکرنا روول و پێگەھێ ھەژموونا ئیرانێ بھێتەکرن.
بێگومان حکومەتا ھەرێما کوردستانێ بۆ دەربازکرنا ڤێ قوتاناغا ب زەحمەت بەرنامێ خوە یێ تایبەت ھەیە و ب تایبەتی سەرۆکێ حکومەتا ھەرێما کوردستانێ نێچیرڤان بارزانی کو پێشوەختژی دوپاتی ل ئێکرێزییا ھەموو پێکھاتەیێن ھەرێما کوردستانێ کرییە بۆ دەربازکرنا ڤێ قەیرانێ و یا گرنگە ھەموو پارتێن سیاسی پێکڤە بەرژوەندیێن خوە یێن حزبی و کەسی پاڤێژن و بھێنە پال بەرژەندیێن گشی، ژبەرکو پاراستنا بەرژوەندیێن گشی پاراستنا ھەرێما کوردستانێ یە کو نوکە ژ لایێ شوفینێن بەغداڤە بزاڤێن مەزن دھێنەکرن ئەڤ ھەرێمەژی نەمینیت، بەس ئەگەر ئەم ھەموو ئێک دەنگ بین نەک بەغدا بەلکو دونیا ھەموو نەشێت خەونێن مە ژناڤ ببەت.
چوونا سەرۆکێ حکومەتێ نێچیرڤان بارزانی بۆ ئەلمانیا مزگینیەکا گەلەک خوشە بۆ ھەموو مللەتێ کورد و ھێشتا پێگەھێ ھەرێما کوردستانێ یێ بھێزە ل سەر ئاستێ جیھانێ بێگومان ڤێ سەرەدانێ دێ چەندین دەستکەفتێن مەزن بۆ ھەرێما کوردستانێ ھەبن وەکو گڤاشتن ل سەر بەغدا و عەبادی زێدەتر لێھێن بۆھندێ بھێتە دانوستاندنان و ھەموو کێشە و ئاریشە ب رێکا دانوستاندنێ بھێنە چارەسەرکرن و سەرۆکێ حکومەتێ ھەردەم گوتیە ئەم دژی خوینرشتنێی نە و دگەل ئاشتی و پێکڤەژیانێینە و ئەلمانیا چ جارا پشتا خوە نادەتە ھەرێمێ و دێ بەردەوام کوردان پارێزیت و چەندین جاران پەیوەندیێن خوە دگەل چەندین وەلاتان تێکداینە بۆ خاترا کوردان ئەگەر بەرێ خوە بدەینە ئەلمانیا ل ڤان رۆژێن بۆری وەزیرێ دەرڤە یێ وی وەلاتی سەرەدانا خوە بۆ بەغدا ھەلوەشاند، ژ بەرکو عەبادی رێگربوو سەرەدانا ھەرێما کوردستانێ بکەت، بەس ئەڤ چەندە نەبوو ئاستەنگ ھەمبەری دیدارا سەرۆک وەزیرێن ھەرێما کوردستانێ و حکومەتا ئەلمانیا، ژ بەرکو وەلاتەکێ وەکو ئەلمانیا چ حسابەکێ بۆ بەغدایەکا وێران بوویی و تائیفی ناکەت ھەر ژ بەرھندێ گەلەک پێڤە نەچوو نێچیرڤان بارزانی داخوازکر سەرەدانا ئەلمانیا بکەت و بشێوەیەکێ فەرمی دێ چەندین دیدارێن گرنگ ل گەل راوێشکارا ئەلمانیا ئەنگێلا مێرکل کەتن و وەزیرێ دەرڤە و بەرگریێ کەتن ل دور چەندین مەلەفێن گرنگ.
بەغدا نەشێت ھەمبەری بزاڤێن دبلوماسیێن حکومەتا ھەرێما کوردستانێ ب راوەستیت، ژ بەرکو ھەرێما کوردستانێ نوکە ل سەر ئاستێ ھەموو جیھانێ یا بزاڤەکا مەزن یا دبلوماسی دکەت بۆ ھندێ پەیوەندیێن بھێز دگەل چەندین وەلاتێن زلھێز دروست بکەت و دیسان ب سیاسەتا نەرم و واقعیانە یا حکومەتا ھەرێما کوردستانێ حەقی و مافێن کوردان پتر بۆ جیھانێ دیار دکەت و نەحەقی و کەرب و کینا عەبادی و بەغدا بەرامبەری وەلاتیێن ھەرێمی پتر بۆ جیھانێ دیار بیت و نوکە جیھان باش دزانیت نزانێن بەغدا بتنێ ژناڤبرنا کوردانە و نەھێلانە ھەرێمێ یە ھەر، ژ بەرھندێ ئەڤرۆکە عەبادی نەشێت یاریێ لگەل وەلاتێن ئەورۆپی بکەت و ناخێ خوە یێ رەش ڤەشێریت و ب پشت راستیڤە پشتی چەند رۆژەکێن دیتر دێ پتر روویێ راستەقینە یێ عەبادی بۆ ھەموو کوردستانێ و جیھانێ دیار بیت و رۆژ بۆ رۆژێ دێ پێگەھێ ھەرێمێ ل سەر ئاستێ جیھانێ بھێزکەڤیت.
ل دوماھیکێ یا گرنگە حکومەتا ھەرێمێ لەزێ د نەھێلانا گەندەلیێ دا بکەت و مللەتێ کورد ھەموو پشتەڤانیا حکومەتا خوە بکەن بۆ ھندێ زووتر ژ ڤێ قەیرانێ رزگار ببین.