مرۆڤ د ھزر و ڕەفتارکرنێ دا گرێدایە ب گەلەک فاکتەر و بناسانڤە، و قۆتالبوون ژ کارتێکرنا وان دمینیتن لسەر شیانێن وی. ژیانا ڕۆژانە و ئاسایی و سەربۆرا ھەر کەسەکێ ئێکە ژ وان بناسان. کێم کەسە ژ کارتێکرنا وێ بێ بەش بت. گەلەک ژ بیردۆزێن مەزن بەرھەمێن سەربۆرا ژیانا زانایەکینە دناڤ خێزان و جڤاکێ دا.
بۆ ڕیفراندۆمێ ژی ب ھەمان ڕەنگ. دبیتن گەلەک ژ باوەرێن مرۆڤێن کوردستانێ، ب باش و خراب بەرھەمێ ژیانا وی ل کوردستانێ بیتن و ئەڤرۆ و ل (٢٥/٩/٢٠١٧) دی َکارتێکرنا خۆ لسەر "بەلێ" و "نەخێر" ێ بۆ دەنگدانا وی ھەبیتن.
لێ ھندەک جاران ئەو کارتێکرن نەرێنی و ب خراب لسەر جڤاکێ و خۆدێ وی کەسی دا دشکێتن، و مرۆڤ دشێتن ب وی ڕەنگی تا ڕادەکێ خۆ ژ وان نەرێنییان بپارێزیتن ھەکەر ھندەک ب سانەھی وەربگریتن.
بۆ نموونە ئەڤا ل خۆارێ ئێکە ژ ھزاران ھەڵوێستان: پێشی ١٥-٢٠ سالان X دچیتن و خویشکا Y دخوازیتن. دیارە نەبیتە ( قسمەت)، نادەنێ. نۆکە Y ب مالباتا خۆڤە دێ دەنگی دەنە "بەلێ"، و وێ ب مفا دبینن بۆ ھەمی کوردستانیان، بەلێ پا X ژ کەربێت وان دڤێت دەنگی بدتە "نەخێر" !
مەلا دبێژنە عەولی یا ڤێ چیڕۆک و سەربۆرێ و ڕوویدانێ " قەزا و قەدەر"، بەلێ ناڤێ پا پسیار ئەوە پا دێ ناڤێ پشکا دیترا وێ چیڕۆکێ چی بیتن؟ ل پشکا ئێکەم یەزدانێ مەزن بی دەلیل، بەلێ پا ل پشکا دوویێ کی ئەگەرە و بناسێن کێنە؟!
باشە چەند کەس نۆکە ل کوردستانێ ھەنە وەکی X "وی تشتی" وی بابەتێ ھنگی تێکلی "ڤی تشتی" و بابەتێ نۆکە و پشتی بیست سالان دکەن؟ چەند مرۆڤ ھۆسا دێ دەنگێ خۆ دەنە "نەخێر"؟!
ھەر چەندە کە گەلەک دگەل منن کە تنێ چەند کەسەک کێم نەبن ئەوێت دی وەکی X ھزر دکەن و ئەڤە مخابنییە. ھوین چ دبێژن؟! دەمێ چارەنڤیسا مەلیۆنەھا کەسان ل کوردستانێ لبن دەستێ ھندەک تۆخمێن وەکی X بن، دڤیا چ بھێتە گۆتن؟ ئایا گەفێن کەسێن وەکی X ژ یا دوژمنا مەزنتر و خرابتر نینە؟؟ ھوین بێژن و بڕیارێ بدەن.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