ریكۆردێن عه‌بادى ب چ كه‌سه‌كى ناهێنه شكاندن!!
کارزان فەقێ
ئیراق د گه‌نده‌لیێ دا بێ ركابه‌ره:
دو سالان ل سه‌ر ئێك ئیراق ب گه‌نده‌لترین وه‌لاتێ جیهانێ ژلایێ گۆڤارا فۆربس هاتییه دانان و نها ژى چواره‌م وه‌لات بۆ گه‌نده‌لیێ دهێته دانان، ل گۆرى گۆتنا سه‌رۆكێ به‌رێ یێ ده‌سته‌یا نه‌زاه‌هه‌یا ئیراقێ، هزاران ملیۆن دۆلارێن ئیراقێ نها دبه‌رزه‌نه و ژ ئیراقێ هاتینه ده‌رخستن، ئه‌ڤه بخوه ئاماژه‌یه‌كه كو ئیراق و سه‌رۆك وه‌زیرێ وێ حه‌یده‌ر عه‌بادى ده‌ما وه‌سا باس ل گه‌نده‌لیێن هه‌رێما كوردستانێ دكه‌ت، ژ بۆ په‌رده‌پۆشكرنا وان گه‌نده‌لییانه كو ژلایێ حزبا وى (ده‌عوه) هاتیه كرن، ناڤه‌شێرم كو دڤێ خالێ دا عه‌بادى سه‌ركه‌فتى بوویه و شییایه گه‌نده‌لێن خوه و حزبا خوه ڤه‌شێریت و خه‌لكێ ئیراقێ هه‌موویێ ب ئاریشیه‌یێن جوداخوازێن كوردستانێ مژوول بكه‌ت.
به‌غدا نه ئارامترین پایته‌ختێ جیهانێ یه، ئو هه‌ولێر؟!
به‌غدا ئه‌و پایته‌ختێ كو ده‌مه‌كێ شاهێ ئیماراتێ خه‌ومن پێڤه ددیت و دگۆت رۆژه‌كێ دێ دووبه‌ى وه‌كو ئیماراتێ جوان و خوه‌ش كه‌م، لێ نها رۆژنینه ده‌نگێ په‌قین و بۆمبه‌یان ژێ بلند نه‌بیت، ژ سالا 2003 و هه‌تا ئێك پرۆژه‌یێ گه‌شتیارى ل وى په‌یاته‌ختێ نه‌هاتییه بجهـ ئینان، داوى راپرسی ژى به‌غداوه‌كو نه ئارامترین پایته‌خت دناڤا نزیكى 200 وه‌لاتان دا هاتییه دانان، د ده‌مه‌كى دا هه‌ولێر ئه‌و پایته‌خته كو رۆژانه گه‌شتیارێن به‌غدایێ د هه‌مبێژا هۆتێل و مۆتێل و جهێن خوه‌یێن گوزارى دگریت، نه بتنێ گه‌شتیار ژى، به‌لكو هه‌رده‌م ماله‌كا ئارام بوویه ژ بۆ سیاسیێن ئیراقێ، كه‌واته ل ڤێرێ دڤێت ئه‌م بریارێ بده‌ین حكومه‌تا هه‌رێما كوردستانێ ب به‌راورد لگه‌ل حكومه‌تا ئیراقێ چ خزمه‌ته‌ك كریه؟
خه‌لكێ ئیراقێ و یێ كوردستانێ:
ل گۆرى راپرسییه‌كا سالا 2016 كو ل سه‌رانسه‌رى جیهانێ هاتییه كرن و ل هه‌ر وه‌لاته‌كى نیزكى چار هزار كه‌سان پشكدارى كریه، خه‌لكێ ئیراقێ بووینه دلته‌نگترین و بێهێڤیترین كه‌س ل سه‌ر ئاستێ جیهانێ (ل ڤێرێ خه‌لكێ كوردستانێ ب خه‌لكێ ئیراقێ نه‌هاتییه هژمارتن). كه‌واته ئه‌ڤه بخوه وێ یه‌كێ دگه‌هینیت، عه‌بادى ل سه‌رده‌مێ ده‌سته‌لاتداریا خوه نه‌ك ب تنێ نه‌شیایه ببیته جهیێ باوه‌ریێ بۆ خه‌لكێ ئیراقێ، به‌لكوو بوویه ئه‌گه‌رێ دلته‌نگییه‌كا زۆر ژى، چونكى ئه‌و گازنده‌یێن ئیراقییان ژ بۆ دادگه‌هكرنا تاوانبارێن