سلێمانی.. ئایا دەبینی کوردانی باکوور و باشوور و رۆژهەڵات و رۆژئاوا، ئەوروپا و ئەمەریکا و روسیا راچڵەکیون و بۆ سەربەخۆیی کوردستان پانێڵ و کەرنەڤاڵ و ئاهەنگ ساز دەکەن، تۆی هەمیشە پێشەنگی کوردایەتیش خزرێنراویتە ناو باوبۆرانی چەواشەکاری و پێش تاران و ئەنقەرە و بەغدا و دیمشق کەرنەڤاڵ و ئاهەنگی ژێردەستەییت پێ ساز دەکەن، ئایا دەزانی لەمەولا پیرمێرد ئەمڕۆژی ساڵی تازەت بۆ ناڵێ! بێکەسی شاعیریش بە چاوی پڕ لە فرمێسک لە داری ئازادی هەڵدەڕوانێ! قانعی شاعیریش پێت دەڵێ: سلێمانی چۆن دڵت هات بە واتەواتی هەرزەکاران ئاخرین ماڵی ژیانم بکەیە کونجی بەندیخانەی نەخێر!
سلێمانی.. تۆ لەگەڵ بەکر سدیق لەبەر دەرکی سەرا شەڕی بەڵێ بۆ سەربەخۆیی کوردستانت دەکرد، تۆ لەگەڵ مولازم موحسین لەناو ئەمنەسوورەکە شەڕی نەخێر بۆ داگیرکاریت دەکرد، ئێستا بەناوی تۆ و لەناو دڵی پڕ لە حەسرەتی تۆدا گروپی نەخێر بە ئاشکرا و هەندی حزبیش بە دزیەوە بالۆرەی نەخێر بۆ سەربەخۆیی و چوونەوە بۆ بەغدای ئەنفال و کیمیا و تاوان دەڵێنەوە.
سلێمانی.. ئەوە نە تۆی و نە مێژووەکەتە و نە روانینتە بۆ داهاتوو، تۆ هەمیشە پێشەنگ بووی، مێژووەکەت دوژمن دۆقێنە، لە روانینیش بۆ داهاتوو هەمیشە روو لە ئاسۆ و بەرچاو روون بووی، دەی تۆش رابە و دەستی کەرکوکی داگیرکراو بگەرە و پەیامی سەربەخۆیی بۆ باکوور و رۆژهەڵات و رۆژئاوا بنێرە.