گەلی كوردستان بەدرێژایی مێژووی سەپاندن و لكاندنی بە عێراقەوە، هەموو جۆرە هەوڵێكی داوە تاوەكو بتوانێت برایانەو ئاشتییانە لەناو عێراقدا خۆی بگونجێنێت و بە مافە سەرەتاییەكانی خۆی بگات، بەڵام هەمیشە حكومەتە یەك لە دوای یەكەكانی عێراق، لە پاشایەتییەوە بگرە تا شۆڕشگێڕی و كۆماری و حكومەتە كۆمارییە پەرلەمانییە دیموكراتییە كارتۆنییەكانی دوای پرۆسەی رووخانی رژێمی سەدامیشەوە، ئەوەی پێیانكرابێت و توانیبێتیان لە مافەكانی ئێمەیان زەوت كردووە، بگرە هەر كاتێكیش بەهەێزبووبن، هەوڵی پاكتاوكردنی میللەتی ئێمەیان داوە، بۆیە سەركردایەتیی سیاسیی كوردستان بە لەبەرچاوگرتنی ئەو دەستكەوتانەی كە لە سایەی خوێنی شەهیدان و ئەزموونی حكومڕانیی كوردستانەوە بەدیهاتووە، لە كۆبوونەوەی رۆژی ٢٠١٧/٧/٦ بڕیاریان دا، چیدیكە ئەم سەودا سووتاوە لەگەڵ عێراقدا دووبارە نەكەنەوە و چارەنووس و داهاتووی ئەم میللەتە لە رێگای ریفراندۆم و بژاردەی مانەوە و نەمانەوە لەگەڵ عێراقدا بخەنە بەردەم گەلی كوردستان و خەڵك سەرپشك بكەن بۆ بڕیاردان لە داهاتوویان، ئەمەش دیموكراتیترین و یاساییترین رێگایە بۆ دیاریكردنی مافی چارەنووس لە جیهاندا، هەر وەك چۆن گەلی ئەلبانی كۆسۆڤۆ و كەمە نەتەوەییەكانی تری، دوای ئەو زوڵم و زۆردارییەی كە حكومەتەكانی سربیا دەرحەقیان دەیكرد، بڕیاریان دا ریفراندۆم بكەن، زۆرینەی زۆری گەلی كۆسۆڤۆ كە ژمارەی دانیشتووانەكەی نیوەی دانیشتووانی هەرێمی كوردستانە، بژاردەی سەربەخۆییان هەڵبژارد و بڕیاری جیابوونەوەیان لە سربیا دا، ئەوە بوو دواتر و لە ساڵی (٢٠٠٨) بە یەكجاری جاڕی سەربەخۆیی و جیابوونەوەی خۆیان لە دەوڵەتی سربیا دا، هەر رۆژێ دوای جاڕدانەكەش ئەمەریكا و فەڕەنسا و چەندین وڵاتی تری جیهان دانیان بە سەربەخۆییەكەیدا نا، هەرچەندە سربیا بە پاڵپشتی دەوڵەتێكی گەورەی وەكو رووسیا گوشارێكی زۆری كرد و باڵیۆزی خۆی لە زۆرێك لەو وڵاتانە كشاندەوە، بەڵام هیچ كام لەو گوشارانە سەری نەگرت، ئێستا زۆرێك لە وڵاتانی جیهان پەیوەندییان لەگەڵ دەوڵەتی سەربەخۆی كۆسۆڤۆدا هەیە. بۆیە هەرچەندە رێگرییەكان گەورە بن، ناتوانن بە بەردەوامی دژی خواستی گەلێك ببنەوە كە سووربێت لە سەر مافی چارەی خۆنووسین.
ئێستا بە هەموو پێوەرەكان لەبارترین كاتە بۆ دەنگدان و جیابوونەوەی گەل و خاكی كوردستان لە عێراق، لەبەرئەوەی ئێستا حكومەتی كوردستان ئیعتبارێكی گەورەی نێودەوڵەتی هەیە و ناوچە دابڕێندراوەكانیش بە دەست و بازووی هێزی پێشمەرگەی كوردستان گەڕاونەتەوە سەر خاكی كوردستان، دەوڵەتانی جیهانی و تا رادەیەك ناوچەییش، هیچ كات وەك ئێستا لە رەوایی داواكانی ئێمە نەگەیشتوون، بۆیە هەموو ئەو گوشارانەی كە دەیشیكەن زیاتر گوشاری ساردن و لەبەر گەلی خۆیان و بەرژەوەندییە سیاسی و سیادییەكانن، ئەویش ئەگەر ئێمە یەكگرتوو بین و سووربین لەسەر داواكانمان، دواجار هیچ وڵاتێك ئەو مافەی نییە ببێتە رێگر بۆ سەربەخۆیی كوردستان.
ماوەیەكی زۆرە پرسی دامەزراندنی دەوڵەتی كوردستان لە ناوەندە نهێنی و ستراتیژییەكانی جیهاندا گفتوگۆ و گەنگەشە دەكرێت و هەمووان دەزانن بەم زووانە ناوچەكە ژانی لەدایكبوونی دەوڵەتێكی تازە دەیگرێت و دەوڵەتی كوردستان دەبێتە دیفاكتۆ.
بۆیە من وەك ئەندامێكی پەرلەمانی كوردستان و نوێنەری خەڵكی كوردستان داوا لە هەموو خەڵكی كوردستان دەكەم بە هەموو رەنگ و دەنگە جیاوازەكانەوە، بۆ سەركەوتنی ئەم پرۆسەیە و داهاتووی نەوەكانمان، ناكۆكییە سیاسییەكانی خۆتان بەلاوەبنێن، وەك چۆن دوژمنانی میللەتەكەمان، هەمیشە بۆ بەرەنگاربوونەوەی ئێمە وایان كردووە، با ئەمجارە ئێمەش هەموومان بۆ ئەم بەرژەوەندییە نیشتمانییە گەورەیە ببین بە یەك و لەپێش چاوی هەموو جیهان بەشداری لە ریفراندۆم بكەین و بە سەركەوتنی گەورەی (بەڵێ بۆ سەربەخۆیی) ئیرادەی بەهێز و گەورەی گەلی كورد پیشانی هەموو جیهان بدەین و بگەین بەو دەوڵەتەی كە شایستەی خەبات و قوربانیدانی گەلەكەمانە.
شیلان جەعفەر شێخ عەلی
