مالیکی گوتی رێگە نادەین ئیسرائیلی دووەم درووست ببێ، دیارە درووست بوونی دەوڵەتی ئیسرائیل دەرهاویشتەی کارەساتی هۆلۆکۆست بوو، کوردیش بەدەست داگیرکارانی تورک و فارس و عەرەب خراپتر لە جولەکەی بوسەر هێنراوە، ئەوە ئەنفال و کیمیاباران و راگواستن ئەوە بارزانیەکان و فەیلیەکان کە لە کارگەکانی کیمیاییدا تاقی کردنەوەیان لەسەر کراوە، ئەو کارەساتانە و زۆر کارەساتی تریش هیچیان لە هۆلۆکۆست کەمتر نییە و بگرە زیاتریشن، ، ئەوە جگە لەوەی بەردەوام سەرکردەکانی کوردیان یان لەسەر سفرەی گفتوگۆ شەهید کردوون، یان تیرۆر کراون و هەوڵی تیرۆر کردنیان دراوە، ئەوە پێشەوا قازی و شێخ سەعیدی پیران و شێخ عەبدولسەلامی بارزانی و سمکۆی شکاک و دکتۆر قاسملو و شەرەفکەندی، ئەوە بازانی نەمر و سەرۆک بارزانی کە لە چەندین هەوڵی تیرۆر کردن رزگاریان بووە، لەگەڵ بوونی ئەو راستیانە و زۆر راستی تریش هێشتا نوری مالیکی داواکردنی ماف و ئازادیە نەتەوەییەکان و رێگری کردن لە دووبارە بوونەوەى ئەو کارەسات و نەهامەتیانە بە ئیسرائیلی دووەم دەزانێ، پرسیار ئەوەیە کورد و حزب و لایەنە سیاسیەکانی ئەو ئاخاوتنەی نوری مالیکی چۆن شرۆڤە دەکەن؟
دیارە گوتنەکەی نوری مالیکی گشتگیرە، بەلای ئەوەوە مافی رەوای بە دەوڵەتبوونی کورد ئیسرائیلی دووەمە و کوردیش هەمووی جوولەکەیە، ئەوە لە کاتێکدایە نوری مالکی و هابیرەکانی پێش خۆی و دوای خۆی داگیرکار بوون و داگیرکاریش دەبن، کوردیش بە درێژایی مێژووی درووستبوونی دەوڵەتی عێراقی نەفرەتی وڵات داگیرکراو بووە، وەک نوری مالیکیش دەڵێ: ئەگەر درووستبوونی دەوڵەتی کوردی ئیسرائیلی دووەم بێ، ئەوا دەبێ هەر بە داگیرکراوی بمێنێتەوە، واتا ئەگەر رازی بین بە بڕیارەکانی نوری مالیکی کە قووتبڕینی خەڵکی کوردستان و داگیرکردنەوەى کوردستانە، ئەوا کوڕی باشین و جولەکە و ئیسرائیلی دووەم نین، بە پێچەوانەوە هەم جولەکەین و هەم ئیسرائیلی دووەمیشین، پرسیارێکی تر ئەوەیە: ئایا ئەو ئاخاوتنەى نوری مالیکی گوتار و هەڵوێستی حزب و لایەنە سیاسیەکان دەگۆڕێ؟ بە واتایەکی تر حزب و لایەنە سیاسیەکان لە کارنامەیەکی نەتەوەییدا کۆ دەکاتەوە؟
تا ئێستاش لەگەڵدابێ حزب و لایەنە سیاسیەکان نە کەڵکیان لە مێژوو وەرگرتووە و نە لێدوانە دوژمنکاری و شۆڤێنیەکەی نوری مالیکیشیان کردۆتە بنەمای بەخۆدا چوونەوە، بۆیە تەنها ئەوەندە دەڵێم: هەر حزب و لایەنێک و تەنانەت تاک بە تاکی کوردیش، ئەگەر ئەو گوتنەی نوری مالیکی نەکاتە بنەمای بەخۆدا چوونەوە، ئەوا رازی بوونیەتی بە هەر بڕیارێک کە نوری مالیکی چارەنووسی کوردی پێ دیاری دەکات.