نها ژى تێناگه‌هم، چما هه‌بوونا په‌یوه‌ندییه‌كا بهێز دناڤبه‌را حكومه‌تا ههرێما كوردستانێ و حكومه‌تا توركیا، ب كێماسى و شه‌رمزارى ژ بۆ ده‌سته‌لاتدارێن هه‌رێمێ دهێته دانان، د هه‌مان ده‌م دا توركیا هه‌بوونا ڤێ په‌یوه‌ندیێ بۆ خوه ب شانازى و سه‌ربلندى و سه‌ركه‌فتن ناڤدكه‌ت، ژبۆى كو ئه‌م پشت راست ببین كو د ڤێ په‌یوه‌ندیێ دا ئه‌گه‌ر توركیا جاره‌كێ مفادارێ ئابورى و بازرگانى بیت، وى ده‌مى ههرێما كوردستانێ پتر ژ جاره‌كێ مفاداره و هه‌ر ب ئه‌گه‌رێ هه‌بوونا په‌یوه‌ندییان دگه‌ل توركیا دا، ههرێما كوردستانێ شیا خوه ل هه‌مبه‌ر وێ قه‌یرانێ رابگریت كو ژ ئالیێ به‌غدایێ ڤه ب سه‌ر خه‌لكێ كوردستانێ هاته سه‌پاندن، حكومه‌تا سه‌ركه‌فتى ئه‌و نینه د ده‌مێ هه‌بوون و به‌رفره‌هیێ دا خوه‌دان پرۆژه و پلان بیت، به‌لكو ئه‌و حكومه‌ت یا سه‌ركه‌فتییه ل د ده‌مێ چێبوونا قه‌یرانان، بكاریت ملله‌تێ خوه ژ وێ قه‌یرانێ ده‌رباز بكه‌ت، ئیدى سێ سال ب سه‌ر قوتكرنا بودجه و پاریێ ژیانا خه‌لكێ كوردستانێ ده‌ربازدبن، جوداهییا وى ده‌مى و نها ب ئه‌رد و ئه‌سمانان ژێك دوورن، سه‌ره‌راى كو هێشتا سیسته‌مێ دانا مووچه‌ى وه‌كو خوه‌یه، لێ بازار گه‌رمبوویه و پرۆژه‌یێن خزمه‌تگۆزارى جاردن ده‌ستپێكریه‌ڤه، نزیكه ژماره‌یا هاتنا گه‌شتیاران وه‌كو به‌رى هاتنا داعشێ لێ دهێت، ب ڤێ یه‌كێ ژى ده‌لیڤه‌یێن كارى پتربوویه، ئه‌ڤ یه‌ك ژى هه‌موو ب رێكه‌فتنا دناڤبه‌را حكومه‌تا هه‌رێمێ و ئه‌نقه‌رێ هاته‌كرن، به‌روڤاژى ڤێ یه‌كێ، هه‌رێم د ڤى ده‌مى چه‌ند پێدڤى ب په‌یوه‌ندیانه دگه‌ل توركیا ب هه‌مان شێوه ژى توركیا پێدڤى ب حكومه‌تا ههرێما كوردستانێ یه، ئیدى ئه‌گه‌ر ئه‌م ته‌ماشه‌ى جوگرافیا توركیا و جوگرافیا هه‌رێمێ و په‌یوه‌ندیێن وان دگه‌ل وه‌لاتێن جیران بكه‌ین، هیچ جوداهییه‌كێ دناڤبه‌را وان دا نابینین، چه‌وا به‌غدا و ته‌هران و دیمه‌شق دژى هه‌رێمێنه و خه‌ونا ب شكه‌ستنا هه‌ولێرێ و سه‌ركردایه‌تیا كوردستانێ و حكومه‌تا وێڤه دبینن، ب هه‌ما شێوه بۆ ئه‌نقه‌رێ و جیرانێن وێ ژى راسته، بۆ نموونه