دەمێ ئەز قوتابیێ زانینگەھا حکومی پەروەردەییا مۆسکۆ چەند جاران من گۆە ل ھندەک قوتابیێن عەرەبێن عێراقێ، ئەوێن ل وی باژێڕی دخواند، دبوو دگۆتن:" مە پترتر ژ پارچەیێن دیتر مافێ وە کوردان دایە"، یان دگۆتن:" ھوین مەجووسی بین"، یان ...ھتد. ڕاستی مخابن ل چەرخێ بیست و ئێکێ کەس و لایەن و مرۆڤ و نەتەوە و نەخاسمە ژ تەخێن ڕەوشنبیر و ئەکادیمی بڤی ڕەنگی ھزر بکەن. بلا ھیچ نەبیتن قەنجیێن مە ژبیر نەکربانە و ھندە بێ وژدان نەبن. ڕاستی ئەوێن بڤی نەتەوەی و ھندەک ژ کەسێن ھۆسا، یێ کۆ ھژمارا وان نەکێمە و ئاخفتنا وان ب گەلەک دچیتن، دخۆڕن ل ھیڤییا کیژ دلۆڤانی و جوامێری و قەنجییا وانن کۆ بزاڤێ و حەز دکەن دەنگێ "نەخێر" بسەربکەڤیتن ؟! یا باش ئەوە ئەو چیڕۆکەکا تەحل بزانن دا چ جاران وێ خۆزیکێ نەخوازن.
جھێ داخێ یە پشتی کۆچا داوییا محەمەدێ ئەمین (س) ب ماوەیەکی پەیاما وی یا پیرۆز بڕەنگەک دیتر ھاتە خواندن و تێگەھشتن و بەلاڤکرن. پەیاما دادپەروەری و ئێکسانی و خۆمەزن نەکرنا مرۆڤان د وی ئایینێ، یێ کۆ ئەو پیامبەر بخۆ د جێبەجێکرنا بنەمایێن وێ نموونەک جوان و پێشەوایەک سەرکەفتی بی، چ جاران ژ بەرپەڕێن دیرۆکێ ناچیتن، کۆ گەلەک ژ وان کەسێن بووینە مۆسلمان ژ ئەگەرێ وێ کەساتیێ بی نە تشتەک دیتر. بەری وی وەسا نەبی. پشتی ھنارتنا وی وەک پیامبەرەکێ چاکسازییا جڤاکی و بھایی، لنک وی بیلالێ حەبەشی، سەلمانێ پارسی، عەمار و یاسرێ یەمانی و گەلەکێن وەکی وان نەعەرەب، بەلکۆ ھەژار و بێخۆدان و بێ مرۆڤ چ جیاوازی دگەل ھەمی عەرەبان و بەلکۆ یێ، گەلەک مەزن و زەنگین، بۆ نموونە خالدێ کۆڕێ وەلیدی نەبی. بەلێ ئایا پشتی وی وەسا ما؟ بێگۆمان نەخێر. ڕۆژ لدویڤ ڕۆژێ ل کێمیێ دا. وەلێ ھات لسەردەمێن ھندەک خەلیفەیێن ئەمەوی و عەباسی دا عەرەبەک مۆسلمان و مۆسلمانەکێ نەعەرەبھندی جیاوازی و دویراتییا عەردی و عەسمانی نەوەک ھەڤ بین. ئەڤ چەندە پتر دگەل کورد و پارسان دھاتە دیتن و دبیتن ھژمارەکا ئەگەران ل پشتا وێ دیتنا نەرێنی و ڕەفتارێن کرێتێن ھژمارەکا سەرکردە و کەسێن عەرەب بیتن ل دژی وان. بۆ نموونە ئەڤ دوو نەتەوەیە بۆ ماوێ پترتر ژ ھزاران سالان ل جیھانی َبگشتی و نەخاسمە ل دەڤەرێ دەستھەلاتدار و زلھێزەک مەزن بین و عەرەب ژی بۆ ماوەیەکێ گەلەک سالان لبن دەستێن وان بین و دبیتن کەسان و سەرکردەیێن خراب و خۆپەرێستێن ئاریایی ھەبیتن سەردەمەکی زۆرداری ل وان کربیتن و ژ وان کۆشتبن و ئەڤ ڕەفتارێن عەرەبان تۆلڤەکرنەک ژ ھنگی بیتن. ئەگەرەک دیتر ئەوە دبیتن ئەڤ ھەر دوو نەتەوەیە ژ ھەمی نەتەوەیێن دیتر ل وان نێزیک بین و وەلاتێ وان یێ مەزن یێ کۆ ھنگی و