بەغدا- ھەڤپشکا نەخواستی و پێدڤی
پێشوار عەگید
خویایه كو هه‌ر ژ سالا 2005ێ و په‌سه‌ندكرنا ده‌ستوورێ ئیراقێ و قه‌بوولكرنا كورد و عه‌ره‌بان وه‌كو هه‌ڤپشكێن برێڤه‌برنا ده‌ستهه‌لاتا ئیراقێ، حكومه‌تێن ئێك ل دووڤ ئێك یێن به‌غدا ب هه‌موو رێیان ده‌ستوور بنپێكرییه و پشك و مافێن هه‌رێمێ خستینه بن ره‌حما خوه تا گه‌هشتییه بنده‌ستكرن و قۆتكرنا پشكا هه‌رێمێ ژ بودجه‌یا گشتى یا ئیراقێ و پڕكرنا پۆستێن سیادى یێن كوردان، هه‌لبه‌ت ل هه‌مبه‌ر ڤێ یه‌كێ حكومه‌تا هه‌رێما كوردستانێ رێیا خوه گرته به‌ر و ده‌ست ب ئاڤاكرنا ئابووره‌كێ بهێز و سه‌ربه‌خوه كر و شیا سه‌ركه‌فتیانه كوردستانێ ل هه‌مبه‌رى بازارێ جیهانێ بكه‌ته ناڤه‌نده‌كا گرنگا ئابوورى، لێ هێرشا كو ب به‌هانه‌یا رێفراندۆمێ هاتییه كرن، هه‌موو نیازێن حكومه‌تا ئیراقێ ده‌رخستن كو به‌غدا چه‌ند تێهنییا ژناڤبرنا ئه‌زموونا هه‌رێمه‌كێ یه كو د هه‌موو واران دا ل پێش ئیراقێ دهێت!
روودانێن 16ى ئكتوبه‌رێ ئه‌ڤه ب ئاشكرایى نیشاندا كو حكومه‌تێن ئێك ل دووڤ ئێك یێن ئیراقێ پشتى ئاڤاكرنا ئیراقا نوو ژى، هه‌مان فه‌رهه‌نگ و عه‌قلیه‌تا دۆرپێچكرن و بنده‌ستكرنا گه‌لێ كوردستانێ هه‌یه و ئیراقێ ب رێڤه‌كرن و هاریكارییا باله‌كێ ئێكه‌تیێ بێى شه‌ڕ كه‌ركووك و ده‌ڤه‌رێن ده‌ردوورا وێ داگیركرن، بڤێ یه‌كێ ژى هێزێن ئیراقى یێن كو ژبلى ده‌ڤه‌را كه‌سك یا ناڤه‌راستا به‌غداشیانێن گه‌ره‌نتیكرنا ئێمناهییا گونده‌كێ ئیراقێ ژى نینن، نها ئه‌و هێز وه‌كو سه‌ركه‌فتیێن شه‌ڕى سه‌ره‌ده‌ریێ دگه‌ل هه‌رێما كوردستانێ دكه‌ن و گه‌ر رێگرى و قاره‌مانییا هێزێن پێشمه‌رگه‌ى ل پردێ و ره‌بیعه و زومار و مه‌خموور نه‌با، ئیراق ب یا نها ژى رازى نه‌دبوو و دا میلیشیایێن خوه كێشیته سه‌ر سنۆرێ توركیا و فیدرالییا هه‌رێما كوردستانێ ژناڤبه‌ت!