توركیا ب وه‌لاتێن سوریا و ئیران و ئه‌رمینیا و یۆنان و جۆرجیا و مه‌لدۆڤیا و (ههرێما كوردستانێ) هاتییه دۆرپێچكرین، دناڤا ڤان وه‌لاتێن جیران دگه‌ل توركیا دا، بهێزترین په‌یوه‌ندیا حكومه‌تا ئه‌نقه‌رێ ئه‌و په‌یوه‌ندیه یا كو وى دگه‌ل هه‌ولێرێ هه‌یی، سه‌ره‌راى هه‌بوونا بیروبۆچوونێن جودایێن سیاسى دناڤبه‌را هه‌ردوو ئالییان دا، لێ توركیا نكاریت وێ جوداهیا بیروبۆچوونان ژ بۆ ناڤا په‌یوه‌ندیێن ئابورى و بازرگانى ڤه‌گوهێزیت؛ ژلایه‌كێڤه ئه‌و ژى مفاداره و ژلایه‌ك دیڤه خوه‌دى گرێبه‌ستا 50 سالیه دبیاڤێ وه‌زه‌ى دا دگه‌ل هه‌ولێرێ، هه‌روه‌سا به‌رهه‌م و كالایه‌كێ زۆر یێ وه‌لاتێ توركیا ب رێكا هه‌ردوو ده‌رگه‌هێن ئیبراهیم خه‌لیل و سه‌رزێرێ ژ بۆ ناڤا بازارێن كوردستانێ و ئیراقێ دهێن، ئیدى ژ بازارخستنێ و هه‌م ژ گومركا سنوریڤه حكومه‌تا وى وه‌لاتى داهاته‌كێ زۆر بده‌ست دئێخیت، ژ ڤان مه‌زنتر ژى ئه‌وه: هه‌رێم خوه‌دى یه‌ده‌گه‌كا مه‌زن یا به‌رهه‌مێن غازا سروشتى یه و توركیا ژى ئێك ژ مه‌زنترین وه‌لاتێن جیهانێ یه بۆ پێدڤیبوون ب غازا سروشتى و ل ده‌مێن بهێت ههرێما كوردستانێ دكاریت وێ ڤالاتیا د وى بیاڤى دا ل توركیا هه‌یه؛ تژى بكه‌ت، ئیدى ئه‌نقه‌ره دێ ژ غازا مۆسكۆیێ ژى بێ منه‌ت بیت كو رێژه‌كا زۆر ل وى وه‌لاتى دكریت، ب راستى ژى هه‌ر پێدڤیبوونا ئه‌نقه‌رێ ب غازا سروشتییا مۆسكۆیێ، بوویه ئه‌گه‌رێ هندێ كو ل ده‌مێ ئێخستنا فرۆكه‌یا روسى و تێكچوونا په‌یوه‌ندییا وى دگه‌ل وى وه‌لاتى، ئه‌ردوگان نه‌چار بوو د نامه‌یه‌كێ دا لێبۆرینێ ژ كرملینێ بخوازیت، چ گومان تێدا نینه توركیا ب نه‌هاتنا كرێكار و گه‌شتیار و شتى و گندۆرێن روسى ناشكێت، به‌لكو ب قوتكرنا به‌رهه‌مێن غازا سروشتى دێ توركیا لاوازبیت، له‌وا ئه‌گه‌ر وى ده‌مى غازا سروشتیا ههرێما كارودستانێ به‌رهه‌ڤببا، نها هه‌ولێر ژبۆ ئه‌نقه‌رێ باب و برا بوو، هه‌روه‌سا ل ده‌مێن بهێت ژى ههرێما كوردستانێ ژ بلى په‌ترۆلێ، دێ ژێده‌ره‌كێ دی یێ ب ده‌ستخستنا ئابۆرێ خوه برێكا فرۆتنا غازا سروشتى په‌یداكه‌ت
کارزان فەقێ