لسەردەمێ ساسانیان حۆکمڕانی لێدکر، و د بنەڕەتدا ب بنیات کوردێن شوانکارەیێن دەوربەری چیایێ زاگرۆس بین، ھەڤ تۆخیب بی دگەل جھێن عەرەب لێ دژیان یان وەکی کۆچەرات پێدا دھاتن و دچۆن، و ھێڕشێن دەسپێکێ زووی گەھشتن وان نەتەوەیان و باژێڕ و گۆندێن وان، نەخاسمە ئەنبارا نۆکە و یێ کۆ ڕۆمادی سەنتەرێ وێ پارێزگەھێ یە و پاشی ژی گەلەک جھێن کۆ ناڤێن وان یێن بووینە کەربەلا و نەجەف و ... ھتد، ھەتاکۆ ئەو باژێڕێ دبێژنێ سلووکیە، لسەردەمێ نەوشێروانێ دادپەرورە، یێ کۆ پیامبەرێ مۆسلمانان بخۆ دبێژیتن " ئەز لسەردەمێ شاھەکێ دادپەروەر ژ دەیکبوویمە"، ھاتیە ئاڤاکرن و دکەفتە نێزیکی بەغدایا نۆکە، و ئێکە ژ پایتەختێن ساسانیان. پاشی پایتەختەک دیتر ھاتە ھەلبژارتن بناڤێ مەدائێن، یاکۆ دکەڤیتە د جھەکێ نۆکە دبێژنێ پارێزگەھا زیقار، بەرۆڤاژی وێ ھزرا شاش و چەواشەکری، ئەو ژی وەکی گەلەک ژ بھا و تشتێ دیتری َمە کوردان، یا بەر تەعریبا ھزری کەفتی و دھێتەگۆتن وشەیەک عەرەبی یە و ژ وشەیا مەدینە ھاتی، لێ شاھرەزایێن ئەکادیمی د بیاڤێ دیرۆکێ دا، وێ ھزرا شاش و تەعریبکری و ب تووندی ڕەت دکە ن و وەسا دبینن ئەڤ وشەیە ئاریایی-میدی یە و ژ ناڤێ مید یان میدییا یان ماد یان مەد ھاتیەوەرگرتن، و ئەڤە نیشانددەتن سنوورێن کوردستانیان لسەردەمەکێ دیرۆکی ل وی جھی و دەڤەرێ و بەلکۆ وێڤەتر ژی بوویە. بەلێ کورد و پارسێن ئاریایی، ل دەستپێکێ و وەکی ھەر نەتەوەیەک دیتر ل ڤێ جیھانێ، و وەکی عەلی وەردی فەیلەسۆفی َمەزن دبێژیتن ب دل و گیان بەڕەڤانی ژ ئاخ و نەتەوە و ئایینێ خۆ دکر و وەکی یادگارەک ژ باب و باپیران ئەو دپاراست، ھەرچەندە بدیتنا ھندەکان ئەو ئایین چ نەبی یان وەسا بەلاڤ دکر نەئایینە و مەجووسینە. بەلێ بۆ کوردان ئەو ئایین ئایینەک پیرۆز بی و بەڕەڤانی ژێ دکر و خەلک ھەر بلا وەکی خۆ ھزر بکەن. پاشی و ژبەر ئەگەرێن بەرنیاس ھندەک کەسان ژ وان دەست ژ بەڕەڤانیکرنێ ڤەکێشا و ھاتنە سەر ئایینێ ئیسلامێ. بەلێ پا یێن دیتر یێن وەکی ئێزدی و زەردەشتی و مەسیحی و ھندەکێن دیتر وەکی خۆ مان ھەتانۆکە. ئەوێن ھاتینە سەر ئایینێ ئیسلامێ پتر کەفتنە بن کارتێکرنا نەرێنی یا ھژمارەک مەزن ژ گەندەلییا ئایینی یا ھندەک کەسێن بناڤ مۆسلمان و ژ دل نەمۆسلمان، وەکی عەلی وەردی ژ دەڤێ کەسانەک وەکی عەمارێ یاسر و ... ھتد، ڤەدگێڕیتن. فاکتەرەکێ سەرەکیێ ڕەڤینا وان ژ ئایینێ زەردەشتی کۆمەکا گەلەک ژ وان کەسێن ئایینی و دەستھەلاتدارێن ساسانی بین یێن گەندەلییەکا مەن دکرن، و خەلکەک مەزن ژ خۆ تێر و بێزار کربی و ل کەس و لایەن و ئایینەک دیتر دگەڕھان دا وان ژ وی ئاگری قۆرتال بکەتن.
