بۆ دۆزینەوەی رێگای کوردایەتی گوێ لە موزایەدە و درووشمی بریقداری هیچ حزب و سەرکردەیەک ناگرم، چونکە ئەگەر نەڵێم هەموو حزب و سەرکردەکان، ئەوا زۆرێکیان وەستای موزایەدە و پەیکەرتاشی داتاشینی پەیکەری درووشم و دەرهێنەری ئاوازی سەرسوڕهێنەری درووشمبازین، جا ئەگەر لە دۆزینەوەی رێگای کوردایەتی ورد نەبین و لە رووداوەکانی مێژوودا بۆی نەگەرێین، ئەوا بەرداوام بە موزایەدە چەواشە دەکرێین و بە ئاوازی ساختەی درووشمبازی سەمای مەرگی دواڕۆژمان پێدەکەن.
من دەمێکە گوتوومە ئێستاش دەیڵێمەوە، بۆ ئەوەی تەڵەی موزایەدەم پێدا نەتەقێ و نەکەومە داوی درووشمی بریقەداری حزب و سەرکردەکانیش، لە رقی دوژمنان و داگیرکارانی کوردستانەوە لە کوردبوون و کوردایەتی دەڕوانم، دوژمنان و داگیرکارانی کوردستان دژی کام حزب و کام سەرکردە بن، ئەو حزب و ئەو سەرکردەیە هەڵگری پەیامی کوردایەتین، هەر بۆیەش شوێن پێی ئەو حزب و ئەو سەرکردەیە هەڵدەگرم و لەو رێگایەشەوە بەرە و داهاتوو هەنگاو دەنێم.