یا گرنگ سه‌ره‌ده‌ریكرن و دانپێدانه ب روودانێن پشتى 16ى ئكتۆبه‌رێ كو ب ته‌مامى كه‌تواره‌كێ نوو هاتییه پێش و حكومه‌تا هه‌رێمێ ژ ئالیێ ئیراق، ئیران و توركیا ڤه هاتییه دۆرپێچكرن، ده‌ستپێشخه‌رییێن حكومه‌تا هه‌رێمێ یێن ده‌ستپێكرنا دانوستاندنان كو راگرتنا ئه‌نجامێن رێفراندۆمێ هێڤێنێ وان ده‌ستپێشخه‌رییان بوو، پاشان دابه‌شكرنا ده‌ستهه‌لاتێن سه‌رۆكێ هه‌رێمێ كو پشكا شێرى یا ده‌ستهه‌لاتێن بجهئینانێ ب به‌ر سه‌رۆكوه‌زیر نێچیرڤان بارزانى كه‌ڤت، ده‌لیڤه‌یه‌كا باش بۆ ده‌ستپێكه‌كا نوو دگه‌ل به‌غدا ده‌سته‌به‌ر كرییه، ده‌ستپێكه‌ك كو ره‌نگه ب دیتنا هند كه‌سان ژبه‌ر ژ ده‌ستدانا ده‌ڤه‌رێن كوردستانى و په‌ترۆلا كه‌ركووكێ هه‌رێم ل سه‌ر مێزا دانوستاندنان لاوازتربیت، لێ پێگه‌هـ و رۆل و ئه‌زموونا نێچیرڤان بارزانى دشێت هه‌ڤكێشه‌یێ د ئاراسته‌یا به‌رژه‌وه‌ندییا هه‌رێما كوردستانێ دا بگهۆریت، هه‌روه‌سا گه‌لێ كوردستانێ ژى هزر د راده‌ستبوون و شكه‌ستنێ ل هه‌مبه‌رى به‌غدا نه‌كرییه و نه‌چارنابیت، دڤان خالان دا دێ به‌رسڤا پرسا سه‌رى ده‌م:
1- ڤه‌گوهاستنا پترییا ده‌ستهه‌لاتێن سه‌رۆكاتییا هه‌رێمێ بۆ سه‌رۆكوه‌زیرانكو ب بریارا په‌ڕله‌مانێ كوردستانێ و پشته‌ڤانییا پترییا ئالییێن سیاسى بوو، دێ هێزه‌كا مه‌زنتر و كاریگه‌رتر ب شاندا هه‌رێمێ ده‌ت كو ب نوونه‌راتییا په‌ڕله‌مانێ كوردستانێ و هه‌موو ئالییان ده‌ست ب دانوستاندنان دگه‌ل به‌غدا بكه‌ت.
2- پشته‌ڤانییا وه‌لاتێن جیهانێ بوو ده‌ستپیشخه‌رییا حكومه‌تا هه‌رێمێ و نه‌چاركرنا به‌غدا بۆ دانوستاندن و دانا مافێن كوردان ب تایبه‌ت ژى ئه‌ڤ داخوازا هه‌رسێ وه‌لاتێن زلهێزێن جیهانێ ئه‌مریكا، رۆسیا و فره‌نسا یه كو دبیته فشاره‌كا مه‌زن ل سه‌ر ئیراقێ.
3- هه‌لبژارتنێن بهێت یێن ئیراقێ كو كورد ب پشكدارى و بایكۆتا خوه دشێن هه‌ڤكێشێ بگهۆرن، به‌غدا نه‌چاردكه‌ت بهێته ئاشێ هویر و ده‌ستبه‌ردارى دفن بلندى و غروورا خوه ببیت!
4- ره‌نگڤه‌دانا دژوار یا حكومه‌تا ئیراقێ ل دژى رێفراندۆمێ و بكارئینانا هێزێ ل دژى گه‌لێ كوردستانێ و ئاواره‌كرنا سه‌دان هزار وه‌لاتیێن كورد و كرستیانان هه‌ر ژ كه‌ركووك تا شنگالێ و سۆتن و وێرانكرنا مالێن وان كو ئه‌ڤه بخوه ل دژى ده‌ستوورێ ئیراقێ یه.
5- ئیراده‌یا گه‌لێ كوردستانێ و ئه‌زموون و رێبه‌رییا سه‌رۆكوه‌زیر نێچیرڤان بارزانى، ناهێلن دناڤبه‌را رێ نه‌دان ب جودابوونێ و نه‌دانا مافێن ده‌ستوورى دا، ئیراق به‌رده‌وامیێ ب فه‌رزكرنا سیاسه‌تێن خوه بده‌ت و به‌غدا نه‌چاره هه‌ڤپشكییا كوردان قه‌بوول بكه‌ت.