دبیتن ھەکەر عەرەبێن مۆسلمان ژی نەھاتبانە ھەر کەسەک دیتر ب دەست وان کەفتبایە و ھاتبایە ھەمان ئەو کارڤەدان لنک ڤی تەخێ کورد و ئاریایێن بێزار ژ دەستھەلاتێ لنک وان پەیدا ببایە. ژ لایەک دیترڤە دەمێ ئاریاییان گۆە ل سروشت و پیاما پیرۆزا مەحەمەدی (س) بی دیتن وەکی ھەمی پیامبەران و ژ وان ژی زەردەشتییە و گەلەتشتێن جوان و ڕەفتارێن مرۆڤدۆستانە و باش لنک وی ژی یێن ھەین. گەلەک ژ ناڤرۆکا وی َپیاما بەری ھنگی دناڤ ئاریاییاندا ھەبین. باوەری ب یەزدانێ مەزن و خۆدایێ ئێکانە و بێ ھەڤتا و پەرستنا وی، باوەری ب ڕۆژا دۆماھیکێ ( قیامەتێ) و ھەبوونا قەنجیێ و خرابیێ و ھەبوونا بەھشت و دۆزەخێ و ئەنجامدانا پێنج نڤێژان د ھەر ڕۆژەکێ و دانێ سپێدێ و نیڤرۆ و پشتی نیڤرۆ و مەغەرب و عەیشایێ و ...ھتد، و گەلەک ژ وان د ئایینێ زەردەشتی دا ھەبین و زەردەشتی ئەو چەند ھزار سال بی بانگەشە بۆ دکر و وان ب ڕۆھنی دیتن ئەو بنەما یێن د ئایینێ پیرۆزێ ئیسلامێ دا ھەین و محەمەدێ ئەمین ( س) بانگەشەی بۆ وان تشتا دکەتن. ئەڤێ ڕاستیێ پترتر سەرنجا وان ڕاکێشا و ئەو ھندا دیتر ڕژد و مکۆر کرن و ( فەوج فەوج ) دھاتنە ناڤ ڤی ئایینێ پیرۆز و بینە شەیدایێن پیامبەرێ وێ یێ دادپەروەر و مرۆڤدۆست و ئازادیخواز و ئێک ژ مەزنترین چاکسازێن جیھانێ. لدەمەکی کۆ ئەو تنێ چەند سالەک بی پیامبەرێ مۆسلمانان بەرێ عەرەبان ژ پەرستینا بت ( ێنم ) و پەیکەرێن ژ داری و بەرێن، ئەوێن وان بدەستێن خۆ دروستکرین و وەکی ئیبراھیمێ (س) بابێ پیامبەران دفەرمووتن" نە زیانێ دگەھینن کەسێ نە ژی مفای "، کربینە خۆدایێ خۆ و دپەرێست، زەردەشتی ئەو چەند ھزار سال بی خەلکێ خۆ ژ بتپەرێستیێ دابیە پاش و ب تشتەک کرێت و نەشرین و گۆنەھەک مەزن دھژمارت. ھاتنا ئایینێ ئیسلامێ د وی سەردەمی، ب ھەمی بھایێن جوان و مرۆڤدۆستان و ب تایبەت کەساتییا سەرنجڕاکێشا محەمەدێ ئەمین (س)، بۆ وان جھێ دلخۆشیێ بی و بیار وان ل ڕۆژێن کەڤنێن ئایینێ خۆ دئینان و بڤێ چەند شاد و ب ھاتنا خۆ بۆ ناڤ ئیسلامێ خۆ ب بەختەوەر دزانی.
پشتی مدەھەکی، و وەکی گەلەک قۆناغێن دیرۆکی و پیامبەرێن پێشی وی، ڕۆناھییا وێ پەیاما پیرۆز کەفتە بن سیبەرا ھندەک خۆ ویست و دفن بلند و ناسیۆنالسیتێن عەرەب، و وان ھێدی بنەمایێ دادپەروەرییا محەمەدی (س) بانگەشە بۆ دکر ژبیر کر و چۆن سەر دەە و دۆیا بەری ئیسلامێ و سەردەمێ ( جاھلیەتێ ) و ئەبوو جەھلی و ئەبوو لەھەبی. وان ژبیرکر محەمەد(س) ھنارتی( ڕەسوول) و ڤڕێکرییەکە ژ لایێ یەزدانێ مەزن و دلۆڤانڤە، و بەرۆڤاژی، وەکی عەلی وەردی ئاماژەی پێددەتن، وەسا دەیناند و ھزر دکر ئەو ژی وەکی گەلەک قەیسەر و شاھانە، و مەلکێ عەرەبانە و یێ ھاتی دا ئەو شانازیێ پێببەن وەک مەلکێ خۆ، لدەمەکی محەمەدێ ئەمین (س) نە ئەو چەند لبەر بی و نە ژی ژ ئالیێ یەزدانێ مەزنڤە بۆ ڤی مەبەستی ھاتبیە ھنارتن. بەلکۆ بەرۆڤاژی ئەو ھاتبی داکۆ خەلەتی و شاشی و زۆرداریێن وان قەیسەر و شاھان نەھێلیتن و چارەسەربکەتن و زۆرداری و نەدادپەوەرییا وان ژ سەرێ خەلکێ کێم بکەتن.
