ل هەموو وەلاتێن جیهانێ هەڤڕکییا پارت و ئالیێن سیاسی ل سەر کرنا کارێن باشتر و زێدەکرنا خزمەتگۆزارییانە، لێ ل ئیراقێ هەڤڕکی ل سەر دژایەتیکرنا پێکهاتەیان و ژناڤبرنا هەڤدوو یە.
ل وەلاتێن پێشکەفتی، سیاسەت و هەڤڕکی ل سەر دروستکرنا باوەریێ بۆ وەلاتییانە و خەلکێ دەولەتێن پێشکەفتی ژی ب وی رەنگی هزر دکەن، لێ ل ئیراقێ پارتێن سیاسی هەڤڕکیێ ل سەر ژناڤبرنا ئێک و دو دکەن و ئاریشا مەزن ئەوە کو عەقلیەتا خەلکی ژی ب وی رەنگی یە کو زێدەتر دبنە ئالیگر و پشتەڤانێن وێ پارتا سیاسی یا زێدەتر هێزێ بکار بینیت و ئالیێن دی ژناڤ ببەت.
یا د دوازدە سالێن بووری دا ل ئیراقێ روودای و تا ئەڤرۆ ژی رووددەت، بەردەوامییا سیاسەتێن پارتا بەعس و سەدام حسێنی یە. مالکی ل سەردەمێ دەستهەلاتدارییا خۆ نەشیا خزمەتگۆزارییان و ئێمناهیێ ل ئیراقێ پەیدا بکەت، لەورا ل دەمێ نێزیکی هەلبژارتنێن سالا دوهزار و چاردێ بووین، سیاسەتا ژناڤبرنا کوردان بۆ کێشانا جەماوەری بکار ئینا. گەفێن هێرشکرنا کەرکووک و دەڤەرێن دی یێن کوردستانی کرن، بودجەیا هەرێما کوردستانێ بڕی و بۆ ڤەشارتنا شاشیێن حکومەتا وی کرین کو مووسل و پڕانییا دەڤەرێن سوننەیان رادەستی داعشێ کربوون، هەر کارەکێ د شیانا وی دا هەی دژی کوردان کر و شیا ب رێیا وێ سیاسەتێ جەماوەرەکێ زێدەتر ژ یا پێشبینی بۆ دهاتە کرن، ل خۆ کۆم کەت و گەر ب فشارێن دەرەکی نەبا، نوکە ژی دا ل سەر کورسییا دەستهەلاتێ بیت.
یا نوکە حەیدەر عەبادی ژی دکەت، چو ژ سیاسەتێن سەدامی دوور نینە. عەبادی ژی هەمان پلانا مالکی بجهـ دئینیت داکو شاشیێن حکومەتا خۆ و ئەو گەندەلیێن زەبەلاح یێن حکومەتا وی کرین پنی کەت و خەلکی بکێشیتە لایێ خۆ، چو سیاسەت ژ دژایەتییا کوردستانێ کاریگەرتر نەدیتینە و هەرتشتێ شییای، دژی کوردان کرییە و ئەگەر د شیانا وی دا بیت، دوور نینە زێدەتر ژی بکەت. لەورا هەرچەند حکومەتا هەرێما کوردستانێ دەستپێشخەرییان دکەت کو کێشەیێن دگەل بەغدا ب دانوستاندن و رێیێن ئاشتیانە چارە ببن، عەبادی بێدەنگیێ دهەلبژێریت و تنێ بۆ ریکلام دبێژیت: ئامادەینە مووچەیێن فەرمانبەرێن کوردستانێ بدەین. لێ د راستی دا ئامادە نینە چو بودجەیی بۆ کوردستانێ بهنێریت، ئەگەر نە، حکومەتا هەرێما کوردستانێ ئامادەباشییا خۆ بۆ ئاشکراکرنا لیستێن ناڤێن هەموو فەرمانبەرێن کوردستانێ دیار کرییە و زێدەباری ڤێ، حکومەتا هەرێمێ ئەنجامێن رێفڕاندۆمێ راگرتینە، ئامادەیە دەریێن سنۆری و فرۆکخانە ب هەماهەنگی دگەل بەغدا بهێنە بڕێڤەبرن و هەروەسا پەترۆل ژی بۆ بەغدا بهێتە هنارتن، لێ عەبادی دزانیت بەرانبەر ڤێ هەموویێ کوردستانێ ئێک مەرج هەیە، ئەوژی بجهئینانا دەستووری یە و هەر وەختێ هەموو بەندێن دەستوورێ ئیراقێ بهێنە بجهئینان، بەغدا نەچارە وەک شریکەک سەرەدەریێ دگەل کوردان بکەت و سەرکردەیێن ئیراقی چو دەمان کوردستانییان وەک شریکێن خۆ نزانن، دخوازن ژ ئیراقێ ئارامی و ئاساییشا ل بەغدا و باژێڕێن دی هەی، کوردان ژی پشکەک هەبیت.
پرسیارەک ل ڤێرێ دهێتە کرن، ئەرێ یا ب دژایەتییا کوردان ب دەست مالکی ڤە هاتی، دێ ب دەست عەبادی ژی ڤە هێت؟ دبینم ئاسان نابیت، ژبەر کو ژبلی کو عەبادی د سالێن دەستهەلاتدارییا خۆ دا نەشیایە یا ژ وی دهاتە پێشبینیکرن، ل پارێزگەهێن شیعەیان ژی بکەت و تا نوکە رێ نەدایە سوننە ڤەگەڕنە باژێڕێن خۆ یێن وێران، مالکی هەڤڕکێ سەرەکی یێ عەبادی یە و مالکی ژ عەبادی زێدەتر سیاسەتێن بکارئینانا ‌هێزێ پەیرەو دکەت و زێدەتر نێزیکی ئیرانێ ژی یە و ژبەر کو ل ئیراقێ هەر ئالیێ دەستهەلاتێ بگریت، یێن دی ژناڤ دبەت، جەماوەر ژی دخوازیت ئالیێ سەرکردایەتییا مەزهەبێ وان دکەت، هێزا چەکداری هەبیت و لسەر ئالیێن دی زال بیت.
لایەنەکێ دی ژی یێ بابەتێ سیاسەتێن عەبادی ئەوە کو گەلەک هزرا هێزەکا مەزنتر بۆ خۆ دکەت و هزر دکەت هەر کارێ ئەو بخوازیت دشێت دژی هەرێما کوردستانێ بکەت، لێ ئەو هێزا نوکە وی هەی دگەل نێزیکبوونا هەلبژارتنان دێ هێدی هێدی ژ دەست دەت و هەموو هەڤڕکێن وی یێن شیعە و سوننە دێ بزاڤا کەن ب هەر رێیەکا بیت، شاشیێن حکومەتا وی و بنپێکاری و گەندەلیێن وێ ئاشکرا بکەن و زێدەتر عەبادی نەشێت هەرتشتێ بخوازیت بکەت و دوور نینە بزاڤان بکەت دوبارە ڤەگەڕیتە لایێ کوردان.