داوى كارتا حكومه‌تا ئیراقێ دژى هه‌رێما كوردستانێ و ئابوورا وێ، سه‌ره‌دانا جه‌عفه‌رى بوو ژبۆ رۆسیا، كو رۆژێن به‌رى سه‌ره‌دانێ؛ ئیبراهیم جه‌عفه‌ریێ وه‌زیرێ ده‌رڤه‌یێ ئیراقێ ب گه‌شتبینیه‌كا مه‌زن دئاخفت؛ ب وێ ئارمانجێ كو رۆسیا سۆزدایه هه‌موو رێكه‌فتنێن خوه ل گه‌ل هه‌رێما كوردستانێ هه‌لوه‌شینیت، لێ درست به‌روڤاژى ده‌ركه‌ت و لاڤرۆڤ ل ته‌نشت جه‌عفه‌رى گۆت: دێ ل گه‌ل هه‌رێما كوردستانێ به‌رده‌وام بن و په‌یوه‌ندیێن خوه یێن ئابوورى بهێزتر لێكه‌ن، گرنگه ئه‌م بزانین كو رۆسیا سه‌ركردایه‌تییا به‌ره‌یه‌كێ جیهانێ دكه‌ت، چما كو هه‌موو وه‌لات ل هه‌مبه‌ر گه‌فێن به‌غدا دژى گه‌لێ كوردستانێ بێ ده‌نگبوون؛ رۆسیا بێده‌نگى شكاند!؟ كاراكته‌رێ چێكرنا ڤێ په‌یوه‌نیدێ كیه!؟ ژبۆ داوى هه‌لوه‌ستێ رۆسیا، گرنگه حكومه‌تا هه‌رێمێ چ پێنگاڤه‌كێ ب هاڤێژت!؟، بۆ به‌رسڤێ ژى ئاشكه‌رایه كو ژ پشته‌ڤانیكرنا مافێن كوردان هه‌تا به‌رده‌وامییا كونسولخانه و كۆمپانیێن رۆسی ل هه‌رێمێ و په‌یوه‌ندیێن سیاسى و به‌رفره‌هكرنا وان هه‌موویان، د ناڤا داوى گۆتنێن لاڤرۆڤێ وه‌زیرێ ده‌رڤه‌یا روسیا دهاته بهیستن، ب ڤێ یه‌كێ ژى رۆسیا ب ته‌مامى ئیراق بێ هێڤى كر، لێ بێهێڤیكرنه‌كا چه‌وا؟ دكارین ب گۆتنه‌كا كورده‌وارى به‌رسڤێ بده‌ین و بێژین ئیبراهیم جه‌عفه‌رى ژبۆ رهێت خوه سه‌ره‌دانا رۆسیا كر، لێ وى سمبێل ژى دانا سه‌ر. چونكى نها هیچ وه‌لاته‌ك وه‌كو روسیا نزیكى كوردستانێ نینه، چێكرنا ڤێ په‌یوه‌ندیێ و كۆنكریتكرنا وێ هیچ جهێ پرسیار و گومانێ نینه و هێشتا چه‌ند مه‌هه‌كێن كێم ژى ب سه‌ر وان رێكه‌فتنێن مه‌زنێن بیاڤێ په‌ترۆل و گازێ دناڤبه‌را كوردستانێ و كۆمپانیێن رۆسی دا ده‌رباز نه‌بووینه، لێ ئه‌وێ جهێ پرسیارێ ئه‌وه، چه‌وا رۆسیا بوو دۆست؟! سه‌ره‌راى ئیمزاكرنا گرێبه‌ستێن نوو ب تایبه‌ت یا دگه‌ل كۆمپانییا رۆسنه‌فت یا رۆسی ژ بۆ هنارتنا گازا سرۆشتیا كوردستانێ ب بازارێن جیهانێ، دۆستینیا رۆسیا دگه‌ل هه‌رێمێ گه‌هشته وى راده‌ى كو دلێ گه‌له‌ك ژ دۆستێن خوه یێن كه‌ڤن ژى بهێلیت و ژبۆ وان هیچ گۆتنه‌كێ دژى كوردستانێ و مافێ گه‌لێ وێ نه‌كه‌ت، بێگومان د چێكرنا ڤێ په‌یوه‌ندیێ دا نیچیرڤان بارزانى سه‌رۆكێ حكومه‌تا هه‌رێمێ كاراكته‌رێ سه‌ره‌كییه، ژبه‌ركو حكومه‌تا هه‌رێمێ ل ژێر وێ گۆتنا (دسیاسه‌تێ دا به‌رژه‌وه‌ندیێن ئابوورى، دۆژمنێن دووهى دكه‌ته دۆستێن ئه‌ڤرۆ) سه‌ره‌ده‌رى ل گه‌ل رۆسیا كریه، دڤێت بزانین ژى كو رۆسیا دووهى دژمن ژى نه‌بوویه، له‌ورا ره‌نگه دۆستینیا وى ل گه‌ل هه‌رێما كوردستانێ، وه‌كو دیوارێ سه‌ربه‌فرێ نه‌بیت و په‌یوه‌ندییه‌كا بهێز و درێژخایه‌ن بیت. نها ژ بۆ وه‌لاتێن ئیقلیمى و دژه مافێن گه‌لان و دژه ریفراندۆما هه‌رێما كوردستانێ گه‌له‌كێ سه‌یره كو دبینن ب ڤى ره‌نگى رۆسیا ل هه‌مبه‌ر هه‌رێما كوردستانێ خوه‌دان هه‌لوه‌سته‌كێ نه‌گهۆره و هه‌رده‌م بزاڤا باشتركرنا په‌یوه‌ندیێن خوه دكه‌ت. ژ بلى ڤێ یه‌كێ دڤێت بزانین ژى كو سێرگى لاڤرۆڤێ ل گه‌ل هه‌ڤكیفێ خوه‌یێ ئیراقی ئیبراهیم جه‌عفه‌ریێ وه‌زیرێ ده‌رڤه، ب تنێ ژ بۆ ئیراقێ نه ئاخفتییه، به‌لكو پریسكۆنفه‌رانسا وى ژ بۆ ئه‌نقه‌رێ و ته‌هرانێ ژى پرن ژ په‌یامێن نوو، هه‌ڤده‌م ژ بۆ گه‌لێ كوردستانێ ژى په‌یامێن هه‌ڤالینیێ تێدانه، ل ته‌نشت په‌یاما هه‌ڤالینیێ؛ نامه‌یه‌ك ژبۆ ده‌ستپێكرنا قوناغه‌كا نوو ل گه‌ل هه‌رێما كوردستانێ دهێته دیتن كو ره‌نگه رۆسیا ژبۆ خاترا به‌رژه‌وه‌ندیێن خوه و پاراستنا گه‌لێ كوردستانێ، ته‌هران و به‌غدا و ئه‌نقه‌رێ بكه‌ته قوربانى، لێ دڤێت د قوناغێن بهێت دا حكومه‌تا هه‌رێمێ بیاڤێ بهێزكرن و به‌رفره‌هكرنا گرێبه‌ستێن ئابۆرى ل گه‌ل كۆمپانیێن رۆسی باشتر بكه‌ت، ب وى ره‌نگى كو گه‌فێن به‌غدا و كۆنترۆلكرنا ده‌ڤه‌رێن ده‌رڤه‌ى ئیداره‌‌یا هه‌رێمێ هیچ كارتێكرنه‌كێ ل ب رێڤه‌چوونا قوناغێن وان گرێبه‌ستان وكارێن وان كۆمپانییان نه‌كه‌ت.
کارزان فەقێ