ڤان بناڤ مۆسلمانێن لاواز باوەر، لسەر ڤی بنەمایێ شاش و خەلەت تێگەھشتنێ، گەلەک بھا و تێگەھێن کرێت ئینانە ناڤ گۆڕەپانا ئایینی، یێن کۆ د ڕاستی دا دویر بین ژ بنەمایێن پیرۆزێن ئیسلاما ڕاستین و کەساتییا محەمەدێ ئەمین(س)، یاکۆ لنک وی تەکەزکرن لسەر دادپەروەری و ئێکسانییا دناڤبەرا مرۆڤ و نەتەوەیێن جیھانێ بەری گەلەک تشتان دھات. ئێک ژ وان تێگەھێن کرێت و نەشارستانی (مەوالی) بی، کۆ ڕامانا بەندە ( عەبد ) ی ددا. ڤی تێگەھی ئەو گەھاندنە ھندێ ئەو لنک و د دلێ خۆ و ھزر و مێنتالیتە و مەژیێ خۆ یێ ڕزی دا مۆسلمانان دابەشی سەر دوو تەخ و جوینان بکەن: مۆسلمانێن عەرەب و مۆسلمانێن نەعەرەب. مۆسلمانێن عەرەب د وی مێنتالیتەی و سەرەدەرییا وان دا بناڤێ ( مەوالی ) دھاتە گازیکرن.
د دیتنا وان ناسیۆنالیستێن عەرەبی و ل وی سەردەمی، عەرەب ھەمی تشت و پیرۆز و سەر یێ نەعەرەب دا بی، و یێ نەعەرەب و ( مەوالی ) پێدڤییە خزمەتا یێ عەرەب بکەتن. لسەر ڤی بنەمای کەلتوورەکێ شاش د جڤاکا مۆسلمانەتییا ھنگی بەلاڤ بی، یاکۆ بڕاستی مرۆڤ شەرمێ ژ ڤەگێڕانا وێ و ھەمی کریارێن وێ دکەتن.
ھەمی تشتەک بۆ مۆسلمانێ عەرەب ھەبی بەس بۆ یێ دیتر نەبی. سەرباری ھندێ کۆ مۆسلمانێن کورد و پارس و یێن دیتر مفایەک مەزن گەھاندنە ڤی ئایینی و عەرەبان، و نەخاسمە د بەلاڤکرنا ئایینێ ئیسلاما پیرۆز و مەزنترکرنا سنوورێن وەلاتێ وان. لێ ھەمی ئەو چەند لنک وان بناڤ مۆسلمانێن عەرەبێن ناسیۆنالیست و خۆپەرێست بێ بھا بی و بەلکۆ ئەوان ئەو کار ب ئەرکێ بێ ھرڤە و وێڤە یێ وان نەتەوەێن نەعەرەب یان ( مەوای ) دزانی و تنەنانەت ( منەتەک ) مەزن ژی لسەر سەرێ وان دکر. سەدان وەزیر و کاربدەست و زانایێن کورد و مۆسلمانێن نەعەرەب و ئاریایی، یێن وان ب (مەوالی ) گازی وان دکرن و دناڤ خۆ دا بەحسێ وان دکرن، د خزمەتا وان عەرەبان دا بین و ب ھزاران جار پترتر ژ خۆدێ وان بۆ مان بمفا بین. بەلێ ئەوان ھەر بچاڤەکێ کێم و نزم تەماشەی وان دکرن و گەلەک جاران ژی زۆرداری ل وان دکر و ئەڤە و ژبلی ھندێ گەلەک ژ وان وەزیر و فەرماندێن لەشکەری یێن مەزن و بناڤۆدەنگ و جھێ باوەریێ و ڤیانا خەلکێ، ب ھێجەتێن بێ ڕامان و بچویک دکۆشتن و بەلکۆ دویندەھا وان قڕ دکرن و ژناڤ دبرن. ناڤێن وان د دیرۆکێ دا ھەتاھەتایە دێ مینن ساخ. دیرۆک وان تاوانان گەلەک ب نالەباری ڤە ڤەدگێڕیتن و وەکی دەقەکا کرێت ھەتاھەتایە دێ بناڤچاڤێن وان خۆدانێن ھەلگرێ باوەرا ( ب مەوالیکرنا ) خەلکێ مینیتن و ڕەش نابیتن. ( مەوالی ) بوونا نەتەوەیێن نەعەرەب دناڤ مۆسلمانان دا، ساخلەتەکێ دەستکردێ شۆڤینانەیا عەرەبی بی و زیانێن مەزن ل ئیسلامێ و جیھانێ و شارستانیەتێ دان، و یێ ژ ھەمیان پترتر زیان ژ ڤێ ھزرا ھندەک کەس و لایەن و وەلاتێن شۆڤینی ناسیۆنالیزمانەیا عەرەبێن جیھانێ دیتی، کورد بین. ھەتاکۆ عەلی وەردیێ خۆدێ ژێ ڕازی و گەلەک ڕەوشەنبیر و دیرۆکنڤیسێن ھەین وەسا باوەر دکەن بنیاتێ دارا ھەڤڕکاتییا تاخمێن شێعە و سۆننەیا وی سەردەمی ژ وشە و ھزرا ( مەوالیبوونێ ) و ڕەفتارێن پێڤەگرێدای ھاتە دەیناندن و مەزن بی و گەھشتە ئەڤرۆ.
