ئەوەی بوێری لە ناوچاوەکانی داھەبێت،ئەو گولەیە نایکوژێ کە ئاراستەی دەکرێ
بەکر کەریم حەسەن
بوێری کە ئازایەتی و متمانەی تەواوە بە خودی خۆت گرنگە لە ھەموو تاکەکان بوونی ھەبێت، بەڵام ڕادەی بوێری جیاوازە، ئەوەی من مەبەستمە باسی بکەم (بوێری و پەروەردە و بوێری خوێندن و قوتابخانە) چۆن ئێمە بتوانین وا لە قوتابییە خۆشەویستەکانمان بکەین کەوا بوێر بن ئازا بن متمانەیان بە خۆیان ھەبێت، گومانی تێدانییە قوتابخانە دەتوانێ قوتابی بوێر بێنێتە بەرھەم ئەویش لە رێگای پڕۆگرام و مامۆستا دڵسۆزەکان ، دەستەی کارگێڕی قوتابخانە (بەرێوەبەر و یاریدەدەرەکان) پێویستە کار لەسەر ئەوە بکەین کەوا ھەردەم بواری قوتابی بدەن قسە بکات داخوازی ھەبێت و گلەیی بکات و چی دەوێت و چی پێویستە داوا بکات ئەوەش لە رێگای ڕەخساندنی زەمینەی لە بار بۆ قوتابیان کە ترسیان نەبێت کاتێک گفتۆگۆی بابەتێک دەکەن یانیش گلەییان لە بابەتێک ھەبێت و قوتابخانە بەھی خۆیان بزانن و ئەو چەمکە لایان درووست بێت کە قوتابخانە لە پێناو ئەوان درووست کرایە و بەرێوەبەر و مامۆستاکانیش بۆ ئەوان لە قوتابخانەن و مامۆستاکانیش ھەردەم کەشێکی وا درووست بکەین کە قوتابیان بەشداری بابەتەکان بکەن و داواکارییەکانیان بخەنە ڕوو بە شێوازێکی پەروەردەیی دروست و قوتابیان ڕابھێنن کە ھەموو ئەوانەی ڕۆژانە قسەیان لەگەڵ دەکەن وەکو خۆتان مرۆڤن و ھەموومان دروست کراوی خودای گەورەین و ھیچ ترس و شەرمی ناوێ لە خستە ڕووی ھەر بابەتێکی پێویست و پەسند.
زۆر جار دەبیستین و دەبینین لە قوتابخانەیەک زۆربەی قوتابیەکانیان بوێرن و خاوەن قسە و ڕەفتار و کرداری خۆیانن و خۆیان بە خاوەنی قوتابخانەکە دەزانن و وەکو ماڵی خۆیان، بێگومان بۆ دڵسۆزی و سەرکەوتووی دەستەی کارگێڕی و مامۆستاکان دەگەرێتەوە کەوا زیاتر گرنگی بنیاتنانی تاک دەدەن و دەیانەوێ قوتابیەکان قسە بکەن، بە پێچەوانە لە ھەندێ قوتابخانەی تر قوتابی شەرم دەکات داوای مامۆستا بکات و دەترسێ لە بەرێوەبەر، گەر باوکی ڕاسپاردەیەکی بۆ قوتابخانە ناردبێ ناوێری تخونی ژووری بەرێوەبەر و مامۆستاکان بکەوێت و ترس لە دڵی دا ھەیە و متمانەی بە خۆی نییە بچێتە لای بەرێوەبەر یان مامۆستاکان ئەو نموونەیە لەوانەیە لە چەندەھا قوتابی دووبارە دەبێتەوە، ئەوە دەگەرێتەوە بۆ چۆنیەتی پەروەردەکردن و کەسایەتی بەرێوەبەر و کارگێڕی کە ھەردەم قوتابیانیان سەرکوت ودەم کوت کرووە بواری دەربڕینی داواکاری و قسەکردنیان نەداوە لە قواتبخانە بێگومان ئەو نموونەیان سەرکەوتوو نییە ، چونکە زۆربەی قوتابیەکان لە ناخیان کۆمەلێ داواکاری و پێشنیار و پرسیار پەنگی خواردووە و ناوێرن بیدرکێنن کە بەدڵنیایی قوتابخانە بە مامۆستا و بەرێوەبەر وفەرمانبەران لە پێناو تێگەیاندن و پێگەیاندنی قوتابی لەوێن ، بۆیە لێرەوە گرنگە وەزارەتی پەروەردە شەفافانە و ڕاشکاوانە و قوتابخانەکان و بەرێوەبەرەکان ئاراستە بکات ڕاستەوخۆ یان لە رێگای سەرپەرشتیاران کەوا ھەردەم ھەوڵ دەدەین نەوەیەکی بوێر و ڕاستگۆ و متمانە بە خۆ و ئازا بھێنینە بەرھەم ، نەوەک نەوەیەکی شەرمن و ترسنۆک و بێ متمانە و داپلۆسراو و لاواز و ڕاڕا .
بێگومان ئایندەی میللەتەکەمان پێویستی بە کەسانی بوێرو ئازا و چاونەترس و ڕاستگۆ و دڵسۆز ھەیە، پێویستە ھەموومان لە ھەموو کەناڵەکانی پەروەردەیی لە بەرێوەبەری قوتابخانە تا بۆ ئاستی بەرێوەبەری گشتی و باڵا تر لە وەزارەت کەسانی بوێر و خاوەن ھەڵوێست و ڕاستگۆ و دڵسۆز و بەتوانا بەرپرسیاریەتی پێ بسپێردرێت کە دەتوانن بە پارێزراوی و بێ ترس و بێ کێشە بەرێوەی ببەن ، نەک خەڵکانی شەرمن و ڕاڕا و متمانە بە خۆە نەبوو بەرپرسیاریەتی پێ بسپێردرێ ئەوکات ھەر تەنھا خەریکی ڕازی کردنی ئەو کەسە دەبن کە ئەو پۆستەی بە دیاری پێشکەش کردوون و لەویشی دەزانن بۆیە پشت لە خەڵک و جەماوەر و پڕەسنیپە نەگۆڕەکان و خاڵە گرنگەکانی ئیشەکەی دەرئەنجام ئەو کەسە دۆڕاو دەبێ بە کۆمەڵگا و کەسەکان کە بێگومان بەشی ھەرە زۆری دەگەرێتەوە بۆ پەروەردە کردن و فێربوون و ژینگە و ڕاھاتنمان.
ماوەتەوە بلێم کەسانی بوێر و دڵسۆز و ڕاستگۆ و خاوەن ھەڵوێست حەز بە کەسانی وەکو خۆیان دەکەن لە ھەمان خاڵ ھاوبەشیان ھەیە و ھانیان دەدەن ڕۆڵ ببینین و بەرپرسیاریەتیان دەدەنێ، پێچەوانەکەشی ڕاستە بۆ کەسانی تر بەداخەوە.
بەکر کەریم حەسەن
بەرێوەبەری گشتی چاڵاکی وەرزش و ھونەر
ماستەر لە کارگێری پەروەردەیی