راده‌ستكرنا ئیراقێ ب ده‌عشێ هه‌بوو؛ عه‌بادی نه‌شیا بجهـ بنیت، ژبۆى كو دڤى بیاڤى دا تلێ سكالایا خه‌لكێ ئیراقێ بۆ ناڤ چاڤێ عه‌بادى نه‌هێته ئاراسته‌كرن، عه‌بادى نه‌چاربوو ل ئه‌لته‌رناتیڤه‌كى بگه‌ریت كو ئه‌و ژى دژایه‌تیكرنا هه‌رێما كوردستانێ یه، دده‌مه‌كێ دا هه‌رێم نموونه‌یا ئارامى و پێكڤه ژیان و پێشكه‌فتنێ دناڤا ئیراقێ دا نیشان دایه، كه‌واته كیژان حكومه‌ت پتر خزمه‌تا خه‌لكێ خوه كریه؟
بۆدجه‌یا حه‌یده‌ر عه‌بادى و بودجه‌یا نێچیرڤان بارزانى:
ژ رۆژا عه‌بادى ده‌سته‌لات وه‌رگرتى و هه‌تا نها، ب قه‌رز و یه‌ده‌گا بانكا ناڤه‌ندى و ب پاره‌یێ فرۆتنا په‌ترۆلا ئیراقێ پتر500 ملیار دۆلارێن ئیراقێ ب ده‌ست خستیه و مه‌زاختییه، جهێ حیبه‌تى ئه‌وه شوونوارێ فلسه‌كا ڤێ بودجێ ناهیته دیتن، ئه‌ڤه دده‌مه‌كى دایه ل سالا 2005 و هه‌تا سالا 2016 بۆ ده‌مێ یازده سالان ژ بودجه‌یا ئیراقێ ب تنێ 72 ملیار دۆلار بۆ هه‌رێما كوردستانێ هاتییه، و ل ده‌مێ شه‌ر و قه‌یرانێ ژى د سێ سالێن بۆرى دا هه‌ر بوودجه‌یه‌كا ب ده‌ست حكومه‌تا هه‌رێمێ كه‌فتبیت ب رێكا سه‌رخوه‌بوونا ئابوورى بوویه و ناگه‌هیته 40 ملیار دۆلار كو ژ بۆ نیڤ مووچه‌یێن فه‌رمانبه‌ران دهاته ته‌رخانكرن، سه‌یر ئه‌وه كابینه‌یا عه‌بادى ب سێ سالان بوویه خوه‌دان پتر ژ 500 ملیار دۆلار، لێ هه‌رێمێ ب 11 سالان ب 72 ملیار دۆلاران، ب ڤێ یه‌كێ سه‌رۆكێ جڤاتا وه‌زیرێن هه‌رێمێ ئاستێ وه‌به‌رهێنان و پێشكه‌فتنێ گه‌هاندییه ئاسته‌كێ وه‌ها كو ب دیده‌ڤانیا سیاسیێن به‌غدایێ ژى دبێژن: ژ بۆ ئاڤه‌دانكرن، به‌غدا پێدڤى ب نێچیرڤانه‌كێ عه‌ره‌به.
نها ژى مه‌زنترین ئاریشه‌یا عه‌بادى ئه‌وه كو ل ئیراقێ خوه‌دان ده‌سته‌لات نینه و هه‌موو بریارێن شه‌رى و هێرشكرنێ ل ته‌هرانا پایته‌ختێ ئیرانێ دهێنه دان، حه‌شدا شه‌عبی ژى ژ وان نموونه‌یانه كو ره‌نگه سه‌رێ حكومه‌تا عه‌بادى بخۆت، ژ به‌ر به‌رى بریاریێن عه‌بادى ئه‌و لڤینان دكه‌ن و ڤێ یه‌كێ بوویه جهێ نه‌رازیبوونا ئه‌مریكا و جڤاكێن نێڤ ده‌وله‌تى، هه‌روه‌سا بریارا ده‌ستپێكرنا دانوستاندنا ژى دڤێت ل ته‌هرانێ بۆ بهێت ره‌نگه حه‌یده‌ر عه‌بادى نه‌كاریت ڤان ئاریشه‌یان ل هه‌مبه‌ر وه‌لاتێن جیهانێ ڤه‌شێریت، لێ شیایه ب دژایه‌تیكرنا حكومه‌تا هه‌رێما كوردستانێ خوه ب پارێزه‌رێ ده‌ستوری، نیشا گه‌لێ خێر نه‌دیتیێ ئیراقێ بده‌ت، غرورا وى هه‌ر ئه‌ڤه‌یه و نه چ دى!!