جھێ داخێ یە بۆرینا پترتر ژ چەند سەد سالان ئەو تێگەە و ڕەفتار و سەرەدەری و ھەلسوکەفت نەگھۆڕین، و دبیتن ئەڤرۆکە ڕاستەوخۆ وێ وشەی بوونا خۆ نەبیتن و دگەڵ خەلکێ نەھێتە بکارئینان، بەلێ پا شۆڤینیزما ناسیۆنالیستی عەرەبی ھێشتان ب وێ باوەرێ و وی مێنتالیتەی تەماشەی مۆسلمان و جیھانا ئیسلامی و مۆسلمانێن دیترێن نەعەرەب دکەتن. ھەتا نۆکە ژی گەلەک سەرکردێن سیاسی و ئایینی ل جیھانا ئیسلامی-عەرەبی ب ھەمان دیتن شرۆڤەیا جیھانا ئیسلامی-نەعەرەبی دکەن. ب سەدان ڕەفتار و گۆتار و کریار و فەتوا و سەرەدەری ژ وان کەسان نیشان ددەتن کە ئەو ھێشتان بچاڤەکێ ( مەوالی ) و بەندە و خۆلام و خزمەتکارێ عەرەبان تەماشەی خەلکێ و ژ وان ژی کوردان و ب تایبەت ژی مۆسلمانێن کوردستانێ و کورد دکەن. د کوردەواری و دەیکا من، دیوان تاھر ئیسماعیل، بۆ ڤان کەسان تێگەە و گۆتنا " کتکا کورە " بکار دئینیتن، کۆ ڕامانا وێ ( سفلەیی ) و بێ نان و خۆیێ بوونا کەسەکی دگەھینیتن. ھەتاکۆ ئەڤ ساخلەتێ ڕەفتاری و سایکۆلۆژیایا عەرەبی-شۆڤینی لنک ھندەک ژ عەرەبان بۆ ھندەک ژ نەتەوەیێن دیترێن دەڤەرێ، و ژ وان ژی بۆ ناخ و دەروون و مێنتالیتە و مەژی و ھزر و کەساتییا پارس و تورکان ژی ھاتیە ڤەگۆھاستن. نۆکە ژی سەرەدەرییا ڤان دوو نەتەوەیان، یێ کۆ ئێک ژ وان، ئانکۆ پارس برایێن مە یێن ڕەسەن و ئاریایی یە، دگەل کوردێن سنوورێن وەلاتێن وان جۆرەکە ژ سەپاندنا ھزرا ( مەوالیبوونێ ) بۆ کوردان، بۆ وان نەتەوەیان. بەلگە ژی ھاریکارییا سەدان و ھزاران کەس و دەزگەھێن ئایینی و کۆمپانیێن بازرگانی و بانکێن بناڤۆدەنگ و زانایێن ئەکادیمی و ئایینی ل زانینگەە و سەنتەرێن مەزن و بەرنیاسێن ئایینی و زانستی نە ل وەلاتێن جۆدایێن عەرەبی و دەڤەرێ، کە پشتەڤانیێ ل ھەمی وان کەس و لایەن و وەلات و ڕێکخراوێن تیرۆریستی دکەن، یێن کۆ دژی نەتەوەیێن کوردستانێ.
