میللەتی كورد،بەهۆی سەربخۆیخوازی و رٍەتكردنەوەی ژێردەستی تووشی ئابڵوقەدان بۆتەوە ..
رێبوار حەمەلاو شوانی
رووی راستەقینەكەی رژێمی ئێستای بەغدا كە بەردەوام لە بن پەردەی دەستوور و مافە دەستووری و قانوونیەكاندا حەشار دەدرا، هەر جارە و لە تەوژمێكدا هەڵدەماڵرا و لێمان دەردەكەوتەوە، جارێك لە روخساری ئیبڕاهیم جەعفەریی سەرۆكوەزیرانی ئەو كات و دواتریش لە روخساری نووری مالیكیدا كە پاش جەعفەری بوو بە سەرۆكوەزیرانی بەغدا، بەڵام جارێكی دیكەش پەردەی دیپلۆماسیانە بە سەر روخسارێكی دیكەدا درا و ئینجا حەیدەر ئەلعەبادی بە زمانێكی دیپلۆماتیك و سیاسیانەوە هاتەوە سەر سەكۆی سیاسەتی بەغدا و روخسارە راستەقینەكەیانی لێ شاردینەوە و دیسان كورد دڵی بەوە خۆش بۆوە كە بەشكم ئەوەیان لەوانی پێش خۆی جیاواز بێ.
دەسەڵاتی سێ ساڵەی حەیدەر عەبادی دەرحەق بە میللەتی كورد كورد لە هەڵسوكەوت و كردار و لێدوانەكانی ئەو روخسارەی بەغداشەوە تەواو لێی روون بۆوە كە لە میشل عەفلەقەوە تا دەگاتە سەدام و تا دەگاتە جەعفەری و مالیكی و عەبادی سەرلەبەریان یەك ئەقڵیەت و یەك سیستەمی بیركردنەوە و تێڕوانینن و كورد واتەنی هەموویان لە قوماشێكن. ئەوەندەیە، ئەو كاتەی كە دەسەڵاتیان نییە یان لاوازن، بە زمانێكی نەرمونیان دەدوێن و هەر تۆزێك لە شانوباهۆی خۆیان رادیت دەكەونەوە هەڕوگیڤ و فڕوفیشاڵ بەو جیاوازییەوە كە سادقترین و بێ پەردەترینی ئەو روخسارانە روخساری سەدام حوسێن بوو.ئەوان نایانەوێ بڵێن: میللەتێكی شەش ملیۆن كەسی، كە بە بێ ویستی خۆی وڵاتەكەیان خراتەوە سەر وڵاتی ئێمە و ئێمەش وەك كۆیلە سەیریان دەكەین، سەدەیەكە لێمان وەزاڵە هاتووە و پاش نەمانی بەعس لێی روون بووەتەوە ئێمەش فەرقێكی ئەوتۆمان لەگەڵ بەعس نییە بۆیە ریفراندۆمی كردووە و بڕیاری لە چارەنووسی خۆی داوە. هەرگیز شتی وا بە ئەقڵی شۆڤێنیی ئەواندا نایە، بۆیە هەم داوای هەڵوەشاندنەوەی ریفراندۆمەكە دەكەن و هەمیش داوای دادگایی و سزادانی سەركردایەتیی كوردستان.
دەرئەنجامی بێ ئومێدبوون لە رژێمە یەك لە دوای یەكەكانی بەغدا ، بەوەی ئێستاشەوە لەگەڵ ئەوەی كورد ، بناغەدانەر و دارێژەی دەستووری عێراقی نوێ بوو ، بەڵام عەقلییەتی دەسەڵاتدارانی عێراق وایكرد كە كورد چیتر بە هۆی سیاسەتە تاكرٍەویی وشۆڤێنییەكانیان زیان بە دۆز و ئایندەی میللەتەكەی دەگەێنێت . بۆیە لەپرسی سەربەخۆیی دەرکەوت کە سەرۆک بارزانی بەدرێژایی تەمەنی لەناو خەباتی ڕزگاریخوازی کوردستان، چەندە بەرپرسانە و ئەندازیار ئاسا داڕێژەری پلانی سەربەخۆیی کوردستان بوە، سەرکردەکانی جیهان، بەنمونە غاندی لە بەشێکی بڕیارەکانی دژی وڵاتانی داگیرکاری وڵات داوای پاڵپشتی لە میللەت دەکرد مان بگرن لەکڕین و بەکارهێنانی کەلوپەلی داگیرکار، واتە بەرپرسیارێتی دابەشدەکرد لەگەڵ میللەتەکەی .ئەوەی ئێستا میللەتی كورد، باجەكەی دەداتەوە ، رەتكردنەوەی ژێردەستی و پاشكۆییە و هەنگاونانە بەرەو ئایندە و چارەنووسی خۆی كە دامەزراندنی دەوڵەتی كوردستانە.