ئەڤە و ژبلی ھندێ ئەو زانا و زەلامێن ئۆلی داھۆلەکا دەنگ نەخۆش لدویڤ مە کوردان لێددەن و پف دکەنە بن گۆھێن گەنج و لاو و سنێلەیێن خۆ و وان ب خەلەت د کورد و کوردستانیان دگەھینن. جارەکێ ل سالێن بەری ( ٢٠٠٨ ) دەمێ ئەز بەرەف مۆسکۆ دچۆم، بۆ ترانیزتێ مام ل فڕۆکەخانەیا ستەمنبۆلێ و شەڤ بسەر دا ھات و من بۆ دانەنیاسینا کەلتوور و فەرھەنگێ نەتەوەیێ خۆ خۆ ل گەنجەکی نێزیک کر کۆ ئەو چەند دەمژمێر بی ل وێرێ قۆرئانا پیرۆز بدەستانڤە بی و دخواند و من ھێجەتەک پەیدا کر دا بزانم کییە و چ کار دکەتن و مفای ژ ھزرا خۆ دگەل وی وەربگرم، و یێ کۆ پشتی ھنگی من زانی یێ وەلاتێ عەرەبیێ مەغریبە، و دەمێ من گۆھێ خۆ دایە وی من زانی کا ل وەلاتێن عەرەبی ب چ پەروەردەیەکێ ئەوان گەنجان پەروەردە دکەن و نۆکە و پشتی چەند سالان ئەز ھزرا خۆ دکەم دبینم ھەمان بێھنا ( مەوالیبوونێ ) ژ وان گۆتنان دھێت. من گەلەک بزاڤکر ھزرێن وی یێن شاش بگھۆڕم و ئەوی پشتی گۆھلێبوونا ژیڕۆکا خەمبارا وەلاتێ من و کوردستانیان ما حێبەتی و لدۆماھیکێ ب ڕستەیەکێ گۆت:" من نەدزانی ھوین نەڤیێن سەلاحەدینی نە و ئەڤ کارەساتە بسەرێ وە ھاتینە"!
بەلێ نۆکە و ئەڤە چەندەھا دەە و سەد سالن، ب دەھان فەتوا ل دژی کورد و کوردستانیان و لسەر دەستێ زانا و لایەنێن ئایینی-عەرەبی بەلگەنە بۆ ڤێ چەندێ سەلماندنا ڤێ گۆتنێ. ب مخابنی ڤە ھێشتان ژی گەلەک کەس و لایەن د ڤێ چەندێ نەگەھشتینە و ب ھەمی ڕەنگانڤە و لبن ناڤێ ئایینی یان ھەر ناڤەک دیتر، بزاڤێ دکەن مە ب ( مەوالیبوون ) بھێلن دگەل یان باشترە بێژین بندەستێن وان جۆرە عەرەبێن کۆ ھژمارا وان نەکێمن و ھەر چرکەیەکێ ڤەناندینە وەکی پێسترکێ و لسەر پشتا مە و بخێر دەست و باسکێن مە پیلانێن خۆ جێبەجێ بکەن. ئەو پشتی ھنگی و گەھشتن ب مەرەما خۆ نزانن ئەم ھەنە یان ژی نە. ئێ بابۆ مە گرتی یێن بناڤێ ئایینی وی کاری دکەن چاڤێ وان یێ ل ھندێ دا پارییەکی َنانی پێڤە بێتن، بەلێ ئەز حێبەتیمە ئەوێن دیتر و نەئایینی و سکۆلاریزم ( علمانی) بۆچی و کێ ڤی کاری دکەن؟! ئەڤەیە قەھرا من یا مەزن ! دھێتە گۆتن عەرەب یێ ل ھیڤیێ، کا چەوا سەلاحەدینی وەلاتێ فلستینێ بۆ وان ژ جۆھییان ستاندی کورد وی کاری بکەنەڤە. بەلێ ڕاستی ئەڤە خەونەکە و عەرەبێن شۆڤینی دێ وێ خەونێ دگەل خۆ بەنە بنێ گۆڕی و ( ئاخرەتێ). ڕاستی پشتی ھزار و چەند سەد سالان ژ قەنجیێن وان مە منەتە ڤێجا دا جارەک دیتر .... . ھەر کوردەکێ ڤی َخەونا عەرەبان بجە بینیتن کا سەلاحەدینی و دویندەھا وی چەند خێر ژ شۆڤینیزما عەرەبی دیت و گۆتنێن مە کوردان بۆ دھێن دی َھند ژی بۆ وی ھێن. سەردەمێ وی سەلاحەدینی گۆپیتکا پرۆژەیا ( موالیبوونێ ) بی بەلێ پا سەلاحەدینی ژ بەر عەرەبان ئاگەە ژ زارۆک و خویشک و برایێن خۆ نەمابی کۆ یێن لبن دارێ ( مەوالیبوونێ ) وەکی " بی یا دناڤ ئاڤێ دا دڕەجفن"! کوردەکێ تێگەھشتی چ جاران خەلەتییا سەلاحەدینی دووبارە ناکەتن دا پشتی ب کۆشتدانا ھزاران کۆڕێن کورد و بێخۆدان مانا زارۆک و ھێتیم و سێڤی یێن وان، ڤێجا شونیکا ھندەک شۆڤینی یێن برایێن فلستینییان بێن و بێژن ئەڤە نەتەوەیێ بەرمایێ ئەجن و مەجووسینە، پێدڤییە و ڕەوایە ئەم وان ژن و کچ و خویشکێن وان کرێت بکەین و بکڕین و بفرۆشین و کۆڕێن وان سەرژێبکەین و ... ئەنفال و کێمیاباران بکەین. ئەو سەرکردێ کوردێ ڤی کاری بکەتن ڕاستی وەکی سەلاحەدینییە و چ بۆ ناھێتە گۆتن!!
بلا ل بیرا مە و زارۆکێن مە بیتن و ببیتە گۆھارک ل گۆھێن مە ھەمیان. ڕاستە ھاتنا ناڤ ڕێزێن ئایینێ پیرۆزێ ئیسلامێ بۆ پشکەک ژ کوردان شانازییەک بی، بەلێ پا ڕاستی ھەتانۆکە و ھەتا ڕۆژا دۆماھیکا ڤێ جیھانێ ھێشتان کورد د چاڤێ ناسیۆنالیستا عەربێن شۆڤینی " مەجووسە"، و ئەو وەسا تێدگەھیتن وان ئەڤ ئایینە یێ ئیناندی و ب منەتی ڤە بسەر خەلکێ ڤەبەشاندی. حەچکۆ وان ھندەک ترۆمبێل و پارە ژ کیست و بەریکا بابێ خۆ ئینای و دایە ھندەک بەلەنگاز و ھەژاران، لەوما " تڕومنەتا" ل وان دکەن. ئەو کەس بخۆ و ب ویست و حەز و ڤیانا خۆ یێن ھاتینە ناڤ ئیسلاما پیرۆز. ئەڤە گۆپیتکا خشیمی و خۆپەرێستی و نێرگزیسما ھزرییە لنک وان کەسان ھەکەر وەسا ھزر دکەن. ئەوان ژبیرکرییە محەمەدێ ئەمین(س) یێ تەڤایا جیھانێ یە، یێ پێخۆش بیتن و د وی گەھشتی و گەھشتییە وی. ئەو دڤیا بزانن ئیسلام و ھەمی ئایین و پشکەکن ژ کەلتوورێ مرۆڤایەتیێ ب گشتی، و ژێدەرێ ھەمی ئایینان ئێک جھە، و یێ ھەمی مرۆڤانە، بێی جیاوازی. پیامبەر نە (ملکێ) کەس و نەتەوە و تاخم و وەلات و لایەنەکی نە، بەلکۆ یێ ھەمی جیھانێ یە، و پەیاما وان یا پیرۆز ژی زڤڕاندنا بەرێ ڕوویێ خەلکێ یە ژ بتپەرێستی و پەرستینا تاڤ و ھەیڤێ بۆ ناسینا یەزدانەکی َئێکانە و تنێ و ئافرینەرێ ڤێ جیھانێ و پەرێستینا وی. تنێ ئەو نەبیتن کۆ ھەر مرۆڤەک وەکی خۆ د وی خۆدایێ مەزن و دلۆڤان دگەھیتن.
ئەو مەجووسیەتا ھندەک عەرەبێن شۆڤینی و ب ھێجەت و تێنەگەھشتی، پێ گازی مە کوردان دکەن و ژ بێبەختی ددەنە نیاسین پشکەکە ژ قۆناغێن وەرارر و گەشەیا زانینی ( مەعریفی ) یا مرۆڤی ژ یەزدان و خۆدای و خۆدێپەرێستیێ. دیارە د قۆرئانا پیرۆز دا ھاتیە دەمێ ئیبراھیمێ خەلیل ( س)، بابێ پیامبەران، یێ کۆ ل سالێن نێزیکی ( ٢٠٠٠) سالان پێشی زایینێ و مەسیحیەتێ ل دژی دەستھەلاتدارێن بتپەرێستێن نەتەوەیێ خۆ ڕاپەرین کری، لدەستپێکێ و ژ تێگەھشتنا خۆ جاران بەرێ خۆ دا ھەیڤێ و پاشی چۆ ھەتاڤێ، و وەسا ھزر کر ئەون خۆدایێ ڤێ جیھانێ، و لدۆماھیکێ تێگەھشت و زانی یێ خەلەتە. چونکی وی زانی نابیتن خۆدایەکێ مەزن، یێ کۆ ئەو دێ پەرێستیتن تنێ چەند دەمژمێرەکا ھەبیت و پاشی ژبەرچاڤان بچیتن و برزە ببیتن. پشتی ھنگی ئەو د ڕاستییا خۆدای گەھشت و باوەرییەکا تەواو و قایم پێ ئیناند. بەلێ ئەو مەجووسیەت بۆ کوردان دھێتە گۆتن و ھەتا ئێڤاری وەکی زڕنایێ و داھۆلێ لدویڤ مە دھێتە گۆتن، و ھەتاکۆ کۆ وی ئاستی نۆکە ژی و گەلەک جاران دھێتە تێبینیکرن خەلکێ کورد و بناڤ مۆسلمان یێ ھەی ژ تێنەگەھشتن و نەزانی و خشیمی و گێژاتییا خۆ و ژبەر ڤێ گۆتنێ و تێگەھشتن و تێگەھاندنا خەلکێ ژ وی و نەتەوەێ وی و باب و باپیرێن خۆ، کەرب ژ ھندێ ڤە دبیتن کو کوردە ! ئەو مەجووسیەتا ئەو ژێ دبێژن ب ھاتنا زەردەشتی، چۆ قۆناغەک دیتر و پشتی ھنگی کوردێن ئاریای ژ بھێزترین باوەردارێن یەزدان و خۆدایێ مەزن و دلۆڤان بین، و ئەو ڕۆژ، وەکێ گەلەک ژێدەر و دیرۆکنڤیس دبێژن نێزیکی ( ٤٢٠٠ ) سال بەری نۆکە بی. ڤێجا بلا ھندەک نەخۆشمێرێن وەکی سەدامێ گۆڕ ب گۆڕ و بن لادن و ئەبووبەکر نەبەغدادی و ڕەشەکێن وان و فلان و فیسارێن بەری و پشتی وان، ب وی مێنتالیتەی ( ئەقلیەتی) ھەر چەند سالان خەونا نەبینن و نەبەزنە سەر ملێن مە کوردان و ھێجەتێ بکەنە ئەو کۆ دێ مەجووسیێن کورد کەینە مۆسلمان !
بەلێ پا دیارە ئەڤ تێگەھشتنەکا لاواز و مێنتالیتەیا ڕزی و بێھنگەنی و ئەبووجەھلانە لنک ھندەک ژ عەرەبێن شۆڤینی و ناسیۆنالیست ب داوی نەھاتیە و ناھێتن و ڕۆژانە ژ ھەمی لایەکی ڤە ئەم ڕەنگڤەدانێن وێ دبینین. نموونە ژی ئەو مامۆستایێن ئەکادیمی نە یێن لسەر ھاتینە ئاماژەپێدان و نۆکە ژی ب سەدان ناڤ ش وانا لسەر زمانێ ھەر ئێک ژ مە نە و ئەم ھەر جار وان دووبارە دکەین و ھەکەر نۆکە دیساڤە بێژین یان ھندەک دێ ھزر کەن ئەم نەیارێن وانا ینە، بەلێ پا وەسا نینە و ئەو نەیارێن مەنە، و بەلکۆ ھەکەر ئەم وەبێژین حەچکۆ چ جیاوازییا مە و وان ھەیە. ئەم کورد چ جاران خوە نائینینە ڕێزا وان بەس ھنگی نەبیتن مرۆڤ نەچار بیتن ناڤێ وان بێژیتن بەلکۆ ژی ئاساییە چەند جڤین ( خەبەران ) ژی لدویڤ وان بێژین! مافێ وانە.
لەوما چارەسەر ھیچ نینە مەگەر ئەم کوردستانی، شیر و پیر و ساخ و مری، بقڕژینە سەر سندۆقێن دەنگدانێ و ب ھەلبژارتنا " بەلێ بۆ سەربخۆییا کوردستانێ" ھەتاھەتایە بێژین " نەخێر بۆ مەوالی بوونێ". چونکی وەکی دیارە و کفشە، و " خیارە ژ تویتکی دیارە" دەردێ مەوالیبوونێ دەردەک گرانە و گەلەکی ب ژانە و یێ بێ دەرمانە. چارەسەرییا وێ نە ملحەم و ئامپیسیلین و ئامۆکسی سیلین و ئەسپیرینە، بەلکۆ تنێ " دەولەتا کوردستانە".
بڕیار یا ھەوەیە. ھوین دشێن ب سەرشۆڕی ڤە د کۆنا خانی ڤە بمینن و تەماشەی خەلەکێن تورکی بکەن و فێری کرێتترین بھایێن خێزانی و جڤاکی ببن، و پشتی بدۆماھیک ھاتنێ ژ مال بھێنە دەر و ( مەوالی ) بمینن، و ھوین دشێن لسەر چەلەپکا و داربەستێ و ھەتا خانەقین خۆ بخشینن و بچن دەنگی بدەن " بەلێ"، بەلێ پا پشتی ھنگی ژ بن چووڤێ تەڕێ ( مەوالیبوونێ) دەربکەڤن و ببییە کوردستانیەکێ ڕاستەقینە. بڤێ چەندێ گەلەک ژ بەختەوەری و ئاسایشا سایکۆلۆژی و جڤاکی و ئابووری و سیاسی و ئایینی